ކޯވިޑް-19ގެ ސަބަބުން ކުރިމަތިވާ އިޤްތިޞާދީ ހީނަރުކަމުގައި އެތައް ހާސް ކުދިންނެއް މަރުވާނެ: އދ

ކޯވިޑް-19ގެ ސަބަބުން ކުރިމަތިވާ އިޤްތިޞާދީ ހީނަރުކަމުގައި މިއަހަރު އެތައް ހާސް ކުޑަކުދިންނެއް މަރުވާނެކަމަށާއި އެތައް މިލިއަން ކުޑަކުންދިންނެއް ފަޤީރުކަމުގެ ޙާލަތަށް ވެއްޓޭނެކަމުގެ އިންޒާރު އދން ދީފިއެވެ.

ކޯވިޑް-19 ފެތުރޭތީ ރައްކާތެރިކަމުގެ ފިޔަވަޅެއްގެ ގޮތުން ދުނިޔޭގެ 188 ޤައުމެއްގެ މަދަރުސާތައްވަނީ ބަންދުކޮށްފައެވެ. އޭގެ އަސަރު 1.5 ބިލިއަނަށްވުރެ ގިނަ ކިޔަވާކުދިންނަށްވަނީ ކޮށްފައެވެ. އދންް ތައްޔާރުކޮށްފައިވާ ދިރާސާ ރިޕޯޓެއްގައި ބުނެފައިވަނީ ދުނިޔޭގެ 143 ޤައުމެއްގައި ގާތްގަނޑަކަށް 369 މިލިއަން ކުޑަކުދިން އެކުދިންގެ ބަނޑުހައިހޫނުކަން ފިލުވުމަށް މަދަރުސާއިން ދޭ ކެއުމަށް ބަރޯސާވާކަމަށެވެ. ނަމަވެސް ބަލިމަޑުކަމުގެ ބިރުބޮޑުވެ، ގިނަ މަދަރުސާތައް ބަންދުކޮށްފައިވާ ޙާލަތުގައި ކާނެ އެއްޗެއް ލިބޭނެ އެހެން މަގެއް ހޯދުމަށް އެކުދިންނަށްވަނީ މަޖުބޫރުވެފައެވެ.

އދގެ ސެކެޓްރީ ޖެނެރަލް އެންޓޯނިއޯ ގުތެރޭޝް ވިދާޅުވީ އެފަދަ ޙާލަތްތަކާ ކުރިމަތިލަމުންދާ ކުދިންނަށް މިހާރުން މިހާރަށް އެހީތެރިކަން ފޯރުކޮށްދޭން ޖެހޭކަމަށެވެ. އަދި މިހާރު ކުރިމަތިވެފައިވާ ބަލިމަޑުކަމުގެ ސަބަބުން އެކުދިންްނަށް ލިބެމުންދާ ގެއްލުމުގެ މިންވަރު ކުޑަކުރުމަށް ޤައުމުތަކުގެ އިސްވެރިން މަސައްކަތް ކުރަން ޖެހޭކަމަށް އޭނާ ވިދާޅުވިއެވެ. އަދި ޢާންމު ޞިއްޙަތަށް ނުރައްކާއޮތް ބަލިމަޑުކަން މިހާރުވަނީ ވަބާއަކަށް ބަދަލުވެ، ދުނިޔޭގެ އެންމެންނަށް އޭގެ ބިރުވެރިކަން ފޯރާފައިކަމަށް އޭނާ ވިދާޅުވިއެވެ.

ކޯވިޑް-19 އެންމެ ފުރަތަަމަ ފެތުރެންފެށީ 2019ވަނަ އަހަރުގެ ފަހުކޮޅު ޗައިނާގެ ވުހާން ސިޓީގައެވެ. ކޯވިޑް-19ވަނީ ދުނިޔޭގެ 213 ޤައުމަކާއި ސަރަޙައްދަކަށް ފޯރާ، 2 މިލިއަނަށްވުރެ ގިނަ މީހުންނަށް ބަލިޖެހިފައެވެ. އަދި މަރުވި މީހުންގެ ޢަދަދުވަނީ 148،000އަށްވުރެ އިތުރުވެފައެވެ.

ދިރާސާއިން ދައްކާގޮތުގައި ކޯވޑް-19ގެ އަސަރުކުރާ ކުޑަކުދިންގެ ކިބައިން ބަލީގެ ޢަލާމާތްތައް ފެންނަ މިންވަރު ބޮޑެތި މީހުންނަށްވުރެ ކުޑައެވެ. ނަމަވެސް ބަލިމަޑުކަން ފެތުރޭތީ ދުނިޔޭގެ އިޤްތިޞާދަށް ކުރަމުންދާ ނޭދެވޭ އަސަރުތަކުގެ ސަބަބުން އެތައް ހާސް އާއިލާއެއްވަނީ ޙާލުގައި ޖެހިފައެވެ. ނަތީޖާއެއްގެ ގޮތުން މިއަހަރު ދުނިޔޭގައި މަރުވާ ކުޑަކުދިންގެ ނިސްބަތް ވަރަށް ބޮޑަށް އިތުރުވާނެކަމަށް އދންވަނީ ފާހަގަކޮށްފައެވެ. އަދި ފާއިތުވި ދެތިން އަހަރުގެ ތެރޭގައި ކުޑަކުދިން މަރުވާ ނިސްބަތް ދަށްކުރެވިފައިވީނަމަވެސް މިއަހަރުގެ ތެރޭގައި އަލުން އިތުރުވާނެކަމަށް އެދިރާސާގައި ބުނެފައިވެއެވެ.

ބަލިމަޑުކަން ފެތުރުން ހުއްޓުވުމަށް ދުނިޔޭގެ ގިނަ ޤައުމުތަކުގެ ވިޔަފާރިތައް ބަންދުކޮށް، ޢާންމުން ބޭރުތެރެއަށް ނުނިކުމެ ގޭގައި މަޑުކުރަން ޞިއްޙީ މާހިރުންނާއި ސަރުކާރުތަކުންދަނީ ގޮވާލަމުންނެވެ. 1930ގެ އަހަރުތަކުގައި ދުނިޔެއަށް ކުރިމަތިވި ބޮޑުތަދުގެ ފަހުންް ދުނިޔޭގެ ޙާލަތު މިހާ ގޯސްވެފައިނުވާކަމަށް އިންޓަނޭޝަނަލް މަނިޓަރީ ފަންޑު، އައިއެމްއެފުން ބުނެއެވެ.

2019ވަނަ އަހަރު ވަރަށް ފަޤީރު ޙާލަތުގައި 386 މިލިއަން ކުދިން އުޅުނުކަމަށް އދން އަންދާޒާކުރެއެވެ. އަދި މިއަހަރު ތެރޭގައި ކޯވިޑް-19ގެ ސަބަބުން އިތުރު 42 މިލިއަނާއި 66 މިލިއަނާ ދެމެދުގެ ޢަދަދެއްގެ ކުޑަކުދިން އެޙާލަތަށް ދާނެކަމަށް އދން ޤަބޫލުކުރެއެވެ.