އެމެރިކާގެ ރައީސް ޑޮނަލްޑް ޓްރަމްޕް އިންޑިއާއަށް ކުރައްވާ ރަސްމީ ދަތުރަށް ތައްޔާރުވުމުގެގޮތުން އިންޑިއާގެ އަޙްމަދުއާބާދުގެ ސަލާމަތީކަންކަން ވަރުގަދަކޮށް، ތާޖު މަހަލް ހުންނަ އަގްރާ ސާފުކޮށްފިއެވެ.
ޑޮނަލްޑް ޓްރަމްޕް އިންޑިއާއަށް ދަތުރުކުރެއްވުމަށް ހަމަޖެހިފައިވަނީ މިމަހުގެ ސައްވީހުން ފަންސަވީހަށެވެ. މިދަތުރުފުޅުގައި އެމަނިކުފާނު އިންޑިޔާގެ ބޮޑުވަޒީރު ނަރެންދްރަ މޯދީ އުފަންވެވަޑައިގެންނެވި ގުޖުރާތުގެ އިތުރުން ވެރިރަށް ނިއު ދިއްލީއަށް ޒިޔާރަތްކުރެއްވުމަށްވަނީ ހަމަޖެހިފައެވެ. އަދި ބޮޑުވަޒީރު މޯދީއާއެކު ރަސްމީ ވާހަކަތައް ބޭއްވުމަށްވަނީ ހަމަޖެހިފައެވެ.
ދަތުރުގެ ކުރިން ތާޖު މަހަލް ކައިރީ ސަރަޙައްދުތަކާއި މަގުތައް ސާފުކުރުމުގައި އެސަރަޙައްދުގައި ތަޣައްޔަރުވެފައިވާ ފެން ސާފުކުރުމަށް މަސައްކަތްތެރިން އަވަދިނެތި ޙަރަކާތްތެރިވަމުންދަނިކޮށްވަނީ ފެނިފައެވެ. އެގޮތުން، އެސަރަޙައްދުގެ ހުންނަ ފާރުތަކާއި ފެންއަރުވާ ވަޑާންތަކާއި މަގުތައްވަނީ ސާފުކޮށްފައެވެ. އަދި ޓްރަމްޕުގެ ފަރީއްކޮޅުތަކަށް ޙާއްސަކޮށް ރަނާއި ރިހިން ޖަރީކޮށްފައިވާ ތަށި ސަމުސާވަނީ ހޯދާފައެވެ.
އިންޑިއާ ސަރުކާރުންވަނީ ފަސްހާހަށްވުރެ ގިނަ ހަށިފާރަވެރިންނާއި ސިފައިންނަށް އެހީތެރިވުމަށް ޢާންމުންގެތެރެއިން ދިހަ ޕެރެމިލިޓަރީ ފައުޖުވަނީ ޓްރަމްޕް ދަތުރުކުރައްވަން ހަމަޖެހިފައިވާ މަގުތަކުގެ އެކި ސަރަޙައްދުތަކަށް ފޮނުވާފައެވެ. އަގްރާ ސިޓީގައި ސީސީޓީވީ ކެމެރާހަރުކޮށް، ސްނައިޕަރުން ޙަރަކާތްތެރިވާނެ ސަރަޙައްދުތައް ކަނޑައަޅާފައިވާކަމަށްވެސް ރަސްމީ އިދާރާތަކުން ބުނެއެވެ.