2014ވަނަ އަހަރުގެ ޖުލައި މަހުގެ 24ވަނަ ދުވަހު ނެދަލޭންޑްސްގެ އެމްސްޓާޑެމުން މެލޭޝިޔާގެ ވެރިރަށް ކުއަލަ ލަމްޕޫރަށް ދަތުރުކުރި މެލޭޝިޔާ އެއަރލައިންސްގެ އެމްއެޗު-17 ވައްޓާލުމުގައި ބައިވެރިވިކަމުގެ ތުހުމަތުގައި 4 މީހެއްގެ މައްޗަށް ދަޢުވާކޮށް ޝަރީޢަތް ފަށައިފިއެވެ.
ޔުކްރެއިން މަތިން އެބޯޓު ވައްޓާލިތާ ފަސް އަހަރު ފަހުން ނެދަލޭންޑްސްގައި ފެށި ޝަރީޢަތުގައި ދަޢުވާ ރައްދުވާ ހަތަރު މީހުން ބައިވެރިވާން ދެކޮޅު ހަދައެވެ. ނަމަވެސް އެމީހުންގެ ޣައިރު ހާޒިރުގައި ޝަރީޢަތް ކުރިއަށްދާނެއެވެ. ބެލެވޭ ގޮތުގައި ހަތަރު މީހުންވެސް މިވަގުތު ތިބީ ރަޝިޔާގައެވެ.
ރަޝިޔާގެ ތިން ރައްޔިތަކާއި ޔުކްރެއިނުގެ ރައްޔިތެއް އެމްއެޗު-17 ވައްޓާލުމަށް ރަޝިޔާގެ މިސައިލް ސިސްޓަމެއް ބޭނުންކޮށްފައިވާކަމަށް ދަޢުވާކުރާ ފަރާތުން ތުޙުމަތުކުރެއެވެ. އެމްސްޓާޑެމުން ކުއަލަ ލަމްޕޫރަށް ދަތުރުކުރި މަތިންދާބޯޓުގައި 298 މީހުން ތިއްބެވެ. އެޙަމަލާގައި ބޯޓުގައި ތިބި އެންމެންވަނީ މަރުވެފައެވެ. އެޙަމަލާގައި އެޤައުމުގެ އެއްވެސް ބައިވެރިވުމެއް ނުވާކަމަށް ރަޝިޔާއިން ބުނެއެވެ.
ޝަރީޢަތުގެ ފުރަތަމަ އަޑުއެހުމުގައި ފަނޑިޔާރުވަނީ ދަޢުވާ ރައްދުވާ މީހުން ވަކީލުން ޢައްޔަނުކޮށްފައިވޭތޯ ސާފުކޮށްފައެވެ. އަދި ޝަރީޢަތް ކުރިއަށް ގެންދާނެގޮތުގެ ތާވަލެއްވަނީ އެކުލަވާލާފައެވެ.
ނެދަލެންޑްސުން އިސްވެ އެކުލަވާލާފައިވާ ގުޅިފައިވާ ބައިނަލްއަޤުވާމީ ތަހުޤީޤު ޓީމުންވަނީ 5 އަހަރު ވަންދެން އެމައްސަލަ ތަޙުޤީޤުކޮށް ތުޙުމަތުކުރެވޭ ހަތަރު މީހުންނާ ދެކޮޅަށް ހެކި އެއްކޮށްފައެވެ.