ޕާކިސްތާނާއި އިންޑިޔާއާ ދެމެދު ޙަމަލާ ބަދަލުކުރުން މަނާކުރާ އެއްބަސްވުމާ ޚިލާފަށް ޕާކިސްތާނުގެ އަސްކަރިއްޔާއިން އިންޑިއާގެ އަވަށަކަށް ރޮކެޓު ޙަމަލާއެއްދީފިއެވެ.
މަޢުލޫމާތު ލިބިފައިވާގޮތުގައި ޕާކިސްތާނުން ޙަމަލާދީފައިވަނީ އިންޑިޔާގެ ބާރުގެދަށުގައިވާ ކަޝްމީރުގެ ސަރަޙައްދުގައި އޮންނަ އަވަށަކަށެވެ. މިދިޔަ އާދިއްތަ ދުވަހުވެސް ޕާކިސްތާނުންވަނީ އިންޑިޔާގެ އަވަށަކަށް ޙަމަލާދީފައެވެ. އަދި ރައްދުގައި އިންޑިޔާއިންވަނީ ޕާކިސްތާނުގެ ސަރަޙައްދުތަކަށް ޙަމަލާދީފައެވެ.
އިންޑިއާގެ ދިފާޢީ ވަޒީރު ރަޖްނާތް ސިންގް ވިދާޅުވެފައިވަނީ މިދިޔަ އަހަރު ކަޝްމީރުގެ ސަރަޙައްދީ ރޮނގު ހުރަސްކޮށް އިންޑިޔާގެ ސަރަޙައްދުތަކަށް ޕާކިސްތާނުން 3،479 ޙަމަލާ ދީފައިވާކަމަށެވެ. ސިންގްހް ވިދާޅުވިގޮތުގައި 2019ވަނަ އަހަރު ޕާކިސްތާނުން ދިން ޙަމަލާތަކުގައި އިންޑިޔާ ސިފައިންގެ 13 މީހުންވަނީ މަރުވެފައެވެ. އޭނާ ވިދާޅުވީ ޕާކިސްތާނުން ސަރަޙައްދީ ރޮނގު ހުރަސްކޮށް ދޭ ޙަމަލާތަކަށް އިންޑިޔާއިން ރައްދު ދީފައިވާނެކަމަށެވެ. އަދި އެފަދަ ޙާލަތްތަކުގައި އަޅަންޖެހޭ ހުރިހާ ފިޔަވަޅެއް އިންޑިޔާއިން އަޅާފައިވާނެކަމަށްވެސް އެޤައުމުގެ ދިފާޢީ ވަޒީރު ވިދާޅުވިއެވެ.
އިންޑިޔާއާއި ޕާކިސްތާނުންވަނީ 3 ފަހަރު ހަނގުރާމަކޮށްފައެވެ. އޭގެ ތެރެއިން 2 ފަހަރު ހަނގުރާމަކޮށްފައިވަނީ ކަޝްމީރުގެ މައްސަލައިގައެވެ.