ސްޕެއިންގައި ކޯވިޑް-19ގެ ސަބަބުން މަރުވި މީހުންގެ ޢަދަދު ވައިރަސް އެންމެ ފުރަތަމަ ފެތުރެންފެށުނު ޗައިނާއަށްވުރެ އިތުރުވެއްޖެއެވެ.
ސްޕެއިންގައި މިހާތަނަށް 49,515 މީހުންނަށް ކޯވިޑް-19 ޖެހިފައިވެއެވެ. އަދި މަރުވި މީހުންގެ ޖުމްލަ ޢަދަދުވަނީ 3,647 މީހުންނަށް އިތުރުވެފައެވެ. އެހެންކަމުން އިޓަލީވިލާތަށްފަހު ވައިރަހުގެ ސަބަބުން ދެން އެންމެ ގިނަ މީހުން މަރުވެފައިވަނީ ސްޕެއިންގައެވެ. އިޓަލީވިލާތުގައި ވައިރަސް ޖެހިގެން 7,503 މީހުންވަނީ މަރުވެފައެވެ. ޗައިނާގައި މަރުވި މީހުންގެ ޢަދަދު މިހާރުވަނީ ތިންވަނައަށް ތިރިވެފައެވެ. ވައިރަހުގެ ސަބަބުން ޗައިނާގައި މަރުވެފައިވަނީ 3,287 މީހުންނެވެ.
ސްޕެއިންގެ ތިން ވަޒީރަކަށް މިހާތަނަށް ކޯވިޑް-19 ޖެހިފައިވެއެވެ. އޭގެ ތެރޭގައި ބޮޑުވަޒީރުގެ ނައިބު ކާމެން ކަލްވޯވެސް ހިމެނިވަޑައިގަންނަވައެވެ. އެކަމަނާގެ ޙާލު ރަނގަޅުކަމަށް އެޤައުމުގެ ސަރުކާރުން ބުނެއެވެ.
މާރޗު މަހުގެ މެދުތެރެއިން ފެށިގެން ސްޕެއިންގައިވަނީ ޞިއްޙީ ކުއްލި ނުރައްކަލުގެ ޙާލަތު އިޢުލާނުކޮށްފައެވެ. އެއާއެކު އެޤައުމުގެ މަދަރުސާތަކާއި ރެސްޓޯރަންޓުތަކާއި ވިޔަފާރިކުރާ މަރުކަޒުތައްވަނީ ބަންދުކޮށްފައެވެ. ޞިއްޙީ ކުއްލި ނުރައްކަލުގެ ޙާލަތު އިތުރު 15 ދުވަހަށް އިތުރުކުރަން އެޤައުމުގެ ޤާނޫނުހަދާ މަޖިލީހުންދަނީ މަޝްވަރާކުރަމުންނެވެ. ސަރުކާރާ އިދިކޮޅު ފަރާތްތަކުންވެސްވަނީ ޞިއްޙީ ކުއްލި ނުރައްކަލުގެ ޙާލަތުގެ މުއްދަތު އިތުރުކުރުމަށް ތާޢީދުކޮށްފައެވެ.