ތޫފާން ކިއާރާގެ ސަބަބުން އިނގިރޭސިވިލާތުގެ ވައިގެ އުދުހުންތަކާއި ރޭލު ދަތުރުތައް ހުއްޓުމަކަށް އަތުވެއްޖެއެވެ.
ގަދަ ވަޔާއެކު ބޯކޮށް ވާރޭވެހޭ ތޫފާނު ކިއާރާގެ ސަބަބުން ހަފުތާ ބަންދުގައި އިނގިރޭސިވިލާތުގައި ބޭއްވާ ކުޅިވަރު މުބާރާތްތަކާއި ޢާންމު ދިރިއުޅުމަށްވަނީ ވަރަށް ބޮޑަށް ބުރޫއަރާފައެވެ. އެތޫފާނުގައި ގަޑިއަކު 90 މޭލު ބާރުމިނުގައި ވައިޖެހި، ބޯކޮށް ވާރޭވެހި، އެޤައުމުގެ އެކި ސަރަޙައްދުތަކުގައިވަނީ ފެންބޮޑުވެފައެވެ. ޚާއްޞަ ގޮތެއްގައި އިނގިރޭސިވިލާތުގެ އުތުރުގެ ސަރަޙައްދުތަކުގައި ފެންބޮޑުވެ ބޮޑެތި ގެއްލުންތަކެއްވަނީ ލިބިފައެވެ.
ތޫފާނު ކިއާރާގެ ސަބަބުން އިނގިރޭސިވިލާތުގެ ދަތުރުފަތުރުގެ ނިޒާމަށްވެސްވަނީ ބޮޑެތި ހުރަސްތަކެއް އެޅިފައެވެ. ބައިނަލްއަޤްވާމީ އެއަރލައިންތަކުންވަނީ އިނގިރޭސިވިލާތުގެ ހީތްރޯ ވައިގެ ބަނދަރާއި ގެޓްވިކް ވައިގެ ބަނދަރަށް ދަތުރުކުރުން ވަގުތީގޮތުން ހުއްޓާލައިފައެވެ. އަދި އެޤައުމުގެ ރޭލު ދަނގަނޑުތަކުގެ މައްޗަށް ގަހާއި ކަރަންޓް ހޮޅިފަދަ ތަކެތި ވެއްޓި މަގުތައް ބަންދުވެފައިވާތީ އެޤައުމުގެ ރޭލު ދަތުރުތައްވެސްވަނީ ހުއްޓުމަކަށް އައިސްފައެވެ.
ތޫފާން ކިއާރާގެ ސަބަބުން އިނގިރޭސިވިލާތުގެ ބައެއް ސަރަޙައްދުތަކުގައި ގެދޮރަށާއި މުދަލަށްވަނީ ބޮޑެތި ގެއްލުންތަކެއް ލިބިފައެވެ، އަދި 500،00އަށްވުރެ ގިނަ ގެއިން ކަރަންޓުގޮސްފައިވެއެވެ.