ބައިނަލްއަޤުވާމީ މުޖުތަމަޢުގެ ނުރުހުމާއި ފިއްތުންތަކުގެ ސަބަބުން ހުއްޓިފައިވާ އިރުމަތީ ޤުދުސްގައި 3،000 ގެ އެޅުމުގެ މަޝްރޫޢު އަލުން ފަށަން ނިންމާފައިވާކަމަށް އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ އިޢުލާންކުރައްވައިފިއެވެ. ނަތަންޔާހޫ އެކަން އިޢުލާންކުރެއްވީ ކުރިއަށްއޮތް އާންމު އިންތިޚާބަށް ތާޢީދު ހޯއްދެވުމަށް ފަލަސްޠީނުގައި ޤަވައިދާ ޚިލާފަށް އަޅާފައިވާ ޔަހޫދީ އާބާދީތަކަށް ޒިޔާރަތްކުރައްވާ ބޭއްވެވި ކެންޕޭން ޙަރަކާތެއްގައެވެ.
އިސްރާއީލުގެ ބޮޑުވަޒީރުގެ ނިންމެވުމަށް ފަލަސްޠީނުގެ ރައްޔިތުންވަނީ ކަނބޮޑުވުން ފާޅުކޮށްފައެވެ. އަދި އެއީ ފަލަސްޠީނުގެ މިނިވަން ވަކި ދަޢުލަތެއް އުފެއްދުމަށް ކުރަމުންދާ މަސައްކަތަށް އެޅޭނެ އިތުރު ހުރަހެއްކަމަށްވަނީ ފަލަސްޠީނުގެ ރައްޔިތުންވަނީ ބުނެފައެވެ.
ޔަހޫދީން އާބާދުކުރުމަށް އިތުރު 3،000 ގެ އެޅުމަށް ފަލަސްޠީނުގެ އަވަށެއްކަމަށްވާ ބައިތުލަޙަމުގެ ބައެއް އިސްރާއީލަށް ނަގާނެއެވެ. ނަތަންޔާހޫ ވިދާޅުވީ 3،000 ގޭގެ ތެރެއިން 1،000 ގެ ވިއްކުމަށް ވަރަށް އަވަހަށް ހުޅުވާލާނެކަމަށެވެ. އަދި 1،000 ގެ އެޅުމަށް ހަމަޖެހިފައިވަނީ ފަލަސްޠީނުގެ އަވަށެއްކަމަށްވާ ބައިތު ސަފާފާގައި ދިރިއުޅޭ ޢަރަބިންނަށްކަމަށް އޭނާ ވިދާޅުވިއެވެ. ނަމަވެސް އިރުމަތީ ޤުދުސްގައި 3،000 ގެ އެޅުމުގެ މަޝްރޫޢުގެ އަމަލީ މަސައްކަތް ފަށާނެ ތާރީޚެއް ނަތަންޔާހޫ އިޢުލާންކުރައްވާފައެއް ނުވެއެވެ.
މީގެ އިތުރުން، ޔަހޫދީންނަށް 2،200 ގެ އަޅާދިނުމުގެ މަޝްރޫޢެއްވެސް އިސްރާއީލުގެ ބޮޑުވަޒީރުވަނީ އިޢުލާންކުރައްވާފައެވެ. އެގެތައް އެޅުމަށް ހަމަޖެހިފައިވަނީ ފަލަސްޠީނުގެ އަތުން ފޭރިގެންފައިވާ ހާރު ހޯމާ އަވަށުގައެވެ. އެއީ މިހާރުވެސް ގިނަ ޢަދަދެއްގެ ޔަހޫދީން ވަޒަންވެރިކޮށްފައިވާ ސަރަޙައްދެކެވެ.