ކ.މާފުށީގައިހުރި ކުޑަކުދިންގެ މަރުކަޒުގައި ރޯވި އަލިފާންގަނޑު ނިއްވާލައިފިއެވެ. އެމްއެންޑީއެފުން ވިދާޅުވީ މިއަލިފަންގަނޑު ނިއްވާލީ މާފުށީ ކަރެކްޝަނަލް ސަރވިސްގެ ސްޓަފުންނާއި އެރަށު ފުލުހުންނާއި ޢާއްމު ރައްޔިތުން ގުޅިގެންކަމަށެވެ.
އަލިފަންގަނޑު ކޮންޓްރޯލް ނިއްވާލާފައިވަނީ އަލިފަންގަނޑު ރޯވިތާ ގާތްގަނޑަކަށް ދޮޅުގަޑިއިރުގެތެރޭގައިކަމަށް އެމްއެންޑީއެފުން މަޢުލޫމާތުދެއެވެ.
މާފުށީގައި ކުރިން ބޭނުންކުރަމުން އައި ކުޑަކުދިންގެ މަރުކަޒު ނުވަތަ އިސްލާހިއްޔާ ރޯވި ކަމުގެ މަޢުލޫމާތު އެމްއެންޑީއެފަށް ލިބިފައިވަނީ މިއަދު ހެނދުނު 09:12 ހާއިރުކަމަށް އެމްއެންޑީއެފުން ވިދާޅުވެއެވެ. މީގެ ކުރިން އިސްލާހިއްޔާގެ ގޮތުގައި ބޭނުންކުރަމުން އައި މިޢިމާރަތް ރަސްމީކޮށް ބޭނުންކުރުން ހުއްޓާލާ އެތަން ފަހުން ބޭނުންކުރަމުން އައީ ގުދަނެއްގެ ގޮތުގައިކަމަށްވެސް މައުލޫމާތު ލިބެއެވެ. މިޙާދިސާ ހިންގަން މެދުވެރިވި ސަބަބެއް މިހާތަނަށް ކަމާ ބެހޭ ފަރާތްތަކުން ހާމަކޮށްފައިނުވާއިރު މިޙާދިސާ ތަހުގީގުކުރަމުން އަންނަކަމަށް އެމްއެންޑީއެފާއި ފުލުހުން ވިދާޅުވެއެވެ.
އަލިފަނުގެ ޙާދިސާތަކުގައި ދައުލަތާއި ޢާއްމުންގެ މުދަލަށް ލިބޭ ގެއްލުން ކުޑަކުރުމަށް ބޭނުންވާ ތަމްރީނުތަކާއި އެފަދަ ޙާދިސާތައް މަދުކުރުމަށްޓަކައި މީހުން ހޭލުންތެރިކުރުމުގެ ތަފާތު ޙަރަކާތްތައް އެމްއެންޑީއެފުން އަންނީ ރާއްޖޭގެ އެކި ސަރަޙައްދުތަކުގައި ހިންގަމުންނެވެ. އަލިފާނުގެ ހިތާމަވެރި ޙާދިސާތަކުގައި މީހުންގެ ފުރާނަ ގެއްލިފައިވާއިރު މިފަދަ ޙާދިސާތައް މަދުކުރުމަށް ޢިމާރާތްތަކާއި ގުދަންތަކުގެ ރައްކާތެރިކަމުގެ ކަންކަން އިންތިޒާމުތައް ހުރި ނެތްގޮތް ދެނެގަތުން މިދިޔަ އަހަރު ސެޕްޓެމްބަރު މަހުން ފެށިގެން ވަނީ ވަރުގަދަކޮށްފައެވެ.