ޗައިނާގައި މިހާރު ހަލުވިކަމާއެކު ފެތުރެމުންދާ ކޮރޯނާވައިރަހާގުޅޭ ތަހުލީލުތައް ކުރުމަށް ދުނިޔޭގެ ޞިއްޙަތާބެހޭ ޖަމްޢިއްޔާ ޑަބްލިއުއެޗްއޯގެ ތަޖުރިބާކާރުންގެ ވަފުދެއް ޗައިނާއަށް ގޮސްފިއެވެ.
ސުވިޓްޒަލޭންޑްގެ ޖެނީވާގައި ހުންނަވާ ނޫސްވެރިންނާ ވާހަކަދައްކަވަމުން އެޖަމްޢިއްޔާގެ އެންމެ އިސްވެރިޔާ ޓެޑްރޮސް އަދަނޮމް ގެބްރެޔެސުސް ވިދާޅުވީ ޑަބްލިއުއެޗްއޯގެ ވަފުދު މަސައްކަތްކުރާނީ ޗައިނާގެ އިދާރާތަކާ ގުޅިގެންކަމަށެވެ. އެވަފުދުގައި އެންމެ އިސްކޮށް ޙަރަކާތްތެރިވާނީ ކުއްލި ޙާލަތްތަކާބެހޭ ތަޖުރިބާކާރެއްކަމަށްވާ ޑރ. ބްރޫސް އެއިލްވާރޑެވެ.
ގެބްރެޔެސުސް ވިދާޅުވީ ޗައިނާއާ ގުޅިގެން ޑަބްލިއުއެޗްއޯއިން މަސައްކަތްކުރާނީ ކޮރޯނާވައިރަހާގުޅޭގޮތުން އުފެދިފައިވާ ސުވާލުތަކަށް އެކަށީގެންވާ ޖަވާބެއް ހޯދުމަށެވެ. އަދި ޗައިނާއަށް އިތުރު ވަފުދެއް ވަރަށް އަވަހަށް ފޮނުވާނެކަމަށާއި ޑަބްލިއުއެޗްއޯގެ އެންމެ ފުރަތަމަ މަޤްޞަދަކީ ކޮރޯނާވައިރަސް ފެތުރުން ހުއްޓުވުންކަމަށް އޭނާ ވިދާޅުވިއެވެ.
ދުނިޔޭގެ 28 ޤައުމަކާއި ސަރަޙައްދަކުން 43،000އަށްވުރެ ގިނަ މީހުންނަށް ކޮރޯނާވައިރަސްވަނީ ޖެހިފައެވެ. އަދި ވައިރަހުގެ ސަބަބުން 1،000އަށްވުރެ ގިނަ މީހުންވަނީ މަރުވެފައެވެ.