ދުނިޔޭގައި މިހާރު ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަހަށް ކިޔާނެނަމަކީ ކޯވިޑް-19ކަމަށް ދުނިޔޭގެ ޞިއްޙަތު ޖަމްޢިއްޔާ ޑަބްލިއުއެޗްއޯއިން ބުނެފިއެވެ.
ނޫސްވެރިންނާ ވާހަކަދައްކަވަމުން އެޖަމްޢިއްޔާގެ އިސްވެރިޔާ ޓެޑްރޮސް އަދަނޮމް ގެބްރެޔޭސުސް ވިދާޅުވީ ކޮރޯނާވައިރަހަށް އެނަން ދިނީ ވަކި ނަސްލެއް ނުވަތަ ވަކި ޤައުމެއް އެކަހެރި ނުކުރުމަށްކަމަށެވެ. އޭނާ ވިދާޅުވީ އެވައިރަހަކީ ދުނިޔޭގެ ސަލާމަތަށް މިހާރު އޮތް އެންމެ ބޮޑު ނުރައްކާކަމަށެވެ. ކޯވިޑް-19އަކީ ޓެރަރިސްޓް ޙަމަލާއެއްފަދަ ވައިރަހެއްކަމަށާއި އޭގެ ސަބަބުން ޤައުމަތަކަށް ސިޔާސީ، އިޖުތިމާޢީ އަދި އިޤްތިޞާދީ ލޮޅުންތައް އެރުން ގާތްކަމަށް ދުނިޔޭގެ ޞިއްޙަތު ޖަމްޢިއްޔާގެ އިސްވެރިޔާ ވިދާޅުވިއެވެ.
ގެބްރެޔޭސުސް ވިދާޅުވީ ކޯވިޑް-19އަށް ވެކްސިނެއް ހެދުމަށް އަދި ދޮޅު އަހަރު ދުވަސް ނަގާނެކަމަށާއި އެވައިރަސް ފެތުރުން ހުއްޓުވުމަށް ޑަބްލިއުއެޗްއޯއިން ގެންގުޅޭ ސިޔާސަތުތަކަށް ބަދަލު ނާންނަކަމަށެވެ. އަދި ވައިރަސް ފެތުރުން ހުއްޓުވުމަށް ހުރިހާ ޤައުމަކުންވެސް އެންމެ އެކަށީގެންވާ މިންގަނޑުތަކަށް ފިޔަވަޅުއެޅުމަށްވެސް އޭނާ ގޮވާލެއްވިއެވެ.
ކޯވިޑް-19ގެ އަސަރު މިހާތަނަށް 45،000 މީހުންނަށްކޮށް، އޭގެ ތެރެއިން 1،115 މީހުންވަނީ މަރުވެފައެވެ.