ލިވަޕޫލްގެ އެންފީލްޑްގައި ކުޅުމަކީ އެއްވެސް ޓީމަކަށް ފަސޭހަކަމެއްނޫން ކަމަށާއި ނަމަވެސް މޮޅުވާން ކުރެވެންހުރި ހުރިހާ ކަމެއް ކުރާނެ ކަމަށް ވެސްޓްހޭމްގެ ކޯޗު ޑޭވިޑް މޮޔެސް ބުނެފި އެވެ.
ލިވަޕޫލާ ވާދަވެރި މެންޗެސްޓާ ޔުނައިޓެޑާއި އެވަޓަން އަށް ވެސް ކޯޗުކޮށްދިން މޮޔެސް މިހެން ބުނިއިރު އޭނާގެ ކޯޗުކަމުގައި ލިވަޕޫލާ ދެކޮޅަށް ނުކުތް 15 މެޗުން ވެސް ވަނީ ބަލިވެފަ އެވެ. ނަމަވެސް އޭނާ ބުނީ މި މެޗުން މޮޅުވާން ކުރެވެންހުރި ހުރިހާ ކަމެއްވެސް ކުރާނެ ކަމަށެވެ. މި މެޗަށް ނުކުންނައިރު ވެސްޓްހޭމް އޮތީ 20 ޓީމު ވާޑަކުރާ ލީގުގައި 24 ޕޮއިންޓާއެކު ޓޭބަލުގެ 18ވަނާގަ އެވެ. އޭނާ ބުނީ ރެލިގޭޝަން ޒޯނުގައި އޮތް ނަމަވެސް ލިވަޕޫލާ ދެކޮޅަށް ބިރުން ނުތިބޭނެ ކަމަށާއި ނަތީޖާ ނެރެވޭނީ ވިސްނުންތެރިކަމާއެކު ކުޅެގެން ކަމަށެވެ.
މި މެޗަށް ނުކުންނައިރު ލިވަޕޫލް ވަނީ އެންމެ ފަހުން ޗެމްޕިއަންސް ލީގުގައި ކުޅުނު މެޗުން ބަލިވެފަ އެވެ. ނަމަވެސް 25 ޕޮއިންޓުގެ ލީޑަކާއެކު ޕްރެމިއާ ލީގުގެ ކުރީގައި އޮތް ޓިމުގެ ކޯޗު ޔާގެން ކްލޮޕް ބުނީ އޭނާގެ ޓީމުން މަސައްކަތް ކުރަނީ ކޮންމެ މުބާރާތެއްގައި ވެސް ޓީމުގެ ނަތީޖާ ރަނގަޅު ކުރަން ކަމަށެވެ. އަދި ބޮޑު ލީޑެއްގައި އޮތަސް މި މެޗުގައި ދޫނުދޭނެ ކަމަށާއި ކޮންމެ ބައްޔަކަށްފަހު އަލުން ޓީމު ހަމަޔަކަށް އެޅުވުމަކީ މުހިންމު ކަމަކަށްވާތީވެ އެކަން ކުރެވޭނީ މޮޅެއް ހޯދައިގެން ކަމަށެވެ.
އެތްލެޓިކޯ މެޑްރިޑް އަތުން ޗެމްޕިއަންސް ލީގުގައި ބަލިވި ނަމަވެސް މި މެޗު ތަފާތުވާނެ ކަމަށް ވެސް ކްލޮޕް ބުންޏެވެ. އެ މެޗުގައި ލިބުނު އަނިޔާގެ ސަބަބުން މި މެޗުގައި ކެޕްޓަން ޖޯޑަން ހެންޑަސަން ނުކުޅޭނެ އެވެ. އޭނާގެ އިތުރުން ސްވިސް ފޯވަޑް ޒެންޑެން ޝަގީރީވެސް ހުރީ އަނިޔާގަ އެވެ.