ދުނިޔޭގައި ހަލުވިކަމާއެކު ފެތުރެމުންދާ ކޯވިޑް-19 އެންމެ ފުރަތަމަ ފެނުނު ޗައިނާގެ ހުބެއި ޕްރޮވިންސްގެ ވުހާން ސިޓީގައި ބަލިޖެހުނު މީހުންގެ ޢަދަދާއި މަރުވި މީހުންގެ ޢަދަދު މަތިކޮށްފިއެވެ.
ޗައިނާގެ ސަރުކާރުން އަލުން އިޢުލާންކުރި ޢަދަދުތައް ދައްކާގޮތުގައި ވުހާން ސިޓީގައި ކުރިން އިޢުލާންކުރި ޢަދަދަށްވުރެ އިތުރު 325 މީހުންނަށް ކޯވިޑް-19 ޖެހުނެވެ. އެބަދަލާއެކު އެސިޓީން ޖުމްލަ 50,333 މިހުންނަށްވަނީ ބަލިޖެހިފައެވެ. ކޯވިޑް-19ގެ ސަބަބުން އިތުރު 1,290 މީހުން މަރުވެފައިކަމަށާއި ވުހާނުން މަރުވި މީހުންގެ ޖުމްލަ ޢަދަދަކީ 3,869ކަމަށްވެސް ޗައިނާގެ ސަރުކާރުންވަނީ ކަނޑައަޅާފައެވެ.
އެބަދަލުތަކާއެކު ޗައިނާގައި ކޯވިޑް-19 މީހުންގެ ޢަދަދަކީ 82,692އެވެ. އަދި މަރުވި މީހުންގެ ޢަދަދަކީ 4,632އެވެ.
ޗައިނާގެ ސަރުކާރުން ބުނީ އެބަދަލުތައް ގެނެސްފައިވަނީ ތާރީޚު އޮޅުވާނުލުމަށާއި ބަލީގެ ސަބަބުން މަރުވި މީހުންނަށް އިޙްތިރާމުއަދާކުރުމުގެ މަޤްޞަދުގައެވެ. ޗައިނާގެ ސަރުކާރުން އައު ޢަދަދުތަކެއް އިޢުލާންކޮށްފައިވަނީ ވުހާންގެ ފުރަބަންދު އުވާލުމުން އެސިޓީ ޢާންމު ޙާލަތަކަށް ރުޖޫޢަވަމުންދާ ދަނޑިވަޅެއްގައެވެ.