ކޮރޯނާ ވައިރަހުގެ ނުރައްކާ ބޮޑުވެ ސައުތު ކޮރެއާ އިމަޖެންސީ ކުއްލި ޙާލަތަކަށް ގެނެސް "ރެޑް އެލަރޓް" ނެރެފިއެވެ.
ކޮރޯނާ ވައިރަހުގެ އަސަރު އެންމެ ބޮޑަކޮށްފައިވާ ޗައިނާއަށް ފަހު އެންމެ ހަލުވި މިނުގައި ވައިރަސް ފެތުރެމުން އަންނަނީ ސައުތު ކޮރެއާގައެވެ. މިހާތަނަށް އެޤައުމުގައި 763 މީހަކުވަނީ މިވައިރަސްއަށް ޕޮޒިޓިވްވެފައެވެ. އަދި ވައިރަސްގެ ސަބަބުން މިހާތަނަށް 7 މީހުން އެޤައުމުގައިވަނީ މަރުވެފައެވެ.
މިއާއެކު ކޮރޯނާވައިރަހުގެ ނުރައްކާ ސައުތު ކޮރެއާގައި ބޮޑުވެ އެޤައުމުގެ ސަރުކާރުން އިމަޖެންސީ ކުއްލި ޙާލަތު އިއުލާންކުރުމާގުޅިގެން ކޮރެއާގެ ސްކޫލްތައް ވިންޓަރ ބްރޭކަށް ފަހު ހުޅުވުންވަނީ ފަސްކޮށްފައެވެ. ވައިރަސްގެއަސަރު ސައުތު ކޮރެއާގައި އެންމެބޮޑަށް ކޮށްފައިވަނީ އެޤައުމުގެ ސިޓީއެއްކަމަށްވާ ޑީގޫއަށެވެ.
ސްޓޭޓް އޮފް އިމަރޖެރންސީ އިޢުލާންކޮށްފައި ވީނަމަވެސް އަދި އެޤައުމުގައި ސިޓީތައް އެއްކޮށް ބަންދުކޮށް ދަތުރުފަތުރުކުރުން ހުއްޓުވާފައިނުވާކަމަށް މަޢުލޫމާތު ލިބެއެވެ. އަދި މިހާރުގެ ޙާލަތު ޑަބްލިއުއެޗްއޯއާ ގުޅިގެން ސައުތު ކޮރެއާއިން އަންނަނީ މޮނީޓަރ ކުރަމުންނެވެ.
މުޅި ދުނިޔެއަށް ކޮރޯނާވައިރަހުގެ ނުއްރަކާ ބޮޑުވެފައިވެ ދުނިޔޭގެ ސިއްހަތު ޖަމްމިއްޔާއިންވަނީ ސިއްޙީ ކުއްލި ނުރައްކަލުގެ ޙާލަތު މުޅި ދުނިޔެގައިވެސް އިއުލާންކޮށްފައެވެ. ވައިރަސްގެ ބިރު ބޮޑުވެ އެކި ޤައުމުތަކުން އަންނަނީ ބޯޑަރު ބަންދުކުރުމާއި ބައެއް ޤައުމުތަކަށް ސީދަ ކުރާ ދަތުރުތައް ހުއްޓުވުމާއި ވައިރަހުގެ އަސަރު ބޮޑުވެފައިވާ ސަރަޙައްދުތަކުން ދަތުރުކުރާ މީހުން ކަރަންޓީންކުރުމުގެ މަސައްކަތްކުރަމުންނެވެ.
ކޮރޯނާވައިރަހުގެ ޙާލަތު މުޅި ދުނިޔޭގައި ގޯސްވަމުން އަންނަކަން ޑަބްލިއުއެޗްއޯއިން ފާހަގަކޮށްފައިވާއިރު މިވައިރަހުގެ ހަގީގަތް އަދި މުޅިން ހޯދިފައެއް ނުވެއެވެ.