ހައްދުފަހަނައަޅާފައިވާ އައިއެސް ޖަމާޢަތުގެ ނުރައްކާ ދެކުނު އޭޝިޔާއަށް ބޮޑުކަމަށާއި ޚާއްޞަ ގޮތެއްގައި އަފްޣާނިސްތާނާ އިންވެގެންވާ ޤައުމުތަކަށް އެޖަމާޢަތުގެ ނުރައްކާތެރިކަން ބޮޑުކަމަށް އދން އެކުލަވާލާފައިވާ ރިޕޯޓެއްގައި ބުނެފިއެވެ.
މިދިޔަ އަހަރުގެ ފަހުކޮޅު އަފްޣާނިސްތާނުގެ ސަލާމަތީބާރުތަކުންނާއި ޠާލިބާން ހަނގުރާމަވެރިންގެ ފަރާތުން އައިއެސްއަށް ބޮޑެތި ފިއްތުންތަކެއް ކުރިމަތިވެ، އެޖަމާޢަތަށް ނިސްބަތްވާ ހަނގުރާމަވެރިންނާއި އެމީހުންގެ އާއިލާތައް ހިމެނޭގޮތަށް 1،400އަށްވުރެ ގިނަ މީހުން އަފްޣާނިސްތާނުން ވަނީ ހައްޔަރުކޮށްފައެވެ. މީގެ ތެރޭގައި އަފްޣާނިސްތާނަށް ނިސްބަތްވާ ގިނަ ޢަދަދެއްގެ ހަނގުރާމަވެރިންގެ އިތުރުން އަޒަރްބައިޖާން، ކެނެޑާ، ފަރަންސޭސިވިލާތް، އިންޑިޔާ، ދިވެހިރާއްޖެ، ޕާކިސްތާނު، ތަޖަކިސްތާނު އަދި ތުރުކީވިލާތާއި ކަޒަކިސްތާނަށް ނިސްބަތްވާ ހަނގުރާމަވެރިން ހިމެނެއެވެ. އެހެންކަމުން އަފްޣާނިސްތާނުގެ ނަންގަހާރު ޕްރޮވިންސުގައި ޙަރަކާތްތެރިވި އައިއެސްގެ ޖަމާޢަތުގެ ހަނގުރާމަވެރިންގެ ބާރުވަނީ ގާތްގަނޑަކަށް ނެތިފައެވެ.
ނަމަވެސް ބައިނަލްއަޤްވާމީ ސަލާމަތާއި ރައްކާތެރިކަމަށް ކުރިމަތިމަވުންދާ ނުރައްކަލާއި އދގެ މެންބަރު ޤައުމުތަކުން އެކަމާއި ދެކޮޅަށް އަޅަމުންދާ ފިޔަވަޅުތަކަށް އދން އެހީތެރިވާ ގޮތްތަކާއި ގުޅޭގޮތުން ތައްޔާރުކޮށްފައިވާ 10ވަނަ ރިޕޯޓުގައިވާގޮތުގައި އަފްޣާނިސްތާނާ ކައިރި ޤައުމުތަކަށް އައިއެސްގެ ނުރައްކާ އަދިވެސް ވަރަށްބޮޑެވެ.
ރިޕޯޓުގައިވާގޮތުގައި އައިއެސްގެ ދެކުނު އޭޝިޔާ ގޮފިންދަނީ އެމީހުންގެ މަސައްކަތްތައް އިތުރަށް ވަރުގަދަކޮށް، ޕާކިސްތާނުގެ ތަހްރީކީ ޠާލިބާންފަދަ ހަނގުރާމަވެރި ޖަމާޢަތްތަކާއި ގުޅުންބަދަހިކުރަމުންނެވެ. އެމީހުންގެ ފިކުރު ދީނީ ތަޢުލީމުދޭ މަަރުކަޒުތަކާއި އަފްޣާނިސްތާނުގެ އެހެނިހެން ޔުނިވާސިޓީތަކުގައި ފެތުރުމުގެ އިތުރުން، އިންޓަނެޓުގެ ޒަރިއްޔާއިން އެޖަމާޢަތާއި ގުޅޭނޭ ހަނގުރާމަވެރިންވެސް ހޯދަމުންދާކަމަށް ރިޕޯޓުގައި ފާހަގަކޮށްފައިވެއެވެ. އެހެންކަމުން، އަފްޣާނިސްތާނާ ކައިރީގައި އޮންނަ ޤައުމުތަކަށް އައިއެސްގެ ބިރުބޮޑުވެދާނެކަމަށް ބެލެވޭކަމަށް ރިޕޯޓުގައި ބުނެފައިވެއެވެ.
ނަންގަހާރު ޕްރޮވިންސުގައި އައިއެސް ޖަމާޢަތަށް ބޮޑެތި ގޮންޖެހުންތަކެއް ކުރިމަތިވެ، އެޖަމާޢަތުގެ ބާރު ކުޑަވުމުން އެޖަމާޢަތަށް ނިސްބަތްވާ ހަނގުރާމަވެރިން މިހާރު އެންމެ ގިނައިން ތިބީ ކުނާރު ޕްރޮވިންސުގައެވެ. އަފްޣާނިސްތާނުގައި ޙަރަކާތްތެރިވާ އައިއެސް ހަނގުރާމަވެރިންގެ މައި މަރުކަޒުގެ ގޮތުގައި ބޭނުންކުރުމުންދާ އެޕްރޮވިންސުގައި 2،100އެއްހާ ހަނގުރާމަވެރިންތިބިކަމަށް އަންދާޒާކުރެވެއެވެ. ނަމަވެސް އެޤައުމުގެ އެހެން ސަރަޙައްދުތަކުގައި ތިބި ހަނގުރާމަވެރިންގެ ޖުމްލަ އަދަދު 400އަށްވުރެ އިތުރުނުވާނޭކަމަށް ބެލެވެއެވެ. މީގެ ތެރެއިން 25އެއްހާ ހަނގުރާމަވެރިން ފަރްޔަބު ޕްރޮވިންސްއާއި ޢިރާޤުގައި ތިބިކަަމަށް ރިޕޯޓުގައި ބުނެފައިވެއެވެ.