ޓައިނީ ހާރޓްސް އޮފް މޯލްޑިވްސް އާއި އާސަންދަ ގުޅިގެން އަންނަ ހޮނިހިރު ދުވަހުން ފަށަން ނިންމާފައިވާ "ކެއަރ ފޮރ ޓައިނީ ހާރޓްސް" ހަރަކާތް ކެންސަލް ކޮށްފިއެވެ.
ޓައިނީ ހާރޓްސްއިން މަޢުލޫމާތު ދޭގޮތުގައި މި މަހުގެ 17 އިން 19 އަށް އޭޑީކޭ ހޮސްޕިޓަލްގައި ބޭއްވުމަށް ހަމަޖެހިފައިވާ ހަރަކާތް ކެންސަލް ކުރީ، ދުނިޔޭގައި މިވަގުތު ފެތުރެމުންދާ ކޯވިޑް-19ގެ ސަބަބުން، ދަތުރުކުރުމަށް ދިމާވެފައިވާ ދަތިތަކާއިއެކު ރައްކާތެރިކަމުގެ ފިޔަވަޅެއްގެ ގޮތުންނެވެ.
މިކޭމްޕްގައި އިންޑިއާއިން ޒިޔާރަތްކުރާ ކުޑަކުދިންގެ ހިތުގެ ބައްޔަށް ހާއްސަ 2 ޑޮކްޓަރުންނަށް 165 ފަރާތެއް ދެއްކުމަށް ވަނީ ހަމަޖެހިފައެވެ. މިކަމާއި ގުޅޭގުން ޓައިނީ ހާރޓްސްއިން ނެރުނު ބަޔާނުގައި އެ ޖަމިއްޔާއިން ވަނީ، ކޭމްޕް ކެންސަލްކުރަން ނިންމުމުގެ ސަބަބުން ދިމާވެދާނެ އުނދަގޫތަކަށް އެންމެހައި މެމްބަރުންގެ ކިބައިން ނިހާޔަތަށް މާއާފަށް އެދިފައެވެ. އަދި ދެން ކޭމްޕް ބޭއްވޭނެ ތާރީޚެއް ފަހުން އިއުލާނު ކުރެވޭނެކަމަށް އެ ޖަމިއްޔާއިން މަޢުލޫމާތުދެއެވެ.
ކޯވިޑް-19ގެ ސަބަބުން އެއްވުންތައް ނުބޭއްވުމަށާއި މީހުން އެއްވެއުޅޭ ސަރަހައްދުތަކަށް ނުދިއުމަށް ލަފާ ދިނުމުން ގިނަ ހަރަކާތްތަކެއް ރާއްޖެއާއި ރާއްޖެއިން ބޭރުގައިވެސް ދަނީ ކެންސަލް ކުރަމުންނެވެ.
އެގޮތުން ކޯވިޑް-19 އާއި ގުޅިގެން ރާއްޖޭގައިވެސް ރައްކާތެރި ފިޔަވަޅުތައް އެޅުމުގެ ގޮތުން ސްކޫލުތަކުގައި ހިންގޭ އިތުރު ހަރަކާތްތައްވެސް ވަނީ ހުއްޓާ ލާފައެވެ. އަދި ރާއްޖެއަށްވެސް ކޮވިޑް-19 އައުމުގެ ފުރުޞަތު ބޮޑުވެފައި ވާތީ، ރައްކާތެރި ކަމުގެ ފިޔަވަޅުތައް ސަރުކާރުން ގެންދަވަނީ ވަރުގަދަ ކުރައްވަމުންނެވެ.