ކޯވިޑް-19: މެލޭޝިއާ އިން އައި ދިވެއްސެއްގެ ކިބައިން އަލާމާތްތައް ފެންނާތީ ފަރުކޮޅަށް ގެންނަނީ
މެލޭޝިއާއިން ރާއްޖެއައި ދިވެއްސެއްގެގައިން ކޯވިޑް-19އަށް ޝައްކު ކުރެވޭ އަލާމާތްތަކެއް ފެންނާތީ އޭނާ ކަރަންޓީން ކުރުމަށް ފަރުކޮޅު އައިސޮލޭޝަން ފެސިލީޓީއަށް ގެންދިޔުމުގެ މަސައްކަތް ކުރަމުންގެންދާކަމުގައި އެޗްޕީއޭއިން ވިދާޅުވެއްޖެއެވެ.
އެޗްޕީއޭއިން ވިދާޅުވީ އޭނާ ފަރުކޮޅަށް ގެންގޮސް ކަރަންޓީން ކުރަނީ އޭނާގެ ކިބައިން ކޯވިޑް-19އަށް ޝައްކު ކުރެވޭ އަލާމާތްތަކެއް ފެންނަމުންދާތީ ޓެސްޓް ކުރުމަށް ކަމަށެވެ.
އަދި އޭނާއަކީ، މެލޭޝިޔާގައި ކޮވިޑް-19އަށް ޕޮޒިޓިވްވި މީހަކާއި އެކު އެއްއިމާރާތެއްގައި ދިރިއުޅުމަށްފަހު ރާއްޖެއަށް އައިސްފައިވާ މީހެއްކަމުގައިވެސް އެޗްޕީއޭން ވިދާޅުވެފައިވެއެވެ.
މިހާރު ފަރުކޮޅަށް ގެންނަނީ، ކޮވިޑް-19އަށް ޝައްކު ކުރެވޭ އަލާމާތްތައް ފެންނަ މީހުންނާއި، ބައްޔަށް ޕޮޒިޓިވްވާ މީހުންނެވެ.
ރާއްޖެއިން މިހާތަނަށް 8 މީހުން ކޯވިޑް-19އަށް ޕޮޒިޓިވްވެފައި ވާއިރު އޭގެ ތެރޭގައި ދިވެއްސަކު ނުހިމެނެއެވެ، އަދި ކޮވިޑް-19 އަށް ޕޮޒިޓިވްވި މީހުންނާއި ބައްދަލުވެ އެވައިރަހުގެ އަލާމާތްތައް ކަމުގައި ބެލެވިދާނެ އަލާމާތްތަކެއް ފެނިގެން ޓެސްޓްކުރި ދެދިވެހިންވެސް އެވައިރަހަށް ނެގަޓިވް ވެފައިވެއެވެ.