ގެދޮރު ގެއްލިފައިވާ ސޫރިޔާގެ ރައްޔިތުން އެދެނީ ތުރުކީވިލާތުގެ ސަރަޙައްދީ ރޮނގު ހުޅުވާދިނުމަށް
ތުރުކީވިލާތުގެ ސަރަޙައްދީ ރޮނގު ހުޅުވާދީ ރައްކާތެރިކަން ފޯރުކޮށްދިނުމަށް ސޫރިޔާގެ ހުޅަނގުއުތުރު ސަރަޙައްދުގައި ހިނގަމުންދާ ހަމަނުޖެހުންތަކުގެ ސަބަބުން ގެދޮރު ގެއްލި، ހާލުގައި ޖެހިފައިވާ އެތައް ސަތޭކަހާސް ބަޔަކު އެދެން ފަށައިފިއެވެ.
ސޫރިޔާގެ ހުޅަނގުއުތުރު ސަރަޙައްދުގައި ހިނގަމުންދާ ހަމަނުޖެހުންތަކުގެ ސަބަބުން ގެދޮރު ގެއްލި، އެއް މިލިއަނަށްވުރެ ގިނަ މީހުންވަނީ ހާލުގައި ޖެހިފައެވެ. އޭގެ ތެރެއިން ގިނަ ޢަދަދެއްގެ ބަޔަކުވަނީ ތުރުކީވިލާތުގެ ސަރަޙައްދީ ރޮނގު ކައިރިއަށް ޖަމާވެފައެވެ. ނަމަވެސް، ސަރަޙައްދީ ރޮނގު ހުޅުވާ އެމީހުންނަށް ރައްކާތެރިކަން ދިނުމަށް އެޤައުމުން ދެކޮޅުހަދައެވެ. ތުރުކީވިލާތުގައި ސޫރިޔާގެ 3.7 މިލިއަން މީހުން މިހާރުވެސް އެބަތިއްބެވެ. ތުރުކީވިލާތުގެ ސަރުކާރުން ބުނާގޮތުގައި އިތުރު ބަޔަކަށް އެޤައުމުން ރައްކާތެރިކަން ދެވެން ނެތްކަމަށެވެ.
ސޫރިޔާގެ ހުޅަނގުއުތުރު ސަރަޙައްދަކީ އެޤައުމުގައި އެންމެ ވަރުގަދައަށް މިހާރު ހަނގުރާމަ ހިނގަމުންދާ ސަރަޙައްދެވެ. އެސަރަޙައްދުގައި އޮންނަ އިދްލިބަކީ އިދިކޮޅު ހަނގުރާމަވެރިންގެ ބާރުގެ ދަށުގައި އޮތް އެންމެ ފަހު ރަށެވެ. އަދި އެރަށް މިނިވަންކުރުމަށް ރަޝިޔާގެ އަސްކަރީ އެހީތެރިކަމާއެކު ސޫރިޔާގެ ފައުޖުތަކުންދަނީ ވަރުގަދަ ޙަމަލާތަކެއް ދެމުންނެވެ.
ސޫރިޔާގެ ހުޅަނގުއުތުރު ސަރަޙައްދު ސޫރިޔާގެ ސަރުކާރުގެ ބާރުގެ ދަށަށް އައުމުން އެޤައުމުގެ ނުވަ އަހަރުވީ ދާޚިލީ ހަނގުރާމައަށް ނިމުމެއް އަންނާނެކަމަށް ބެލެވެއެވެ. ނަމަވެސް، ސޫރިޔާގެ ހުޅަނގުއުތުރު ސަރަޙައްދުގައި ބޮޑު ލޭއޮހޮރުވުމެއް ހިންގުމުގެ ފުރުޞަތު ނުދޭނެކަމަށާއި ސޫރިޔާގެ އާންމުން ރައްކާތެރިކޮށްދޭނެކަމަށް ތުރުވިލާތުންވަނީ ބުނެފައެވެ. އަދި އެސަރަޙައްދަށް ތުރުކީވިލާތުންވަނީ ބަރު ހަތިޔާރާއެކު ގިނަ ޢަދަދެއްގެ ސިފައިން ފޮނުވާފައެވެ.