ތެލުގެ އަގާ ގުޅޭގޮތުން މަޝްވަރާކުރުމަށް ސަޢުދީ އަރަބިއްޔާއާއި ރަޝީޔާއިން ބާއްވަން މަސައްކަތްކުރި މަޝްވަރާތައް ލަސްވެ، ބާޒާރުގައި ތެލުގެ އަގު އަނެއްކާވެސް ދަށަށް ގޮސްފިއެވެ.
ޚަބަރުތައް ބުނާގޮތުން ސަޢުދީއާއި ރަޝިޔާއާ ދެމެދު ބާއްވަން މަސައްކަތްކުރާ މަޝްވަރާތަކަކީ ކޮރޯނާވައިރަސްގެ ސަބަބުން ތެލަށް އޮތް ޑިމާންޑު ދަށްވުމުގެ ސަބަބުން، ތެޔޮ އުފައްދާ މިންވަރު މަދުކުރުމާ ގުޅޭގޮތުން ބާއްވާ މަޝްވަރާތަކެކެވެ.
ކޮރޯނާވައިރަސްގެ ސަބަބުން ދުނިޔޭގެ އިޤްތިޞާދީ ހަރަކާތްތައް ހުއްޓި، ޤައުމުތައް ބަންދުކޮށްފައި އޮތުމުން، ތެލުގެ ޑިމާންޑް ވަރަށް ބޮޑަށް ދަށަށް ގޮސްފައިވާކަމަށް ވިޔަފާރިވެރިން ބުނެއެވެ. އަދި އެކަމުގެ ސަބަބުން ތެޔޮ ނުވިކި، ބާޒާރުގައި ތެޔޮ ވަރަށް ބޮޑަށް އިތުރުވެފައިވާކަމަށް ވިޔަފާރިވެރިން ބުނެއެވެ. މިކަމުގެ ސަބަބުން ތެލުގެ އަގުވަނީ ވަރަށް ބޮޑަށް ދަށަށް ގޮސްފައެވެ.
ތެލުގެ ވިޔަފާރިއަށް ކުރަމުންދާ ނޭދެވޭ އަސަރުތައް ކުޑަކުރުމަށް ޤައުމުތަކުން މަސައްކަތްކުރަމުންދާއިރު، އެކަމުގައި އޮތް އެންމެ ބޮޑު ގޮންޖެހުމަކީ ގިނަ އަދަދަކަށް ތެޔޮ އުފައްދާ ސަޢުދީ ޢަރަބިއްޔާއާއި ރަޝިޔާއާ ދެމެދު އުފެދިފައިވާ ވިޔަފާރީގެ ހަނގުރާމައެވެ. އެއް ބަޔަކު އަނެއް ބަޔަކަށް ދޫ ދިނުމެއް ނެތި ބާޒާރަށް ތެޔޮ ނެރެމުންދިއުމުގެ ސަބަބުން، ދުނިޔޭގެ ބާޒާރުގައި ތެޔޮ ވަނީ ވަރަށް ބޮޑަށް އިތުރުވެ، އަގު ދަށަށް ގޮސްފައެވެ.
ސައުދީއާއި ރަޝިޔާއާ ދެމެދު މައްސަލަތަކެއް އުފެދިގެން އުޅެނީ އަގު ހިފެހެއްޓުމަށްޓަކައި ބާޒާރަށް ނެރޭ ތެޔޮ ވަކި މިންވަރަކަށް މަދުކުރުމަށް ދެ ޤައުމުން ޤާއިމްކުރި އެއްބަސްވުމަކަށް އަމަލުކުރުން ހުއްޓާލުމާ ގުޅިގެނެވެ. އެއްބަސްވުމަށް އަމަލުކުރުން ހުއްޓާލުމާއެކު ބާޒާރަށް ނެރޭ ތެލުގެ މިންވަރު ދެ ޤައުމުންވެސް ވަނީ ވަރަށް ބޮޑަށް އިތުރުކޮށްފައެވެ. ނަމަވެސް ކޮރޯނާވައިރަސްގެ ސަބަބުން ތެލަށް އޮތް ޑިމާންޑު ވަރަށް ބޮޑަށް ދަށްވުމުން، ތެލުގެ އަގުވެސް ވަނީ މިދިޔަ 20 އަހަރުތެރޭގައި ދަށަށް ނުދާ މިންވަރަށް ދަށަށް ދާން ފަށާފައެވެ.
އޭޝިޔާގައި ބާޒާރުގައި ބޭނުންކުރާ ބްރެންޓް ކުރޫޑްގެ އަގު އިއްޔެ 12 އިންސައްތަ ދަށަށް ގޮސްފައިވާއިރު، އެމެރިކާ ބާޒާރުގައި ބޭނުންކުރާ ވެސްޓް ޓެކްސަސް އިންޓަރމިޑިއޭޓްގެ އަގު ވަނީ އިއްޔެ 10 އިންސައްތަ ދަށަށް ގޮސްފައެވެ.
ބާޒާރުގައި ތެލުގެ އަގު ދަށަށް ދާން ފެށުމާއެކު ތެޔޮ އުފައްދާ ބޮޑެތި ޤައުމުތަކުން ވަނީ މަޝްވަރާއަށް ގޮވާލާފައެވެ. އަދި ރަޝިޔާއާއި ސަޢުދީ ޢަރަބިއްޔާއިންވެސް ވަނީ މަޝްވަރާތަކުގައި ބައިވެރިވާނޭކަމުގެ ފެހި ސިގްނަލް ދީފައެވެ. އަދި މިހަފްތާގެ ބުރާސްފަތިދުވަހު ތެޔޮ އުފައްދާ ބޮޑެތި ޤައުމުތަކުގެ މެދުގައި މަޝްވަރާ ބައްދަލުވުމެއް އޮންނާނެކަމަށްވެސް ޚަބަރުތައް ބުނެއެވެ.
ކޮރޯނާވައިރަސްގެ ސަބަބުން ތެލުގެ އަގު ދަށަށް ދާ މައިގަނޑު ސަބަބަކީ، ތެޔޮ އެންމެ ގިނައިން ބޭނުންވާ ދަތުރުފަތުރުކުރުމުގެ ސިނާޢަތް ހުއްޓުމަކަށް އައުމުންނެވެ. ދުނިޔޭގެ އެކި ކަންކޮޅުތަކުގައި ދަތުރުފަތުރުކުރުން ހުއްޓި، ޤައުމުތައް ބަންދުކޮށްފައިވާއިރު، ކާރުހަނާތައްވެސް ބަންދުކުރުމަކީވެސް ތެލަށް އޮތް ޑިމާންޑް ދަށްވުމުގެ ސަބަބެކެވެ.