ސިންގަޕޫރުގައި ކޯވިޑް-19 ޖެހި ރަނގަޅުވާ ބިދޭސީ މަސައްކަތްތެރިން ކުރޫޒްބޯޓުތަކަށް ބަދަލުކުރުމާމެދު ވިސްނަމުންދާކަމަށް އެޤައުމުގެ ސަރުކާރުން ބުނެފިއެވެ.
ސިންގަޕޫރުގައި ކޯވިޑް-19 ޖެހުނު 5,992 މީހުންގެ ތެރެއިން 60 އިންސައްތަ މީހުންނަކީ ތޮޖެހިފައިވާ ތަންތަނުގައި ދިރިއުޅޭ ބިދޭސީ މަސައްކަތްތެރިންނެވެ. އެމީހުން ދިރިއުޅަށް ކަނޑައަޅާފައިވާ ކޮންމެ ކޮޓަރިއެއްގައި 12އާއި 20އާ ދެމެދުގެ ޢަދަދަކަށް މީހުން ދިރިއުޅެއެވެ. އޭގެ ތެރޭގައި ގިނައީ ދެކުނު އޭޝިޔާއަށް ނިސްބަތްވާ މީހުންނެވެ. ކޮޓަރިތަކުގައި ދިރިއުޅޭ އެންމެންވެސް ބޭނުންކުރަނީ އެނެމެ ފާޚަނާއެކެވެ. ގިނަ ފަހަރަށް އެފާޚަނާތަކަކީ ސާފުތާހިރުކަން ކުޑަ ތަންތަނެވެ. އެޤައުމުގައި ބަލިޖެހިފައިވާ މީހުންގެ ޢަދަދު ކުއްލިއަކަށް އިތުރުވެގެން ގޮސްފައިވަަނީ ބިދޭސީން ދިރިއުޅޭ އެފަދަ ކޮޓަރިބަރިއެއްގައި ހަލުވިކަމާއެކު ބަލިމަޑުކަން ފެތުރުމުންނެވެ.
ސިންގަޕޫރުގެ ސަރުކާރުން މިހާރުދަނީ ތޮށްޖެހިފައިވާ ކޮޓަރިބަރިތަކުގައި ދިިރިއުޅޭ އެތައް ސަތޭކަ ބިދޭސީ މަސައްކަތްތެރިން ރައްކާތެރި އެހެން ތަންތަނަށް ބަދަލުކުރެވޭނެ އިންތިޒާމް ހަމަޖެއްސުމަށް މަސައްކަތްކުރަމުންނެވެ. އެޤައުމުގެ ފަތުރުވެރިކަމާބެހޭ ބޯޑުން ނެރުނު ބަޔާނެއްގައި ބުނީ ދަތި ކޮޓަރިތަކުގައި އުޅޭ ބިދޭސީ މަސައްކަތްތެރިންގެ ތެރެއިން ބަލިޖެހި ރަނގަޅުވާ މީހުން ކުރޫޒުބޯޓުތަކަށް ބަދަލުކުރުމަށް މަޝްވަރާކުރަމުންދާކަމަށެވެ. އެފަދަ ބޯޓުތަކުގައި ވަކިވަކި ކޮޓަރިތަކާއި ފާޚަނާހުރުމުން އެކަކު އަނެކަކާ ދިމާވާ މިންވަރު މަދުކުރުމަށް އެހީތެރިވެދޭނެކަމަށް އެބަޔާނުގައި ބުނެފައިވެއެވެ. އެގޮތަށް ޢަމަލުކޮށްފިނަމަ ކޮޓަރިބަރިތަކުގެ ތޮށްޖެހުން ކުޑަވެގެންދާނެއެވެ.
ބަލިމަޑުކަމުގެ އަސަރު ދެވަނަ ފަހަރަށް ކުރާ މީހުންގެ ޢަދަދު ދަށް ނަމަވެސް، އެގޮތަށް ބަލިފެތުރުންވެސް ހުއްޓުވޭނެ އެއް މަގަކީ ރަނގަޅުވާ މީހުން ޢާންމުންނާ ވަކިން ބޭތިއްބުންކަމަށް ސަރުކާރުން ބުނެއެވެ. އެގޮތުން ގެންޓިންގ ކްްރޫޒް ލައިންސް ކުންފުނީގެ ދެބޯޓެއް ލިބޭތޯ ބަލަމުންދާކަމަށް ފަތުރުވެރިކަމާބެހޭ ބޯޑުން ބުނެއެވެ. އެބޯޓުތަކުގައި ރަނގަޅަށް ވައިދައުރުކުރާ ނިޡާމު ހުރިތޯ ޔަޤީންކޮށް، ރައްކާތެރިކަމުގެ ފިޔަވަޅުތަކާއި ބަލި ފެތުރުން ހުއްޓުވުމަށް އެޅެންހުރި ފިޔަވަޅުތައް ބަލަމުންދާކަމަށް އެބޯޑުން ބުނެއެވެ.
އޭގެ އިތުރުން ބިދޭސީ މަސައްކަތްތެރިން ދިރިއުޅޭ ކޮޓަރިބަރިތަކުގައި އުޅޭ ޞިއްޙަތު ރަނގަޅުމީހުންވެސް ރައްކާތެރި ތަންތަނަށް ބަދަލުކުރާނެއެވެ. އެގޮތުން މިހާރުވެސް ގިނަ ޢަދަދެއްގެ މީހުންދަނީ ސަރުކާރުން ހަމަޖައްސާ ޚާއްޞަ ތަންތަނަށާއި އަސްކަރީ މަރުކަޒުތަކަށާއި ބޮޑެތި ބޯޓުފަހަރުތަކަށް ބަދަލުކުރަމުންނެވެ.
ފަތުރުވެރިން ގޮވައިގެން ދަތުރުކުރަމުންދިޔަ ކުރޫޒުބޯޓުތަކުގައި ކޯވިޑް-19ވަނީ މީގެ ކުރިން ވަރަށް ހަލުވިކަމާއެކު ފެތުރިފައެވެ. އެގޮތުން ޖަޕާނުގައި މަސް ދުވަހަށްވުރެ ގިނަ ދުވަހު ކަރަންޓީނުކޮށްްފައި އޮތް ޑައިމަންޑް ޕްރިންސަސް ނަމަކަށް ކިޔާ ކުރޫޒްބޯޓަކުން ކޯވިޑް-19 ޖެހިފައިވާ 700އަށްވުރެ ގިނަ މީހުންވަނީ ފެނިފައެވެ. އަދި އެމެރިކާއާއި ފަރަންސޭސިވިލާތްފަދަ ޤައުމުތަކުގެ އަސްކަރީ މަނަވަރުތަކުގައިވެސް ކޯވިޑް-19ވަނީ ފެތުރިފައެވެ.