ކޯވިޑް-19އާ ދެކޮޅަށް ދުރުމުއްދަތަށް އަމާޒުކޮށް ސިންގަޕޫރުން ފިޔަވަޅުތަކެއް އަޅަން ފަށައިފިއެވެ.
ސިންގަޕޫރުން 385 މީހަކަށް ކޯވިޑް-19 ޖެހިފައިވެއެވެ. އޭގެ ތެރެއިން 40 މީހުންނަކީ މިދިޔަ ހުކުރު ދުވަހު ވައިރަސް ޖެހުނު މީހުންނެވެ. އަލަށް ކޯވިޑް-19 ޖެހުނު ސާޅީސް މީހުންގެ ތެރެއިން ގިނަ މީހުންނަށް ވައިރަސް ޖެހިފައިވަނީ އިނގިރޭސިވިލާތުންނެވެ.
ކޯވިޑް-19 ފެތުރުން ހުއްޓުވުމަށް ސިންގަޕޫރުގެ ޞިއްޙަތާބެހޭ ވުޒާރާއިން އެޅި ފިޔަވަޅުތަކުގެ ތެރޭގައި ޢާންމުންގެ މެދުގައި އިޖުތިމާޢީ ގައިދުރުކަން ބެހެއްޓުމަށް އަމުރުކުރުމާއި 250އަށްވުރެ ގިނަ މީހުން ހިމެނޭ އެއްވުންތައް ބޭއްވުން މަނާކުރުން ހިމެނެއެވެ އަދި ގޭގައި ތިބެގެން ވަޒީފާ އަދާކުރެވޭނެގޮތް ހެދުމަށާއި އެނޫން ޙާލަތްތަކުގައި މަސައްކަތުގެ ގަޑި މަދުކުރުމަށްވެސް ސިންގަޕޫރުގެ ޞިއްޙަތާބެހޭ ވުޒާރާއިންވަނީ އަންގާފައެވެ.
ކޯވިޑް-19އާ ގުޅިގެން ސިންގަޕޫރަށް ވަދެނުކުތުން މަނާކޮށް، ބޭރަށް ނުކުތުން މަނާކުރަން ނިންމާފައިނުވާކަމަށް އެޤައުމުގެ ސަރުކާރުން ބުނެފައިވެއެވެ. އަދި ކޯވިޑް-19 ޖެހިފައިވާ މީހުންނާ މުޢާމަލާތްކުރިކަން ކަށަވަރުވާ މީހުންނާއި އެކަމަށް ޝައްކުކުރެވޭ މީހުން ދެނެގަތުމަށް ފޯނު އެޕެއް އުފައްދާނެކަމަށްވެސް އެޤައުމުގެ ޞިއްޙަތާބެހޭ ވުޒާރާއިންވަނީ އިޢުލާނުކޮށްފައެވެ.