ކޯވިޑް-19 ޖެހުނު މީހުންގެ ޢަދަދު 2.5 މިލިއަނަށް، އަސްލު ޢަދަދު އެއަށްވުރެ މަތިވާނެކަމަށް ބެލެވޭ

ދުނިޔޭގައި ކޯވިޑް-19 ޖެހުނު މީހުންގެ ޢަދަދު 2.5 މިލިއަނަށްވުރެ އިތުރުވެ، ބަލިމަޑުކަމުގައި މަރުވި މީހުންގެ ޢަދަދު 177,670އަށް އަރައިފިއެވެ.

ބަލިމަޑުކަމުގެ އަސަރުކޮށްފައިވާ މީހުންގެ ތެރެއިން ތިންބައި ކުޅަ ދެބައި މީހުން ފެނިފައިވަނީ ވިލާތުގެ ޤައުމުތަކުންނެވެ. ވިލާތުން ކޯވިޑް-19 އެންމެ ފުރަތަމަ ފެނިފައިވަނީ ޖެނުއަރީ މަހުގެ 10ވަނަ ދުވަހެވެ. ބަލިމަޑުކަމުގެ އަސަރުކޮށްފައިވާ މީހުންގެ ޢަދަދު 500،000އަށް އިތުރުވާން ނެގީ ގާތްގަނޑަކަށް 75 ދުވަހެވެ. އޭޕްރިލް މަހުން ފެށިގެން ވިލާތުގައި ދުވާލެއްގެ މައްޗަށް 70،000އަށްވުރެ ގިނަ މީހުންނަށް ބަލިޖެމުންދާކަމަށް ދަނީ ރިޕޯޓުކުރަމުންނެވެ. އެންމެ ފަހުން އިތުރުވި 500،000 މީހުންނަށް ބަލިޖެހިފައިވަނީ އެންމެ 6 ދުވަހުގެ ތެރޭގައެވެ. ވިލާތުން ބަލިޖެހިފައިވާ 1.1 މިލިއަނަށްވުރެ ގިނަ މީހުންގެ ތެރެއިން ގާތްގަނޑަކަށް 400،000 މީހުން ފެނިފައިވަނީ އިޓަލީވިލާތުންނާއި ސްޕެއިނުންނެވެ. ބަލީގެ އަސަރުކޮށްފައިވާ މީހުންގެ 10 އިންސައްތަ މީހުންވަނީ މަރުވެފައެވެ.

ދުނިޔޭގެ ޞިއްޙަތު ޖަމްޢިއްޔާ، ޑަބްލިއުއެޗުއޯއިން ބުނާގޮތުގައި ފިނިމޫސުމުގައި ފެތުރޭ އިންފުލުޒެންޒާގެ ރޯގާ ޖެހެނީ އަހަރެއްގެ މައްޗަށް 3އާއި 5 މިލިއަން މީހުނާ ދެމެދުގެ ޢަދަދަކަށް ކަމަށެވެ. ކޯވިޑް-19 ޖެހިފައިވާ މީހުންގެ ޢަދަދު 2.5 މިލިއަނަށްވުރެ މައްޗަށް ދިޔަނަމަވެސް ބަލިޖެހިފައިވާ މީހުންގެ އަސްލު ޢަދަދު އެއަށްވުރެ މަތިވާނެކަމަށް ޞިއްހީ މާހިރުން ޤަބޫލުކުރެއެވެ. ނަމަވެސް 1918ވަނަ އަހަރު ފެތުރުނު ސްޕެނިޝް ރޯގާ ޖެހުނު މީހުންގެ ޢަދަދާ އެޢަދަދު ގާތްވެސް ނުވެއެވެ. ސްޕެނިޝް ރޯގާގެ އަސަރުވަނީ 500 މިލިއަނަށްވުރެ ގިނަ މީހުންނަށް ކޮށްފައެވެ.

ކޯވިޑް-19 އަދިވެސް ދުނިޔޭގެ އެކި ސަރަޙައްދުތަކުގައި ހަލުވިކަމާއެކު ފެތުރުނުނަމަވެސް ބަލިމަޑުކަމާ ދެކޮޅަށް އަޅާފައިވާ ހަރުކަށި ފިޔަވަޅުތަކުގެ ސަބަބުން ބަލި ފެތުރޭ މިންވަރު ކޮންމެވެސް ވަރަކަށް މަޑުޖެހިފައިވާކަމުގެ ނިޝާންތައްދަނީ ފެންނަމުންނެވެ. އޭޕްރިލް މަހު ބަލި ފެތުރޭ މިންވަރު ދިޔައީ ދުވާލެއްގެ މައްޗަށް 8އާ 9 އިންސައްތައާ ދެމެދުގެ މިންވަރަކަށް އިތުރުވަމުންނެވެ. ނަމަވެސް ފާއިތުވި ހަފުތާގެ ތެރޭގައި އެޢަދަދުވަނީ 3އާއި 4 އިންސައްތައާ ދެމެދުގެ ޢަދަދަކަށް ދަށްވެފައެވެ.

