ނުރައްކާތެރި ކޮރޯނާވައިރަސް، ކޯވިޑް-19 އީރާނުގެ ޞިއްޙަތާއިބެހޭ ވަޒީރުގެ ނައިބު އިރާޖް ހަރީޗީއަށް ޖެހިއްޖެއެވެ. ހަރީޗީވަނީ އެކަން ކަށަވަރުކޮށްދެއްވާ ވައިރަހާ ދެކޮޅަށް ހަނގުރާމަކުރެއްވުމުގައި ސާބިތުކަމާއެކު ހުންނެވިކަމަށް ވިދާޅުވެފައެވެ.
ކޯވިޑް-19 ޖެހިފައިވާ ނުވަދިހަ ފަސް މީހުން މިހާތަނަށް އީރާނުންވަނީ ފެނިފައެވެ. އަދި ވައިރަހުގެ ސަބަބުން މަރުވި މީހުންގެ ޢަދަދު ސޯޅައަށްވަނީ އަރާފައެވެ. ކޯވިޑް-19 އެންމެ ފުރަތަމަ ފެނުނު ޗައިނާއަށްފަހު ވައިރަހުގެ ސަބަބުން އެންމެ ގިނައިން މީހުން މަރުވެފައިވަނީ އީރާނުގައެވެ.
އީރާނުގެ ރަސްމީ އިދާރާތަކުން މިހާރުވަނީ ރައްކާތެރިކަމުގެ ފިޔަވަޅެއްގެގޮތުން މުޅި ޤައުމުގެ އެކި ހިސާބުތަކުގައި ރޭވިފައިވާ މިއުޒިކް ޝޯތަކާއި ފުޓުބޯޅަ މެޗުތައް ކެންސަލްކޮށް، ގިނަ ޕްރޮވިންސުތަކުގެ ކިޔެވުން ވަގުތީގޮތުން ބަންދުކޮށްފައެވެ. ވައިރަސްޖެހިފައިވާކަމަށް ޝައްކުކުރެވޭ ނުވަސަތޭކައަށްވުރެ ގިނަ މީހުން ތިބިކަމަށް އީރާނުގެ ރަސްމީ އިދާރާއަކުން ބުނެއެވެ