ހަރުކަށި ފިކުރުގެ ޠާލިބާނުންނާ ޞުލްޙަވުމަށް އެޅި ފިޔަވަޅެއްގެގޮތުން އެޖަމާޢަތުގެ 100 ހަނގުރާމަވެރިން އަފްޣާނިސްތާނުގެ ސަރުކާރުން މިނިވަންކޮށްފިއެވެ.
ހަނގުރާމަވެރިންގެ ބަޔަކު އަފްޣާނިސްތާނުގެ ސަރުކާރުން މިނިވަންކޮށްފައިވަނީ އެކަމާ ގުޅިގެން ބޮޑެތި ޚިޔާލު ތަފާތުވުންތަކެއް އުފެދިފައިވާ ދަނޑިވަޅެއްގައެވެ. އެގޮތުން، އަފްޣާނިސްތާނުގެ ސަރުކާރާއެކު ޞުލްޙައިގެ ވާހަކަތައް ކުރިއަށް ގެންދިއުމަށް 5،000 ހަނގުރާމަވެރިން މިނިވަންކުރުމަށް ޠާލިބާނުން ދިޔައީ ބާރުއަޅަމުންނެވެ. ނަމަވެސް މީގެ ކުރިން އަފްޣާނިސްތާނުގެ ސަރުކާރުން ބުނަމުންދިޔައީ އެއްވެސް ހަނގުރާމަވެރިއެއް މިނިވަންކުރެވޭނީ ޞުލްޙައިގެ މޭޒަށް ޠާލިބާނުން އައުމުންކަމަށެވެ. އެޚިޔާލު ތަފާތުވުމުގެ ސަބަބުން މިދިޔަ ފެބުރުއަރީ މަހު އެމެރިކާއާއި ޠާލިބާނުންނާވެފައިވާ ޞުލްހައިގެ އެއްބަސްވުމަށްވަނީ ހިޔަނިއެޅިފައެވެ. މިއީ 18 އަހަރުވެފައިވާ އަފްޣާނިސްތާނުގެ ހަނގުރާމަ ނިންމާލުމާ އެންމެ ކައިރިއަށް އާދެވިފައިވާ ފަހަރެވެ.
އަފްޣާނިސްތާނުގެ ސަރުކާރުން ބުނެފައިވަނީ ހަނގުރާމަވެރިން މިނިވަންކުރުމުގައި ބަލާފައިވަނީ އެމީހުންގެ އުމުރަށާއި ޞިއްޙަތަށާއި ޙުކުމުގައި ބާކީ އޮތް މުއްދަތަށެވެ. މިނިވަންކޮށްފައިވާ ހަނގުރާމަވެރިންގެ ތެރޭގައި ހިމެނެނީ ޠާލިބާނުންގެ ކޮންފަންތިއެއްގެ ބައެއްކަމެއް އަދި ސާފެއް ނުވެއެވެ.