ދިވެހި ޓްރޭޑް ކްރެޑިޓް ބޮންޑްގެ ނަމުގައި ދިވެހި އިންޝުއަރެންސް ކުންފުނިން އާ ހިދުމަތެއް ތަޢާރަފްކޮށްފިއެވެ.
މި ހިދުމަތް ތައާރަފު ކޮށްފައިވަނީ ކޯޕަރޭޓް މޯލްޑިވްސްއިން އިންތިޒާމުކޮށްގެން ދަރުބާރުގޭގައި ބޭއްވި ގޯލްޑް 100 ގާލާ ރަސްމިޔާތުގެ ތެރެއިންނެވެ.
ދިވެހި ޓްރޭޑް ކްރެޑިޓް ބޮންޑާ ބެހޭ ގޮތުން މީޑިއާތަކަށް މައުލޫމާތު ދެއްވަމުން ދިވެހި އިންޝުއަރެންސްގެ ހެޑް އޮފް މާކެޓިން، ޝާޔަން ޝާހިދު ވިދާޅުވީ ދިވެހި ޓްރޭޑް ކުރެޑިޓް ބޮންޑަކީ ސަޕްލަޔަރުންނަށާއި ކޮންޓްރެކްޓަރުންނަށް ވިޔަފާރިތައް މެނޭޖުކުރުމުގައި އިތުރު ފަސޭހަތަކެއް ލިބިގެންދާނެ ބޮންޑެއް ކަމަށެވެ. އަދި ޓްރޭޑް ކްރެޑިޓް ބޮންޑްގެ ޕާޓްނާޝިޕް އެގްރީމެންޓްގައި ދިވެހި އިންޝުއަރެންސާ އެކު ސޮއިކޮށްފައިވާ ސަޕްލަޔަރުންނަށް ކަސްޓަމަރުންނަށް ކްރެޑިޓަށް ތަކެތި ދޫކުރަން ފަންޑު ފޯރުކޮށްދޭނެކަމަށެވެ.
"އަޅުގަނޑުމެން މިހާރުވެސް ބައިވަރު ކްރެޑިޓްތައް ކުދި އަދި މެދުފަންތީގެ ވިޔަފާރިތަކަށް ދެން. އޭގެތެރެއިން އުޅޭނެ ބިޑް ސެކިއުރިޓީ، އެޑްވާންސް ޕޭމަންޓު ގެރެންޓީޒް، ރިޓެންޝަން ބޮންޑްސް، ޕާފޯމަންސް ގެރެންޓީޒް، މިހުރިހާ އެއްޗެއް ދެއަހަރު ވަންދެން ކުދި ވިޔަފާރިތަކަށް އެހީތެރިވުމަށް ދީފައި ހުރީ. އޭގެ އިތުރުން މި ތައަރަފްކުރީ ޓްރޭޑް ކްރެޑިޓް ބޮންޑު. އަޅުގަނޑުމެން އެންމެ ފުރަތަމަ ޖޮއިން މިކުރީ ސޮނީ ހާޑްވެއަރ. ސޮނީ ހާޑްވެއަރއިން އަޅުގަނޑުމެންނާއި އެކު ސަޕްލައިޔަ ޕާޓްނަރޝިޕް ނެގީމަ ސޮނީ ހާޑްވެއަރއިން މުދާ ގަންނަ ކޮންޓްރެކްޓަރުން ނޫނީ ކަސްޓަމަރުންނަށް ކްރެޑިޓަށް މިބޮންޑުގެ ދަށުން ވަކި މުއްދަތަކަށް މުދާ ދޫކުރެވޭނެ." ޝާޔަން ވިދާޅުވިއެވެ.
ޓްރޭޑް ކްރެޑިޓް ބޮންޑްގެ ޕާޓްނާޝިޕް އެގްރީމެންޓްގައި ދިވެހި އިންޝުއަރެންސާއެކު މިހާތަނަށް ސޮއިކޮށްފައިވަނީ ސޮނީ ހާޑްވެއާއެވެ. ދިވެހި އިންޝުއަރެންސްއިން ބުނީ ކުރިއަށް އޮތްތާނގައި ގިނަ ސަޕްލަޔަރުން އެ ބޮންޑުގައި ހިމެނުމަށް މަސައްކަތް ކުރަމުން އަންނަ ކަމަށެވެ. އެގޮތުން މިހާރުވެސް އެޕޯލޯ އަދި ވެލިގާ ހާޑްވެއާއި ވާހަކަދައްކަމުން އަންނަ ކަމުގައި ދިވެހި އިންޝުއަރެންސްއިން މައުލޫމާތު ދިނެވެ.