ކޯވިޑް-19ގެ ޙާލަތާއި ގުޅިގެން ސްޓޭޓް އިލްކްޓްރިކް ކޮމްޕެނީ (ސްޓެލްކޯ)އިން ކަރަންޓު ބިލުތައް ދެން ފޮނުވަމުން ގެންދާނީ އެސްއެމްއެސް މެދުވެރިކޮށްކަމަށް އެކުންފުނިން ވިދާޅުވެއްޖެއެވެ.
ސްޓެލްކޯއިންދަނީ މާލޭގެ ސާޅިސް ހަތަރުހާސް ހަތްސަތޭކަ ކަސްޓަމަރުންނަށް ކަރަންޓު ފޯރުކޮށްދެމުންނެވެ. ސްޓެލްކޯއިން ވިދާޅުވެފައިވަނީ މޯބަލް ނަންބަރު ދީފައިވާ ހުރިހާ ކަސްޓަަމަރުންނަށްވެސް ބިލް ފޮނުވާނީ އެސްއެމްއެސްއާއި ސްޓެލްކޯގެ މޯބައިލް އެޕްލިކޭޝަން މެދުވެރިކޮށްކަމަށެވެ.
ނަމަވެސް ގުޅޭނެ ފޯނު ނަންބަރު ނެތް 3700 ކަސްޓަމަރުންނަށް ފޮނުވާނީ ޕްރިންޓުކޮށްފައިވާ ބިލެވެ. ކޯވިޑް-19ގެ ޙާލަތާއި ގުޅިގެން މީގެކުރިން ސްޓެލްކޯއިންވަނީ ކަސްޓަމަރުންގެ ގެތަކުގެ މަތީ ފަންގިފިލާތަކަށް ބިލް ގެންގޮސްދިނުންވެސް ހުއްޓާލާފައެވެ. އަދި މި ބަދަލާއިއެކުވެސް ޕްރިންޓެޑް ބިލް ގެންދާ ގެތަކުގެ ބިލް ފޮނުވާނީ އިމާރާތުގެ އެންމެ ތިރީ ފަންގިފިލާއަށްކަމަށް ސްޓެލްކޯއިން ވިދާޅުވެއެވެ.
ކޯވިޑް-19އާ ގުޅިގެން މިދުވަސްވަރަކީ އެއްވުންތައް ވީހާވެސް މަދުކުރުން އިލްތިމާސްކުރާ ދުވަސްވަރަކަށްވާތި، ބިލް ދެއްކުމުގެ ކަންކަން ކުރިއަށްގެންދިއުމަށް ސްޓެލްކޯއިން އިލްތިމާސްކުރަނީ ސްޓެލްކޯގެ މޯބައިލް އެޕްލިކޭޝަން މެދުވެރިކޮށް އޮންލައިންކޮށެވެ.