މިދިޔަ ސެޕްޓެމްބަރު މަހު އަފްޣާނިސްތާނުގައި ބޭއްވި ރިޔާސީ އިންތިޚާބު ކާމިޔާބު ކުރައްވާފައިވަނީ ރައީސް އަޝްރަފް ޣަނީކަމަށް އެޤައުމުގެ އިންތިޚާބާބެހޭ ކޮމިޝަނުން ކަނޑައަޅައިފިއެވެ.
އަފްޣާނިސްތާނުގައި ރިޔާސީ އިންތިޚާބު ބާއްވާފައިވަނީ މިދިޔަ ސެޕްޓެމްބަރު މަހުގެ 28ވަނަ ދުވަހުއެވެ. ނަމަވެސް، އިންތިޚާބުގައި މަކަރު ހަދާފައިވާކަމަށް ބުނެ ކޮށްފައިވާ ތުޙުމަތުތަކާއި ވޯޓުލުމަށް ބޭނުންކުރި އާ ނިޒާމުގެ ސަބަބުން ދިމާވި މައްސަލަތަކުގެ ސަބަބުން އިންތިޚާބުގެ ދާޢިމީ ނަތީޖާ ޢާންމުކުރުން އެޤައުމުގެ އިންތިޚާބާބެހޭ ކޮމިޝަނުންވަނީ ފަސްކޮށްފައެވެ.
އަފްޣާނިސްތާނުގެ އިންތިޚާބާބެހޭ ކޮމިޝަނުން ބުނެފައިވަނީ ސެޕްޓެމްބަރު މަހުގެ އިންތިޚާބު ރައީސް ޣަނީ ކާމިޔާބުކުރެއްވީ %50.67 ވޯޓުހޯއްދަވައިގެންކަމަށެވެ. އަދި އޭނާއާ އެންމެ ގާތުން ވާދަކުރެއްވި ޢަބްދުﷲ ޢަބްދުﷲއަށް ލިބިވަޑައިގަތީ %39.52 ވޯޓުކަމަށެވެ. މި ނަތީޖާއަކީ 2014ވަނަ އަހަރު ބޭއްވި ރިޔާސީ އިންތިޚާބުގައިވެސް ނުކުތް ނަތީޖާއެވެ. އެފަހަރު ޣަނީއާއި ޢަބްދުﷲވެސްވަނީ ވޯޓުގައި ގިނަ އޮޅުވާލުންތަކެއް ހުރިކަމަށް ތުހުމަތު ކުރައްވާފައެވެ. އެފަހަރު އުފެދުނު ދެބަސްވުންތައް ހައްލުކުރީ އެމެރިކާ މެދުވެރިވެގެންނެވެ.
ރިޔާސީ އިންތިޚާބުގެ ނަތީޖާ އިއުލާނުކޮށްފައިވަނީ އެމެރިކާއާއި އަފްޣާނިސްތާނުގައި ޙަރަކާތްތެރިވާ ހަނގުރާމަވެރި ތާލިބާން ޖަމާޢަތާ ދެމެދު ޞުލްޙައިގެ އެއްބަސްވުމެއް ޤާއިމުކުރުމަށް ތައްޔާރުވަމުންދާ ދަނޑިވަޅެއްގައެވެ.