ޖަރުމަނުވިލާތުގައި ކޯވިޑް-19 ފެތުރޭ މިންވަރު ކޮންމެވެސް ވަރަކަށްް މަޑުޖެހެންފެށުމުން ބަލިމަޑުކަމާ ދެކޮޅަށް އެޤައުމުގައި އަޅާފައިވާ ބައެއް ފިޔަވަޅުތަކަށް ދޫދޭން ފަށައިފިއެވެ.
ޖަރުމަނުވިލާތުގައި 134,753 މީހުންނަށްވަނީ ކޯވިޑް-19 ޖެހިފައެވެ. އަދި މަރުވި މީހުންގެ ޢަދަދުވަނީ 3,804އަށް އިތުރުވެފައެވެ.
ޖަރުމަނުވިލާތުގެ ޗާންސެލަރ އެންގެލަރ މާރކެލް ވިދާޅުވީ އެޤައުމުގައި އަޅާފައިވާ ފިޔަވަޅުތަކުގެ އެދެވޭ ނަތީޖާ ކޮންމެވެސް މިންވަރަކަށް ފެންނަން ފަށާފައިވާކަމަށާައި އަންނަ ހަފުތާއިން ފެށިގެން ބައެއް ވިޔަފާރިތައް އަލުން ހުޅުވަންފަށާނެކަމަށެވެ. އެގޮތުން 800 އަކަމީޓަރަށްވުރެ ބޮޑެތި ފިހާރަތައް ހުޅުވުމުގެ ޙުއްދަދެވޭނެއެވެ. އަދި ކާރާއި ބައިސްކަލު ވިއްކާ ފިހާރަތަކާއި ފޮތް ވިއްކާ ފިހާރަތަކާއި ބޯކޮށާތަންތަން ހުޅުވުމުގެ ޙުއްދަދެވޭނެއެވެ. ނަމަވެސް ހުރިހާ ވިޔަފާރިތަކުންވެސް ގައިދުރުކަން ބެހެއްޓޭނެ އިންތިޒާމު ހަމަޖައްސާ، ސާފުތާހިރުކަމަށް އިސްކަން ދޭންޖެހޭނެއެވެ.
މެއި މަހުގެ 4 ވަނަ ދުވަހުން ފެށިގެން ބައެއް މަދަރުސާތައް ހުޅުވުމަށްވެސްވަނީ ނިންމާފައެވެ. މަދަރުސާތައް ހުޅުވުމުގައި އިސްކަންދޭނީ އެންމެ މަތީ ގުރޭޑުތަކަށެވެ. ނަމަވެސް ދީނީ އެއްވުންތައް ބޭއްވުމާއި ކެފޭއާއި ރެސްޓޯރަންޓާއި ސިނަމާފަދަ ތަންތަން ހުޅުވުމުގެ ޙުއްދައެއް ނުދޭނެއެވެ. ބޮޑެތި ޙަފުލާތައް ބޭއްވޭނީ އޯގަސްޓު 31ގެ ފަހުންނެވެ.
އިޖްތިމާޢީ ގައިދުރުކަން ބަހައްޓަން ކަނޑައަޅާފައިވާ ޤަވާއިދުތަކަށް މެއިމަހުގެ 3ވަނަ ދުވަހާ ހަމައަށް ޢަމަލުކުރަންޖެހޭނެއެވެ. އޭގެ ފަހުން ޢަމަލުކުރާނެގޮތެއް ނިންމުމަށް އޭޕްރިލް 30ވަނަ ދުވަހު ޖަރުމަނުވިލާތުގެ ސަރުކާރުން މަޝްވަރާކުރާނެއެވެ. ޖަރުމަނުވިލާތުގެ ސަރުކާރުންވަނީ ޢާންމުން ބާޒާރުކުރުމަށް ބޭރަށް ނުކުތުމުގައާއި ޢާންމު ދަތުރުފަތުރުގެ ނިޡާމް ބޭނުންކުރާއިރު މާސްކު ބޭނުންކުރުމަށް އިލްތިމާޞްކޮށްފައެވެ.
ޗާންސެލަރ މާރކެލް ވިދާޅުވީ ޖަރުމަނުވިލާތުގައި ކޯވިޑް-19 ޖެހޭ ކޮންމެ މީހެއްގެ ފަރާތުން އިތުރު އެކަކަށް ބަލިމަޑުކަން ފެތުރޭކަމަށެވެ. އެޢަދަދު 1.1އަށް އިތުރުވިނަމަ އޮކްޓޯބަރު މަހާ ހަމައަށް އެެޤައުމުގެ ޞިއްޙީ ނިޡާމަށް އެކަށީގެންވާ ފަރުވާ ދިނުމަށް ވަރަށް ބޮޑަށް ދަތިވާނެއެވެ. އެޢަދަދު 1.2 އަކަށް އިތުރުވެއްޖެނަމަ ޖުލައި މަހުގެ ތެރޭގައި އެޙާލަތަށް ވެއްޓޭނެއެވެ. އަދި 1.3އަކަށް އިތުރުވެއްޖެނަމަ ޖޫން މަހުގެ ތެރާގައި ޙާލަތު ގޯސްވާނެއެވެ. އެހެންކަމުން ފިޔަވަޅުތަކަށް އިތުރަށް ދޫދިނުމަށް ލިބޭ ފުރުޞަތު ވަރަށް ހަނިކަމަށް އޭނާ ފާހަގަކުރެއްވިއެވެ.
ބަލިމަޑުކަމުގެ ސަބަބުން އެޤައުމުގެ އިޤްތިޞާދަށްވެސްދަނީ ބޮޑެތި ނޭދެވޭ އަސަރުތަކެއް ކުރަމުންނެވެ. އެޤައުމުގެ އިޤްތިޞާދީ ޙާލަތުވަނީ މާރިޗު މަހުން ފެށިގެން ވަރަށް ބޮޑަށް ހީނަރުވެފައެވެ. އަދި އަހަރުގެ މެދާހިސާބަށް ޙާލަތު އޮންނާނީ އެގޮތަށްކަމަށް އަންދާޒާކުރެވެއެވެ. ވިޔަފާރިތަކަށްވަނީ ލިބޭ ގެއްލުން ފޫނުބެއްދޭނެކަމުގެ ބިރު ހީވެފައެވެ. ވިޔަފާރިތަކަށް އެހީތެރިވުމަށް ޖަރުމަނުވިލާތުގެ ސަރުކާރުންވަނީ 750 ބިލިއަން ޔޫރޯގެ ސްޓިމިއުލަސް ޕެކޭޖެއް އިޢުލާނުކޮށްފައެވެ. ވިޔަފާރިތައް އަލުން ހުޅުވަންފެށިނަމަވެސް އިޤްތިޞާދު ހަމައަކަށް އެޅުމަށް ވަގުތުނަގާނެކަމަށް ޖަރުމަނުވިލާތުގެ އިޤްތިޞާދާބެހޭ ވުޒާރާއިންވަނީ ބުނެފައެވެ.