ސަރުކާރުގެ އެންގުމަކާއި ނުލާ، ކޯވިޑް 19އާއި ގުޅިގެން ރަށްރަށަށް މީހުން އަރާ ފޭބުން މަނާ ނުކުރުމަށް ލޯކަލް ގަވަރމަންޓް އޮތޯރިޓީން ކައުންސިލްތަކަށް އަންގައިފިއެވެ.
ލޯކަލް ގަވަރމަންޓް އޮތޯރިޓީން ބުނެފައިވަނީ ކޯވިޑް-19އާއި ގުޅިގެން ބައެއް ރަށްރަށުގެ ކައުންސިލުން އެރަށްތަކަށް އަރާ ފޭބުން މަނާކުރަމުންދާކަމުގެ ޝަކުވާ އެ އޮތޯރިޓީއަށް ލިބެމުންދާކަމަށެވެ.
މިކަމާއި ގުޅިގެން އެލްޖީއޭއިން ކައުންސިލްތަކަށް ފޮނުވާފައިވާ ސަރކިއުލަރއެއްގައި ބުނެފައިވަނީ، ސިއްޙީ ކުއްލި ނުރައްކަލުގެ ޙާލަތުގައި ނިންމުންތައް ނިންމުމަށް ޤާނޫނީގޮތުން ބާރު ލިބިދީފައިވާ ފަރާތުން، އެއްވެސް ރަށަކަށް މީހުން އަރާ ފޭބުން މަނާކުރުން ފަދަ އެއްވެސް ނިންމުމެއް ނުނިންމާހާ ހިނދަކު ކައުންސިލްތަކުން އަމިއްލައަށް އެފަދަ ނިންމުންތައް ނުނިންމުމަށް އަންގާކަމަށެވެ.
ރާއްޖޭގެ އެކި ތަންތަނަށް ދަތުރުފަތުރުކޮށް އުޅުމަކީ ޤާނޫނު އަސާސީގެދަށުން ކޮންމެ މީހަކަށްވެސް ލިބިދީފައިވާ ޙައްގެކެވެ. މިޙައްގުގެ އެއްވެސް މިންވަރެއް ހިފެހެއްޓޭނީ ޤާނޫނު އަސާސީއާއި ތަޢާރުޒްނުވާ ގޮތެއްގެ މަތިން، ރައްޔިތުންގެ މަޖިލީހުން ފާސްކުރާ ޤާނޫނަކުންކަމަށް ޤާނޫނު އަސާސީގައި ބުނެފައިވެއެވެ. ނަމަވެސް ސިއްޙަތު ރައްކާތެރިކުރުމުގެ ޤާނޫނުގެދަށުން، ކުއްލި ޙާލަތެއް މެދުވެރިވެއްޖެނަމަ ދަތުރުކުރުން ހުއްޓުވުން ނުވަތަ ކޮންޓްރޯލްކުރުމަށް ފިޔަވަޅުއެޅުމުގެ ބާރު ޑިރެކްޓަރ ޖެނެރަލް އޮފް ޕަބްލިކް ހެލްތައް ލިބިގެންވެއެވެ.
ނަމަވެސް މިހާތަނަށް މިފަދަ ޙާލަތެއް ސަރުކާރުން އިޢުލާންކޮށްފައި ނުވާތީ، އެއްވެސް ރަށެއްގެ ކައުންސިލުން އެރަށަކަށް މީހުން އެރުން ނުހުންޓުވުމަށް އެލްޖީއޭއިންވަނީ އަންގާފައެވެ.
ކޯވިޑް 19އާއި ގުޅިގެން މިހާތަނަށް ރަށަށް އަރާފޭބުން ކޮންޓްރޯލްކުރީ ރިސޯޓުތަކުގައެވެ. މިހާތަނަށް އާއްމުން ދިރިއުޅޭ ރަށަކަށް މީހުން އަރާ ފޭބުން ސަރުކާރުން މަނާކޮށްފައެއް ނުވެއެވެ.