ރާއްޖެއަށް ބިދޭސީން ގެނައުމަށް ދޭ ހުއްދައާއި ގުޅޭ މަސައްކަތްތައް ކުރުމަށް ބޭނުންކުރާ އެކްސްޕެޓް އޮންލައިން ސިސްޓަމް މެދުވެރިކޮށް ދެމުންގެންދާ ޚިދުމަތްތައް އިކޮނޮމިކް މިނިސްޓްރީން ވަގުތީ ގޮތުން މެދުކަނޑާލައިފިއެވެ.
އިކޮނޮމިކް މިނިސްޓްރީން ވިދާޅުވީ މިހުގެ 19އިން 26 އަށް ސަރުކާރު ބަންދުވުމާ ގުޅިގެން، އެ މިނިސްޓްރީން ދެމުންދާ އެކްސްޕެޓް އޮންލައިން ސިސްޓަމްގެ ޚިދުމަތް މެދުކަނޑާލާފައިވާކަމަށެވެ.
އެހެންނަމަވެސް، މި ދަނޑިވަޅުގައި ބައެއް ފަރާތްތަކަށް ރާއްޖޭގައި މަސައްކަތް ކުރުމަށް ދޫކޮށްފައިވާ ހުއްދަ (އެމްޕްލޯއިމަންޓް އެޕްރޫވަލް) ގެ މުއްދަތު ހަމަވެއްޖެނަމަ، އެކަމުގައި ދަތިތައް ކުރިމަތިވާނެތީ، މިިމަހުގެ 22ވަނަ ދުވަހުން ފެށިގެން މިމަހުގެ 26ވަނަ ދުވަހުގެ ނިއަލަށް މިޚިދުމަތް ލިބޭނޭ އިންތިޒާމް ހަމަޖެހިފައިވާ ކަމަށް އިކޮނޮމިކް މިނިސްޓްރީން މަޢުލޫމާތުދެއެވެ. އެގޮތުން މިމުއްދަތުގެ ތެރޭގައި ކޮންމެ ދުވަހަކު ހެނދުނު 10:00 އިން މެންދުރު 12:00 އަށް އެކްސްޕެޓް އޮންލައިން ސިސްޓަމް މެދުވެރިކޮށް 'ކޯޓާ އެކްސްޓެންޝަން' އަދި 'އެމްޕްލޯއިމަންޓް އެޕްރޫވަލް އެކްސްޓެންޝަން' އެޕްލިކޭޝަން ހުށަހެޅުމުގެ އިންތިޒާމް ހަމަޖެހިފައިވާ ކަމަށް އެމިނިސްޓްރީން ހާމަކުރެއެވެ.
އެކްސްޕެޓް އޮންލައިން ސިސްޓަމަކީ އޮންލައިންކޮށް އެޕްލިކޭޝަން ހުށަހެޅުމާއި އަދި ބިދޭސީން ގެނައުމާއި ގުޅޭ ކޯޓާ އާއި އެންޕްލޯއިމަންޓް އެޕްރޫވަލް އަށް އެޕްލައި ކުރުމަށް ހަދާފައިވާ ސިސްޓަމެކެވެ.