ނުރައްކާތެރި ކޮރޯނާވައިރަސް، ކޯވިޑް-19 ޗައިނާގައި ފެތުރުނުގޮތަށް އިންޑިޔާގައި ފެތުރެން ފަށައިފިނަމަ އެކަމަށް ބޭނުންކުރާނެ ބޭސް ދުރާލާ ރައްކާކޮށްފައިވާކަމަށް އެޤައުމުގެ ޞިއްޙަތާބެހޭ ވަޒީރު ޑރ ޙާރޝް ވަރުދާން ވިދާޅުވެއްޖެއެވެ.
އިންޑިޔާގެ ވެރިރަށް ނިއު ދިއްލީގައި ނޫސްވެރިންނާ ވާހަކަދައްކަވަމުން ވަރުދާން ވިދާޅުވީ ކޯވިޑް-19 ފެތުރުމާ ދެކޮޅަށް އިންޑިޔާއިން އެޅި ތައްޔާރީ ފިޔަވަޅެއްގެ ގޮތުން ބަލިމީހުން ދެނެގަނެވޭނެ ނިޒާމެއް ޤާއިމުކޮށްފައިވާކަމަށެވެ. ވަރުދާން އެހެން ވިދާޅުވެފައިވަނީ އިންޑިޔާގައި ވައިރަސް ފެތުރުން ހުއްޓުވަން އަޅާފައިވާ ފިޔަވަޅުތައް ބަލައި ދެނެގަތުމަށް ބޭއްވި މަތީފަންތީގެ ވަޒީރުންގެ ބައްދަލުވުމަކަށްފަހުއެވެ.
ޞިއްޙަތާބެހޭ ވަޒީރު ވަރުދާން ވިދާޅުވީ ޗައިނާގެ ވުހާނުން އިންޑިޔާއަށް ގެނެވުނު 645 މީހުން ކޯވިޑް-19އަށް ޓެސްޓްކުރުމުން އެމީހުންގެ ގައިގައި އެވައިރަސް ނެތްކަން ކަށަވަރުކުރެވިފައިވާކަމަށެވެ. އެކަހެރި ކޭންޕުތަކެއްގައި ވައިރަހަށް ޝައްކުކުރެވޭ މީހުން ބަލަހައްޓަނީ އިންޑިޔާގެ ސަލާމަތީ ބާރުތަކާއި ސަރަޙައްދީ ރޮނގު ބަލަހައްޓާ ފުލުހުންކަމަށް ވަރުދާން ވިދާޅުވިއެވެ. ކޭންޕުތަކުގައި ތިބި މީހުންގެ ޞިއްޙީ ތަހުލީލުތައް ދުވާލަކު އެއްފަހަރު ހަދަމުންދާކަމަށްވެސް އޭނާ ފާހަގަކުރެއްވިއެވެ.
އިންޑިޔާގެ ޞިއްޙަތާބެހޭ ވަޒީރު ވިދާޅުވީ ވައިރަސް ޖެހިފައިވާ މީހުން އެޤައުމުން ފެނިފައިވަނީ ހަމައެކަނި ކެރަލާއިންކަމަށެވެ. އަދި ކެރަލާގައި ވައިރަސް ޖެހިފައިވާކަން ކަށަވަރުކުރެވިފައިވާ 3 މީހުންނަށް ފަރުވާދިނުމަށްފަހު ދޫކޮށްލާފައިވާކަމަށްވެސް އޭނާ ވިދާޅުވިއެވެ.
ދެކުނު އޭޝިޔާގެ ޤައުމުތަކުގެ ތެރެއިން ކޯވިޑް-19 މިހާތަނަށް ފެނިފައިވަނީ އިންޑިޔާގެ އިތުރުން ސްރީ ލަންކާއިންނާއި ނޭޕާލުންނެވެ.