ޕާކިސްތަނުގެ ބާޒާރުތަކުން މާސްކު ހުސްވެ ސެނިޓައިޒާފަދަ ތަކެތީގެ އަގު ވަރަށް ބޮޑަށް އުފުލިއްޖެއެވެ. ކޯވިޑް-19 ފެތުރެންފެށުމުން އެޤައުމުގެ ސަރަޙައްދީ ރޮނގުތަކާއި މަދަރުސާތައް މިހާރުވަނީ ބަންދުކޮށްފައެވެ.
ވައިރަސް ފެތުރުން ހުއްޓުވުމަށް އެޤައުމުންވަނީ ބައިނަލްއަޤްވާމީ ވައިގެ ދަތުރުތައް މަދުކޮށް ޢާންމުން އެއްވެ ނޫޅުމަށް ނަސޭހަތްތެރިވެފައެވެ. ކޯވިޑް-19ގެ އަސަރު އެންމެ ބޮޑަށް ކޮށްފައިވާ ދެޤައުމުކަމަށްވާ ޗައިނާއާއި އީރާނާއެކު ޕާކިސްތާނުން ސަރަޙައްދީ ރޮނގު ޙިއްޞާކުރެއެވެ. އެޤައުމުން މިހާތަނަށް ވައިރަހުގެ އަސަރުކޮށްފައިވާ 33،000 މީހުން ފެނިފައިވެއެވެ. އޭގެ ތެރެއިން ގިނަ މީހުންނަކީ އީރާނަށް ދަތުރުކޮށްފައިވާ މީހުންނެވެ.
ދެކުނު އޭޝިޔާގެ ގިނަ ޤައުމުތަކެކޭ އެއްގޮތަށް ޕާކިސްތާނަކީވެސް އެހާ ހަރުދަނާ ޞިއްޙީ ނިޡާމެއް އޮންނަ ޤައުމެއް ނޫނެވެ. ކޯވިޑް-19ފަދަ ބައްޔެއް އެޤައުމުގައި ހަލުވިކަމާއެކު ފެތުރެންފަށައިފިނަމަ ޕާކިސްތާނާކީ އެވައިރަހާ ދެކޮޅަށް މަސައްކަތްކުރުމަށް ފުރިހަމައަށް ތައްޔާރަށް އޮތް ޤައުމެއް ނޫނެވެ.
ދުނިޔޭގެ ޞިއްޙަތު ޖަމްޢިއްޔާ ޑަބްލިއުއެޗްއޯއިންވަނީ ސަލާމަތް ޞިއްޙަތުގައި ތިބި މީހުން މާސްކު ނުގަންނަން އިރުޝާދުދީފައެވެ. އޭގެ ބަދަލުގައި ބަލިމީހުނަށް މާސްކު ޚާއްޞަކުރުމަށްދަނީ ގޮވާލަމުންނެވެ. ނަމަވެސް ދެކުނު ކޮރެޔާފަދަ ޤައުމުތަކުން ދަނީ ޢާންމުން މާސްކު ބޭނުންކުރުމަށް ހިތްވަރުދެމުންނެވެ.
ޞިއްޙީ މާހިރުންވަނީ ބޭނުންކޮށްފައިވާ މާސްކު ނައްތާލުމުގައި ފަރުވާކުޑަކުރާނަމަ ވައިރަސް ފެތުރުމުގެ ފުރުޞަތު ބޮޑުވާނެކަމަށް ބުނެފައެވެ.