ނޮޅިވަރަންފަރު ބަނދަރު ސަރަހައްދުން ތެޔޮ ވިއްކުމަށް 2 ބިން ކުއްޔަށް ދޫކުރުމަށް އެރަށު ކައުންސިލުން ނިންމައިފިއެވެ.
ހދ. ނޮޅިވަރަންފަރު ކައުންސިލުން ބުނީ 10 އަހަރުދުވަހުގެ މުއްދަތަށް ދޫކުރާނީ އެރަށު ބަނދަރުގެ އިރުމަތީ ސަރަހައްދުން 1400 އަކަފޫޓުގެ 2 ބިން ކަމަށެވެ. އަދި ބިން ކުއްޔަށް ދޫކުރުމަށް ހަމަޖެހިފައިވަނީ އަކަފޫޓަކަށް 60 ލާރީގެ ރޭޓުން ކަމަށްވެސް ނޮޅިވަރަންފަރު ކައުންސިލުން ބުނެއެވެ.
ބިން ކުއްޔަށް ހިފުމަށް ޝައުޤުވެރިވާ ފަރާތްތަކުން މިމަހުގެ 27 ވަނަ ދުވަހު ނޮޅިވަރަންފަރު ކައުންސިލް އިދާރާއިން މަޢުލޫމާތު ސާފުކުރުމަށްފަހު، އަންނަމަހުގެ 5 ވަނަ ދުވަހުގެ ހެނދުނު 11:00 އަށް އަންދާސީ ހިސާބު ހުށަހެޅަން ޖެހެއެވެ.
ބިން ލިބިއްޖެނަމަ އެ ބިން ތަރައްޤީކޮށް ވިޔަފާރި ފަށާނެ ތާރީޚެއް އަންދާޒާކޮށް އަންދާސީ ހިސާބުގައި ހިމަނަން ޖެހެއެވެ. އަދި ބިން ކުއްޔަށް ހިފާ ފަރާތަކުން ރަށުގެ އިޖުތިމާޢީ ކަންކަމަށް ކޮންމެ އަހަރަކު ކުރާނެ ކަންކަން ވެސް އަންދާސީ ހިސާބުގައި ހިމަނަން ޖެހެއެވެ.