ސިންގަޕޫރުގެ ކުންފުންޏަކުން މާލެ އަތޮޅުގައި ތަރައްޤީކުރާ ފަރި އައިލެންޑްސް ރިސޯޓު މިއަހަރު ފަހުކޮޅު ހުޅުވުމަށް ނިންމައިފިއެވެ.
ސިންގަޕޫރުގެ ޕޮންޓިއާކް ކުންފުނިން އިންޓަރގްރޭޓަޑް ރިސޯޓު ކޮންސެޕްޓަށް ތަރައްޤީކުރާ ފަރި އައިލެންޑްސްގައި ތިން ރިސޯޓެއް ހިމެނޭނެއެވެ. އެއީ ދުނިޔޭގެ އެންމެ ބޮޑު ހޮޓާ ޗެއިން ކަމަށްވާ މެރިއޮޓް އިންޓަނޭޝަނަލްގެ ބްރޭންޑެއް ކަމަށްވާ ރިޓްޒް ކާލްޓަންގެ ހޮޓަލަކާއި، ކަޕެލާ ހޮޓެލްސް އެންޑް ރިސޯޓްސްއިން ހިންގުމަށް ހަމަޖެހިފައިވާ ރިސޯޓެއްގެ އިތުރުން ޕެޓީނާ ހޮޓެލްސް އެންޑް ރިސޯޓްސްއިން ހިންގުމަށް ހަމަޖެހިފައިވާ ރިސޯޓެކެވެ.
މި ތިން ރިސޯޓުންވެސް ފަތުރުވެރިންނަށް ތަފާތު ތަޖުރިބާތައް ކޮށްލުމުގެ ފުރުސަތު ލިބިގެންދާނެ ކަމަށް ޕޮންޓިއާކުން ބުނެއެވެ.
ފަރި އައިލެންޑްސްގައި ފަރި މެރީނާގެ ނަމުގައި ބީޗު ކުލަބަކާއި، ފިހާރަތަކާއި، ރެސްޓޯރެންޓުތަކުގެ ޙިދުމަތް ރިސޯޓަށް ޒިޔާރަތްކުރާ ފަރާތްތަކަށް ލިބޭނެ ކަމަށްވެސް ޕޮންޓިއާކުން ބުނެއެވެ.
ފަރި އައިލެންޑްސް ތަރައްޤީކޮށްފައިވަނީ ކ. ރަށްފަޅު ހުރާ ފަޅުގައެވެ.