މާސްކް ބޭނުންކުރަންޖެހޭ އުސޫލުތަކާއި ޚިލާފަށް މާސްކު ބޭނުންކުރުމަކީވެސް ރައްކާތެރި ކަމެއްނޫންކަމަށް އައިޖީއެމް ހޮސްޕިޓަލް އެތެރެހަށީގެ ޚާއްސަ ޑޮކްޓަރު ޑރ. މޫސާ މުރާދު ވިދާޅުވެއްޖެއެވެ.
ޑރ. މޫސާ މުރާދު ވިދާޅުވީ ކޮންމެހެން މާސްކް އަޅަންޖެހޭ މީހުންކަމަށް ޑޮކްޓަރުން އިރުޝާދު ދޭ، މީހުން ފިޔަވައި އެހެން މީހުން މާސްކު އެޅުން މުހިންމު ނޫންކަމަށެވެ.
ކޮރޯނާ ވައިރަހުން ރައްކާތެރިވުމަށްޓަކައި ކުރަންޖެހޭ އެންމެ މުހިންމުކަމަކީ އަންގައާއި، ނޭފަތާއި ލޮލުގެ ޒަރިއްޔާއި އެ ވައިރަސް ހަށިގަނޑުގެ ތެރެއަށް ވަނުން ހުއްޓުވުމެކެވެ. މިކަމަށްޓަކައި އެންމެ ފަސޭހައި ބޭނުންކުރެވޭ އާލާތަކަށް ވެފައިވަނީ ސަރޖިކަލް މާސްކެވެ.
ރާއްޖެއިން ކޮރޯނާ ވައިރަސް ފެނުމާއިއެކު މާސްކުގެ ޑިމާންޑް ބޮޑުވެ ބޭސް ފިހާރަތަކުން ވަނީ މާސްކު ލިބުން ދަތިވެފައެވެ. ނަމަވެސް މާސްކާއި ގުޅިގެން ސިއްޙީ އެހީތެރިންގެ ޚިޔާލު ކޮންމެވެސް ވަރަކަށް ތަފާތެވެ.
ކޮރޯނާ ވައިރަހުގެ އަސަރު ކުރަނީ ބަލިމީހާއާއި ކޮންޓެކްޓްވާ މީހުންނަށެވެ. އެގޮތުން ވައިރަސް އެހެން މީހުންނަށް އެރުމުގެ ފުރުސަތު ބޮޑީ ވައިރަސް ހުންނަ މީހާ ކެއްސާ ކިނބިހި އަޅާއިރު 6ފޫޓް ކައިރި ސަރަޙައްދެއްގައި ހުންނަ މީހަކަށެވެ.
ކޮންމެހެން މާސްކު އެޅުން މުހިންމު މީހުންނަނީ ކޮރޯނާ ވައިރަސް ހަށިގަނޑުގައި ހުންނަ މީހާ، އެމީހާއަށް އެހީރެވެދޭ މީހާ، އަދި އެމީހާއަށް ސިއްޙީ ފަރުވާދޭ މީހުންނެވެ.
މިފަރާތްތައް ފިޔަވައި އާއްމު ދިރިއުޅުމުގައި ދުޅަހެޔޮ ސިއްޙަތުގައި ހުންނަ މީހާ މާސް އެޅުން މުހިންމު ނޫންކަމަށް ޑަބްލިއު.އެޗް.އޯ.އިން ލަފާދެއެވެ.
ނަމަވެސް ކެއްސާ ކިނބިހި އަޅާނަމަ، ނުވަތަ ނޭވާލާ ނިޒާމުގެ ބަލި ހުންނަ މީހުންނާއި، ދިފާއީ ނިޒާމު ބަލިކަށި މީހުން، މީހުން ގިނައިން އެއްވެ އުޅޭ ތަންތަނަށް ދިއުމުގައި މާސްކު ބޭނުންކުރުމަކީ މުހިންމު ކަމެކެވެ.
މާސްކް އެޅުމާއި ގުޅޭގޮތުން އަައިޖީއެމް ހޮސްޕިޓަލްގެ އެތެރެހަށީގެ ޚާއްސަ ޑޮކްޓަރު ޑރ. މޫސާ މުރާދު ވިދާޅުވީ މާސްކަކީވެސް ވަކި އުސޫލެއްގެ ދަށުން ބޭނުންކުރަންޖެހޭ އެއްޗެކެވެ. މާސްކް ބޭނުންކުރަންޖެހޭ ގޮތް ނޫން ގޮތަކަށް މާސްކު ބޭނުންކުރުމަކީވެސް އޭގައި އެއިން ބަލިފެތުރިދާނެ ކަމެއްކަމަށް ޑރ މުރާދު ފާހަގަކޮށްފައިވެއެވެ.
"ކިރިޔާވެސް މާސްކުގައި އަތް ޖެހިއްޖެއްޔާ އެ މާސްކު ނަގާ އެއްލާލަން ޖެހޭ. މި ހުރިހާ ޕްރިކޯޝަން ނެގިދާނެތޯ؟ އެވަރަށް ނުބެލޭކަމަށްވަންޏާ ބައްޔަށް ދޭން ޖެހޭ ސަމާލްކަން ނުދެވި ބަލި އިތުރަށް ފެތުރިދާނެކަމަކަށްވެދާނެ. ކިރިއާވެސް މާސްކް ބޭރުގައި އަތް ޖެހިއްޖެއްޔާ އެ މާސްކް އެއްލާލާ އާ މަސްކެއް އަޅަންޖެހޭ. މި ސަމާލްކަންދީގެން އަޅުގަނޑުމެންނަށް މާސްކް ބޭނުމެއް ނުކުރެވެ. އެހެންވެ ޑަބްލު އެޗްއޯއިން ލަފާދެނީ ބަލިމީހާ ކައިރީ އުޅޭމީހުން ނޫން މީހުން ކޮންމެހެން މާސްކް އަޅުން މުހިންމު ނޫންކަމަށް." ޑރ.މުރާދު ވިދާޅުވިއެވެ.
މިގޮތުން ބައްޔަށް ޕޮސިޓިވްވި މީހަކު ގޮސްފައިވާ ތަނަކަށް ދިޔަ މީހެއް ނަމަވެސް، ބަލިމީހާއާއި ކޮންޓެކްޓް ނުވާ މީހެއްނަމަ އެމީހާއާކީ ޝައްކުކުރެވޭ މީހެއްގެ ގޮތުގައި ކަނޑައެއް ނާޅާނެއެވެ. އަދި މިފަދަ މީހަކަށް ބަލިމީހާގެ ކިބައިން ބަލި އެރުމުގެ ފުރުސަތެއް ނޯންނާނެއެވެ.
މާސްކު އެޅުމުގެ ބަދަލުގައި ޑޮކްޓަރުން ލަފާދެނީ ސައިބޯނި ލައިގެން ގިނަގިނައިން އަތް ދޮވުމަށެވެ. ޙާއްސަކޮށް ބޭރުގައި އުޅޭ އުޅުމުގައި މޫނުގައި އަތް ނުލުމަކީ ޚާއްސަ ސަމާލްކަންދޭންޖެހޭ ކަމެކެވެ.