އެންމެ ހަލުވިކަމާއެކު ބަލިމަޑުކަން ފެތުރެމުންދާ އެމެރިކާގައި މިހާތަނަށް 819,175 މީހުންނަށްވަނީ ކޯވިޑް-19 ޖެހިފައެވެ. އަދި 45,343 މީހުންވަނީ މަރުވެފައެވެ. އެއީ ކޯވިޑް-19 ޖެހިފައިވާ މީހުންގެ ޖުމްލަ ޢަދަދުގެ ތިންބައި ކުޅަ އެއްބައެވެ. ނަމަވެސް އެހެން ސަރަޙައްދުތަކަށްވުރެ އުތުރު އެމެރިކާގައި މަރުވާ މީހުންގެ ނިސްބަތަކީ ބަލިޖެހޭ މީހުންގެ 5 އިންސައްތައެވެ.

ވިލާތާއި އެމެރިކާގެ ޤައުމުތަކާ ޚިލާފަށް ދެކުނު އެމެރިކާގައި ކޯވިޑް-19 ފެތުރޭ މިންވަރު އިތުރުވަމުންދާކަމަށްވަނީ ފާހަގަކޮށްފައެވެ. އެގޮތުން އެސަރަޙައްދުގައި ބަލީގެ އަސަރުކޮށްފައިވާ މީހުންގެ ޢަދަދުވަނީ ފާއިތުވި 24 ގަޑިއިރުގެ ތެރޭގައި 100،000އަށްވުރެ އިތުރުވެފައެވެ.

ކޯވިޑް-19 އެންމެ ފުރަތަމަ ފެތުރެންފެށުނު ޗައިނާގައި ބަލިމަޑުކަމުގެ އަސަރުކުރާ މީހުންގެ ޢަދަދުވަނީ ވަރަށް ބޮޑަށް ދަށްވެފައެވެ. ފާއިތުވި ތިން ދުވަހުގެ ތެރޭގައި ބަލިޖެހިފައިވާކަމަށް ދުވާލެއްގެ މައްޗަށް ފެންނަ މީހުންގެ ޢަދަދުވަނީ 20އަށްވުރެ ދަށްވެފައެވެ. އެމުއްދަތުގައި ބަލިމަޑުކަމުގެ ސަބަބުން މީހަކު މަރުވެފައެއް ނުވެއެވެ. ނަމަވެސް މިދިޔަ ހަފުތާގައި ޗައިނާއިންވަނީ އެޤައުމުން ބަލިމަޑުކަމުގެ ސަބަބުން މަރުވި މީހުންގެ ޢަދަދު 40 އިންސައްތައިން އިތުރުކޮށްފައެވެ. އެޤައުމުގެ ޞިއްޙީ އިދާރާތަކުން ބުނީ އިތުރުކުރި 1,290 މީހުންނަކީ ބަލިމަޑުކަމުގެ ސަބަބުން މަރުވެފައިވާކަމަށް ކުރިން ފާހަގަކުރެވިފައިނުވާ ބައެއްކަމަށެވެ.

ބައްޔަށް ތަހުލީލުކުރުމުގައި ބައެއް ޤައުމުތަކުންދަނީ ދަތިތަކަކާ ކުރިމަތިލަމުންނެވެ. އެހެންކަމުން، ކޯވިޑް-19 ޖެހިފައިވާ މީހުންގެ ޢަދަދު 2.5 މިލިއަނަށްވުރެ މަތިވާނެކަމަށް ބެލެވެއެވެ. ބަލިޖެހިފައިވާކަމަށް ބުނާ މީހުންގެ ޢަދަދުތަކަށް ބަދަލުގެނެސް، މުސްކުޅިން ބަލަހައްޓާ މަރުކަޒުތަކުގައި ބަލީގެ އަސަރުކޮށްފައިވާ މީހުންގެ ޢަދަދު ބައެއް ޤައުމުތަކުން ނުހިމަނައެވެ.