އެމެރިކާގެ ރިޔާސީ އިންތިޚާބުގައި ވާދަކުރެއްވުމަށް ޑިމޮކްރަޓިކް ޕާޓީގެ ޓިކެޓު ހޯއްދެވުމަށް މަސައްކަތް ކުރެއްވި ބާރނީ ސެންޑާރސް ރިޔާސީ ރޭހުން ވަކިވެވަޑައިގެންފިއެވެ. ވާމޮންޓު ސްޓޭޓުގެ ސެނެޓަރު ސޭންޑާރސްގެ ނިންމުން އިޢުލާނުކުރެއްވީ ވީޑިއޯ މެދުވެރިކޮށް އޭނާއަށް ތާޢީދުކުރާ މީހުންނާ މުޚާތަބުކުރައްވާ ވާހަކަ ދައްކަވަމުންނެވެ.
ޑިމޮކްރަޓިކް ޕާޓީގެ ޓިކެޓު ހޯއްދެވުމަށް 78 އަހަރުގެ ސޭންޑާރސް ވާދަކުރައްވަމުން ދިޔައީ ކުރީގެ ނައިބު ރައީސް ޖޯ ބައިޑަންނާއެވެ. ނަމަވެސް ކޯވިޑް-19ގެ ސަބަބުން މިހާރު ކުރިމަތިވެފައިވާ ޙާލަތުގައި އޭނާގެ ސިޔާސަތުތައް އާންމުންނާ ހަމައަށް ފޯރުކޮށްދިނުމުގައި ދަތިތަކެއް ހުރިކަމަށް ވިދާޅުވެ، ރިޔާސީ ރޭސް ކާމިޔާބުކުރެއްވުމުގެ އެއްވެސް އުންމީދެއް ނެތްކަމަށް ސޭންޑާރސް ވިދާޅުވިއެވެ.
ރިޔާސީ ރޭހުން ވަކިވެވަޑައިގަންނަން ނިންމި ނިންމެވުމަކީ އުނދަގޫ އަދި ހިތްދަތި ނިންމެވުމެއްކަމަށް އޭނާ ވިދާޅުވިއެވެ. އަދި ނޮވެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި މިހާރުގެ ރައީސް ޑޮނަލްޑް ޓްރަމްޕް ބަލިކުރެއްވުމަށް ބައިޑަނަށް ތާޢީދުކުރައްވާނެކަމަށްވެސް އޭނާ ވިދާޅުވިއެެވެ.