ކޯވިޑް-19 ޖެހިގެން ފުރަތަމަ ފަހަރަށް ސަޢުދީ ޢަރަބިއްޔާގައި މީހަކު މަރުވެއްޖެއެވެ.
ސަޢުދީ ޢަރަބިއްޔާގެ ޞިއްޙަތާބެހޭ ވުޒާރާގެ ތަރުޖަމާނު މުޙައްމަދު ޢަބްދުލްޢަލީ ވިދާޅުވީ ކޯވިޑް-19 ޖެހިގެން މަރުވެފައިވަނީ 51 އަހަރުގެ އަފްޣާނިސްތާނު ރައްޔިތެއްކަމަށެވެ. އޭނާ މަރުވީ މަދީނާގައި ފަރުވާދެމުންދަނިކޮށްކަމަށް މުޙައްމަދު ޢަބްދުލްޢަލީ ވިދާޅުވިއެވެ.
ކޯވިޑް-19އާ ދެކޮޅަށް ސަޢުދީ ޢަރަބިއްޔާއިން ގިނަ ފިޔަވަޅުތަކެއް އަޅާފައިވެއެވެ. އެގޮތުން މާތްވެގެންވާ މަސްޖިދުލްޙަރަމާއި މަސްޖިދުންނަބަވީގައި ނަމާދުކުރުންވަނީ މެދުކަނޑާލާފައެވެ. އަދި އުމްރާގެ އަޅުކަންވެސްވަނީ މެދުކަނޑާލާފައެވެ. އޭގެ އިތުރުން އެޤައުމުގެ އެހެން މިސްކިތްތައް ބަންދުކޮށް، އެޤައުމަށްކުރާ ބައިނަލް އަޤްވާމީދަތުރުތައްވަނީ ހުއްޓާލާފައެވެ. އަދި މަދަރުސާތަކާއި ވިޔަފާރި މަރުކަޒުތަކާއި ރެސްޓޯރަންޓުތައްވެސްވަނީ ބަންދުކޮށްފައެވެ. އަދި ރޭގަނޑުގެ ވަގުތުތަކުގައި ބޭރުތެރެއަށް ނުކުމެނޫޅެވޭގޮތަށް 21 ދުވަހުގެ ކާފިއުއެއްވަނީ އިޢުލާނުކޮށްފައެވެ.
ކޯވިޑް-19 ޖެހިފައިވާ 767 މީހުން މިހާތަނަށް ސަޢުދީ ޢަރަބިއްޔާއިން ފެނިފައިވެއެވެ.