އެމެރިކާއިން އިޢުލާންކުރި މެދުއިރުމަތީގެ ޞުލްޙައިގެ މަޝްރޫޢުއަކީ އިސްރާއީލަށް ދިން ހަދިޔާއެއް: މަޙުމޫދު ޢައްބާސް

މެދުއިރުމަތީގައި ޞުލްޙަ ޤާއިމުކުރުމަށްކަމަށް ބުނެ އެމެރިކާއިން އެކުލަވާލާފައިވާ މަޝްރޫޢުއަކީ އެމެރިކާއިން އިސްރާއީލަށް ދީފައިވާ ހަދިޔާއެއްކަމަށް އދގެ ސަލާމަތީ މަޖިލިހުގައި ވާހަކަދައްކަވަމުން ފަލަސްޠީނުގެ ރައީސް މަޙުމޫދު ޢައްބާސް ވިދާޅުވެއްޖެއެވެ.

މިދިޔަ ޖެނުއަރީ މަހުގެ 28ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕް އިޢުލާންކުރެއްވި މެދުއިރުމަތީގެ ސުލްޙައިގެ މަޝްރޫޢުގައި ހިމަނުއްވާފައިވަނީ އިސްރާއީލުން ޙާޞިލުކުރަން ބޭނުންވެފައިވާ ލަނޑުދަނޑިތަކެވެ. ވައިޓުހައުސްގައި ބޭއްވި ހަފުލާއެއްގައި ޞުލްޙައިގެ މަޝްރޫޢު އިޢުލާންކުރެއްވީ ޓްރަމްޕް އަރިހުގައި އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ބަހައްޓަވައިގެންނެވެ.

ވޭތުވެދިޔަ ތިން އަހަރު ދުވަހު މަސައްކަތްކޮށްގެން އެމެރިކާއަށް އެކުލަވާލި މެދުއިރުމަތީގެ ޞުލްޙައިގެ މަޝްރޫޢުގައި މައިގަނޑުގޮތެއްގައި ނިންމާފައިވަނީ ހުޅަނގު އައްސޭރީގައި އިސްރާއީލުން ޤަވައިދާ ޚިލާފަށް ޔަހޫދީން ވަޒަންވެރިކޮށްފައިވާ ސަރަޙައްދުތައް އިސްރާއީލުގެ ފުރިހަމަ ބާރުގެ ދަށަށް ގެނައުމަށެވެ. އަދި ފަލަސްޠީނުގެ މިނިވަން ދަޢުލަތެއް އުފެއްދުމުގެ ކުރިން ގިނަ ޝަރުތުތަކެއް ފުރިހަމަ ކުރަންޖެހެއެވެ. މީގެ އިތުރުން ފަލަސްޠީނުގެ ވެރިރަށުގެ ގޮތުގައި ހަމަޖައްސަން ނިންމާފައިވަނީ ހުޅަނގު އައްސޭރީގެ ކުޑަ އަވަށެކެވެ. ފަލަސްޠީނުގެ މިނިވަން ދަޢުލަތެއް ޤާއިމުކުރުމުގެ ބަދަލެއްގެގޮތުގައި އިސްރާއީލަށް މަސްޖިދުލްއަޤްޞާ ހިމެނޭހެން ޤުދުސްވެސް ދޭންޖެހެއެވެ. އަދި އެއާއެކު ޤުދުސްވެގެންދާނީ އިސްރާއީލުގެ ވެރިރަށަށްކަމަށްވެސް އެމަޝްރޫޢުގައި އެމެރިކާއިން ހިމަނާފައިވެއެވެ. ޓްރަމްޕް ވިދާޅުވީ އެއީ ފަލަސްޠީނުގެ މިނިވަން ދަޢުލަތެއް ޤާއިމުކުރުމަށް ލިބޭނެ އެންމެ ރަގަޅު ފުރުޞަތުކަމަށެވެ.

އދގެ ސަލާމަތީ މަޖިލީހުގައި ވާހަކަދައްކަވަމުން ފަލަސްޠީނުގެ ރައީސް މަޙުމޫދު ޢައްބާސް ވިދާޅުވީ އެމަޝްރޫޢުގެ ދަށުން އުފައްދާ ފަލަސްޠީނުގެ ދަޢުލަތެއް ފަލަސްޠިނުގެ ރައްޔިތުން ބަލައިނުގަންނާނެކަމަށެވެ. ޢައްބާސްވަނީ އެމަޝްރޫޢު ތަންފީޒުކުރުން ހުއްޓަވާލެއްވުމަށްފަހު، އަލުން މަޝްވަރާކުރެއްވުމަށް ޓްރަމްޕަށް ދަޢުވަތު އަރުވާފައެވެ. އަދި އެމަޝްވަރާތަކަކީ އދގެ މުޢާހަދާތަކުގެ ދަށުން 1967ވަނަ އަހަރުގެ ސަރަޙައްދީ އިންތައް ކަށަވަރުވާނެފަދަ މަޝްވަރާތަކަކަށް ވާންޖެހޭނެކަމަށްވެސް ޢައްބާސް ވިދާޅުވިއެވެ. ޢައްބާސް ވިދާޅުވީ އެމައްސަލާގައި މެދުވެރިއެއްގެ ދަޢުރުއަދާކޮށް، ބަސްބުނުގެ ބާރާއި ޙައްޤު ހަމައެކަނި އެމެރިކާއަށް ދީގެން ނުވާނެކަމަށާއި އެކަމުގައި ބައިނަލްއަޤްވާމީ ބައްދަލުވުންތައް ބާއްވަން ޖެހޭކަމަށެވެ.

ފަލަސްޠީނުގެ ރައީސް ވިދާޅުވީ އެމެރިކާގެ ނިންމުމުގެ ސަބަބުން ފަލަސްޠީނުގެ ސަރަޙައްދުތަކުގައި އިތުރު ހަމަނުޖެހުންތައް ހިނގުމަކީ އެކަށީގެންވާ ކަމެކެވެ. ނަމަވެސް ފަލަސްޠިނުގެ ރައްޔިތުން ޓެރަރިސްޓް ޢަމަލުތައް ނުހިންގާނެކަމަށް އޭނާ ވިދާޅުވިއެވެ. އަދި ފަލަސްޠީނުގެ ރައްޔިތުން ބޭނުންވަނީ އުންމީދު ކަމަށާއި އެއުންމީދު ނަގާނުލުމަށްވެސް ޢައްބާސް ގޮވާލެއްވިއެވެ.

އދގެ ސަލާމަތީ މަޖިލީހުގައި ޢައްބާސް ވާހަކަދައްކަވާފައިވަނީ އިސްރާއީލުން ހުޅަނގު އައްސޭރީގައި ޤަވައިދާ ޚިލާފަށް ހިންގާ މަޝްރޫޢުތަކާ ދެކޮޅަށް އދގެ ސަލާމަތީ މަޖިލީހުން ޤަރާރެއް ފާސްކުރުމަށް ތޫނިސްއާއި އިންޑޮނޭޝިޔާއިން މަސައްކަތް ކުރަމުންދާ ދަނޑިވަޅެއްގައެވެ. އެޤަރާރު އެމެރިކާއިން ވީޓޯ ކުރާނެކަމަށް ބެލެވެއެވެ. ޤަރާރާ ގުޅޭގޮތުން ނަގާ ވޯޓުގައި އެމަޖިލީހުގެ އެހެން ޤައުމުތަކުގެ ވިސްނުން ހުރި ގޮތްވެސް ފެނިގެންދާނެއެވެ.