60 އަށް ވުރެ ގިނަ އެގްޒިބިޓަރުންނާއެކު ބިޒްނަސް އެކްސްޕޯ 2020 އާދީއްތަ ދުވަހު ފަށަން ތައްޔާރުވެއްޖެއެވެ.
ބިޒްނަސް އެކްސްޕޯ 2020ގެ އެންމެ ފަހުގެ ތައްޔާރީތައް މިހާރު ވަމުންދާއިރު، މިފެއަރ އޮންނާނީ ދަރުބާރު ގޭގައި އާދީއްތަ ދުވަހުން ހޯމަދުވަހުގެ ނިޔަލަށެވެ.
އޯރކާ މީޑިއާ ގްރޫޕުން އިންތިޒާމް ކޮށްގެން ދެ ދުވަހުގެ މުއްދަތަކަށް ދަރުބާރުގޭގައި ބާއްވާ ކޯޕަރޭޓް މޯލްޑިވްސް ބިޒްނަސް އެކްސްޕޯއަކީ ބޮޑެތި ވިޔަފާރި ތަކާއި، ކުދި އަދި މެދު ފަންތީގެ ވިޔަފާރިތަކަށް، ވިޔަފާރި ކުރިއެރުވުމަށްޓަކައި ގުޅުން ބަދަހިކުރަންޖެހޭ ފަރާތްތަކާ ގުޅުން ބަދަހިކޮށް، ފޯރުކޮށްދޭ ހިދުމަތްތަކާއި އުފެއްދުންތައް އާންމުންނަށް ދައްކައިލުމުގެ ފުރުސަތު ހޯދައިދިނުމުގެ ގޮތުން ބާއްވާ އެކްސްޕޯއެކެވެ.
ރާއްޖޭގެ ހުރިހާ ދާއިރާއެއްގައި މަސައްކަތް ކުރާ ވިޔަފާރިވެރިންނަށް ބާއްވާ މި އެކްސްޕޯ ފެބްރުއަރީ 23 އިން 24 އަށް ދަރުބާރުގޭގައި ކުރިޔަށް ގެންދާއިރު، މިއީ މި އެކްޕޯ ޖެހިޖެހިގެން ބާއްވާތާ 2 ވަނަ އަހަރެވެ.
އޯރކާ މީޑިއާއިން ބުނިގޮތުގައި މިއަހަރު މި އެކްސްޕޯގައި ވިޔަފާރީގެ ދާއިރާގެ 60 އަށް ވުރެ ގިނަ ވިޔަފާރިތައް އެގްޒިބިޓަރުންގެ ގޮތުގައި ބައިވެރިވުމަށް ހަމަޖެހިފައިވާއިރު، އެކްސްޕޯގެ ތެރެއިން ވިޔަފާރިއާ ގުޅުން ހުރި ހަތަރު ސަމިޓެއް ބޭއްވުމަށް ވަނީ ހަމަޖެހިފައެވެ. އެއީ ވިޔަފާރިވެރިންނަށް ހާއްސަ ސަމިޓަކާއި އަންހެނުންނަށް ހާއްސަ ސަމިޓެއްގެ އިތުރުން މޯލްޑިވްސް ޓޫރިޒަމް ޕްރޮފެޝަނަލް ސަމިޓާއި މޯލްޑިވްސް ފައިނޭންސް ޕްރޮފެޝަނަލް ސަމިޓުކަމަށެވެ.
ސަމިޓްތަކުގައި ވާހަކަދައްކަވާ ބޭފުޅުންގެ ތެރޭގައި ހިމެނެނީ އެކިއެކި ފަންނުތަކުގެ ފާހަގަކޮއްލެވޭ ބޭފުޅުންނެވެ. މި ބޭފުޅުން، އެ ސަމިޓުތަކުގެ ލިބިފައިވާ ކާމިޔާބީއާއި ތަޖުރިބާ، އެހެން ވިޔަފާރިވެރިންނާއި ވިޔަފާރިއަށް ޝައުގުވެރިވާ ފަރާތްތަކާއި ހިއްސާ ކުރުމުގެ ފުރުސަތު ލިބިގެންދާނެއެވެ. އަދި ވިޔަފާރިވެރިންނަށް ބޭނުންވާ ކަންކަމާއި އެފަރާތްތަކަށް ދިމާވާ ގޮންޖެހުންތަކުން އަރައިގަތުމަށް ކުރެވިދާނެ ކަންކަމާ މެދު ބައިވެރިންގެ މެދުގައި ހިޔާލު ބަދަލު ކުރުމުގެ ފުރުސަތުވެސް ސަމިޓުތަކުގެ ބައިވެރިންނަށް ލިބިގެންދާނެއެވެ.
ވިޔަފާރިއާއި ނެޓްވޯކިންގްގެ ގިނަ ހަރަކާތްތަކެއް ކުރިއަށްދާ ބިޒްނަސް އެކްސްޕޯ އަށް 3،000 ގިނަ މީހުން ޒިޔާރަތްކުރާނެ ކަމަށް މި އިވެންޓް އިންތިޒާމްކުރާ އޯރކާ މީޑިއާ ގްރޫޕުން ލަފާކުރެއެވެ.