ޖޭ.ޑަބްލިއު މެރިއެޓް މޯލްޑިވްސްއިން ގެއްލުނު ބިދޭސީމީހާ ހޯދުމުގައި އާއްމުންގެ އެހީތެރިކަމަށް އެމްއެންޑީއެފުން އެދިއްޖެއެވެ.
ގެއްލިގެން ހޯދަމުންދަނީ 30 އަހަރުގެ އިންޑިއާ މީހެކެވެ. އެމީހާއަކީ އެ ރިސޯޓުގެ މުދިމުގެ ގޮތުގައި މަސައްކަތް ކުރި މީހާއެވެ. މީހާ ގެއްލިގެން އެމްއެންޑީއެފަށް ރިޕޯޓްކުރީ މިމަހުގެ 6 ވަނަ ދުވަހުއެވެ. އެމްއެންޑީއެފުން ވިދާޅުވީ ރިސޯޓުގައި ހުރި ސީސީޓީވީން ފެންނަ ގޮތުގައި އެމީހާ އެރަށު ސަޕްލައި ޖެޓީމަތީގައި ފޯނެއްގައި ހުރެފަ މޫދައް ފުންމާލާތަންވަނީ ފެނިފައެވެ.
މިމައްސަލަ އެމްއެންޑީއެފަށް ރިޕޯޓްކުރުމާއި ގުޅިގެން އޭނާ ހޯދުމުގެ މަސައްކަތް ދަނީ ކުރަމުންނެވެ. މޫދަށް ފުންމާލިއިރު އެމީހާ ލައިގެންހުރީ ހުދު ކުލައިގެ ކުރުތާއަކާއި އަޅިކުލައިގެ ފަޓުލޫނެކެވެ.
މި މީހާ ހޯދުމަށް ކުރަމުންދާ މަސައްކަތުގެދަށުން މިހާތަނަށް މޫދުގެ 136.3 ސްކޮޔަރ ކިލޯމީޓަރަށްވުރެ ބޮޑު ސަރަޙައްދެއްވަނީ ބަލާފައެވެ. އެމްއެންޑީއެފުން ބުނެފައިވަނީ މީހާ ހޯދުމަށް ކުރަމުންދާ މަސައްކަތުގައި މިކަމާއި ގުޅޭ އެއްވެސް މަޢުލޫމާތެއް، އަދި އެމީހާކަމަށް ޝައްކުވާ އެއްވެސް ނިޝާނެއް ފެނިއްޖެނަމަ އެމްއެންޑީއެފަށް އެންގުމަށް އެދޭކަމަށެވެ.
މިހާ ގެއްލުނު މައްސަލަ ފުލުހުންދަނީ އިތުރަށް ތަހުގީގުކުރަމުންނެވެ..