ކޯވިޑް-19ގެ ސަބަބުން ކުރިމަތިވާ އިޤުތިޞާދީ ހީނަރުކަން ކުޑަކުރުމަށް ވިލާތުން 37 ބިލިއަން ޔޫރޯ ޚަރަދުކުރަނީ
ކޯވިޑް-19ގެ ސަބަބުން ވިލާތުގެ އިޤުތިޞާދަށް ކުރިމަތިވާ ހީނަރުކަން ކުޑަކުރުމަށް 37 ބިލިއަން ޔޫރޯ ޚަރަދުކުރުމަށް ވިލާތުގެ އިއްތިޙާދުން ނިންމައިފިއެވެ.
އެއިޢުލާނު ކުރައްވަމުން ޔޫރަޕިޔަން ކޮމިޝަންގެ ރައީސް އުރުސުލާ ވޮން ޑާ ލެޔެން ވިދާޅުވީ މިއީ ވައިރަހުގެ ސަބަބުން ވިލާތުގެ އިޤްތިޞާދަށް ކުރިމަތިވާ ކުއްލި އަސަރު ކުޑަކުރުމަށް އަޅާ ފިޔަވަޅެއްކަމަށެވެ. ކޯވިޑް-19އާ ގުޅިގެން ބަޖެޓު ދެކޮޅު ޖައްސަން ނުކުޅެދޭ ވިލާތުގެ ޤައުމުތަކަށް މާލީ އެހީ ލިބޭނެކަމަށާއި ވިލާތުގައި ވައިރަހުގެ އަސަރު އެންމެ ބޮޑަށްކޮށްފައިވާ އިޓަލީވިލާތްފަދަ ޤައުމުތަކުން ކުރަންޖެހޭ ޚަރަދުތައް ކުރަން ފަސޭހަވާނެކަމަށްވެސް އޭނާ ވިދާޅުވިއެވެ.
މީގެ އިތުރުން ކޯވިޑް-19ގެ ސަބަބުން ގެއްލުން ލިބޭ ވިލާތުގެ ސަތޭކަހާހަށްވުރެ ގިނަ ކުންފުނިތަކަށްވެސް މާލީ އެހީ ދިނުމަށް ވިލާތުގެ އިއްތިޙާދުން ނިންމާފައިވެއެވެ. ވިލާތުގެ ޤައުމުތަކުގައި ކޯވިޑް-19 ފެތުރެމުންދާތީ ފަތުރުވެރިކަމާއި ރީޓެއިލް ވިޔަފާރިއާއި ދަތުރުފަތުރާއި ހޮޓާ ރެސްޓޯރެންޓުފަދަ ވިޔަފާރިތަކުގައި ޙަރަކާތްތެރިވާ ކުންފުނިތަކުގެ ވިޔަފާރި ދައްވުމުގެ ސަބަބުން މާލީ ބޮޑެތި ގެއްލުންތަކެއް އެކުންފުނިތަކަށްދަނީ ލިބެމުންނެވެ.