ދުނިޔޭގައި މިހާރު ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަސް އެންމެ ފުރަތަމަ ދެނެގަނެ އޭގެ ނުރައްކަލުގެ އިންޒާރުދިން ޑޮކްޓަރުގެ މަރާއެކު ޗައިނާގައި ރުޅިވެރިކަން ފެތުރިއްޖެއެވެ.
އުމުރުން 34 އަހަރުގެ ލީ ވެންލިއަންގަކީ ވުހާން ސެންޓްރަލް ހޮސްޕިޓަލުގައި މަސައްކަތްކުރި ޑޮކްޓަރެކެވެ. އެހޮސްޕިޓަލު ހުންނަނީ ކޮރޯނާވައިރަސް އެންމެ ފުރަތަމަ ފެތުރުނު ހޫބައި ޕްރޮވިންސްގެ ވުހާން ސިޓީގައެވެ. ކޮރޯނާވައިރަސް ޖެހިގެން ފަރުވާހޯދުމަށް އެހޮސްޕިޓަލަށް އެންމެ ފުރަތަމަ ދިޔަ މީހުންނަށް ފަރުވާދީ ބޭނުންވާ ތަހުލީލުތައް ހެދުމުގައި ލީ އިސް ދައުރެއް އަދާކުރިއެވެ. އައު ވައިރަހެއް ފެތުރެމުންދާކަން އޭނާއަށް އެނގުނީ އެހިސާބުންނެވެ.
ވުހާންގައި ފެތުރެމުންދަނީ ކޮރޯނާވައިރަސްކަން ޔަޤީންވުމުން އޭނާއާއެކު މަސައްކަތްކުރަމުންދިޔަ ޑޮކްޓަރުންނަށް އެކަން އަންގާ ވައިރަހުން ރައްކާތެރިވުމުގެ މުހިންމުކަމުގެ ވާހަކަކިޔައިދިނެވެ. މީހުން ހޭލުންތެރިކުރެވޭތޯ ވަރަށް ބޮޑަށް މަސައްކަތްކުރިއެވެ. ނަމަވެސް އޭނާއަށް ދެން ކުރިމަތިވީ ވަރަށް އުނދަގޫ ދުވަސްތަކަކާއެވެ. ފުލުސް އޮފީހަށް ހާޒިރުކޮށް، ޢާންމުންގެ މެދުގައި ބިރުވެރިކަން ފަތެރުމާއި ދޮގުވާހަކަ ފެތުރުމުގެ ތުހުމަތު އޭނާގެ ބޮލުގައި އެޅުވިއެވެ. އަދި އެފަދަ ކަންކަން ނުކުރުމަށާއި އެފަދަ އަމަލުތައް ތަކުރާރުވާނަމަ ފިޔަވަޅުއަޅާނެކަމަށް އަންގާ އޭނާ ލައްވާ ލިޔުމެއްގައި ސޮއިކުރުވިއެވެ. އެއީ މިދިޔަ އަހަރުގެ ޑިސެންބަރު މަހުއެވެ.
ޗައިނާގައި ހަލުވިކަމާއެކު ކޮރޯނާވައިރަސް ފެތުރެމުންދާކަމަށް އެޤައުމުގެ ސަރުކާރުން ދުނިޔޭގެ ޞިއްޙަތާބެހޭ ޖަމްޢިއްޔާ، ޑަބްލިއުއެޗްއޯއަށް އެންގީ އޭގެ މަސްދުވަސްފަހުންނެވެ. އޭރު އެޤައުމުގެ ގިނަ ބަޔަކަށް ވައިރަސް ޖެހި، އޭގެ ތެރެއިން ބައެއް މީހުން މަރުވެއްޖެއެވެ. ވައިރަސް ޖެހުނު މީހުންގެ ތެރޭގައި ޑރ. ލީވެސް ހިމެނެއެވެ. މިިހުރިހާ ވާހަކައެއް އޭނާ ކިޔައިދީފައިވަނީ ބަލި އެނދުގައި އޮވެ، ސޯޝަލް މިޑިއާ މެދުވެރިކޮށެވެ. އޭނާގެ ވާހަކަތައް ކިޔުމަށްފަހު، ޗައިނާގެ ރައްޔިތުންގެ އިތުރުން ދުނިޔޭގެ އެތައް ބައެއްގެ ލޯތްބާއި ތަޢުރީފު އޭނާއަށް ބަނޑުންކޮށްލިއެވެ.
ކޮރޯނާވައިރަހަށް ފަރުވާ ހޯދަމުންދަނިކޮށް، އޭނާ މަރުވިކަމުގެ އަޑުތައް ފެތުރެން ފެށުނީ ފެބްރުއަރީ 6ވަނަ ދުވަހުގެ ރެއެވެ. ޗައިނާގެ ރަސްމީ ބައެއް މަސްދަރުތަކުން އެވާހަކަތައް ދޮގުކޮށް، އެކަމާގުޅޭ ލިޔުންތައް ވެބްސައިޓުތަކުންނާއި ސޯޝަލް މީޑިއާއިން ނެގި ނަމަވެސް އޭނާ މަރުވިކަން ކަށަވަރުކުރެވުނެއެވެ. އެހިސާބުން ޗައިނާގެ ރައްޔިތުންގެ ރުޅިގަނޑު އިންތިހާއަށް ގޮސް، ސަރުކާރަށް ވަރަށް ބޮޑަށް ފާޑުކިޔަން ފެށިއެވެ. މިއީ ޗައިނާގައި ޢާންމުކޮށް ފެންނަކަމެއް ނޫނެވެ. ފާޑުކިޔާ މީހުން ބުނިގޮތުގައި ކޮރޯނާވައިރަސް ފެތުރުމުގެ ޒިންމާ ޗައިނާގެ ބައެއް އިދާރާތަކުން ނަގަންޖެހޭކަމަށާއި އެއިދާރާތަކުން ރައްޔިތުންނަށް އޮޅުވާލާފައިވާކަމަށެވެ. އަދި ކަންކަން ސިއްރުކުރުން ހުއްޓާލުމަށްވެސް އެމީހުންވަނީ ސޯޝަލް މީޑިއާގައި ގޮވާލާފައެވެ.
ކޮރަޕްޝަންގެ މައްސަލަތައް ތަހުޤީޤުކުރާ ޗައިނާގެ އިދާރާއިންވަނީ ލީއަށް އަޅާފައިވާ ފިޔަވަޅުތަކާ ގުޅޭގޮތުން ތަހުޤީޤެއް ހިންގާނެކަމަށް ބުނެފައެވެ، ޗައިނާގެ ސަރުކާރުން ބުނެފައިވަނީ އައު ވައްތަރެއްގެ ކޮރޯނާަވައިރަހެއް ފެތުރެން ފެށުމުން އެއާ ދެކޮޅަށް އެންމެ އެކަށީގެންވާގޮތެއްގައި ފިޔަވަޅު ނޭޅުނީކަމަށެވެ.
ދުނިޔޭގެ 28 ޤައުމަކާއި ސަރަޙައްދަކުން 31،500އަށްވުރެ ގިނަ މީހުންނަށްވަނީ ކޮރޯނާވައިރަސް ޖެހިފައެވެ، އޭގެ ތެރެއިން 630އަށްވުރެ ގިނަ މީހުންވަނީ މަރުވެފައެވެ. މަރުވި މީހުންގެ ތެރޭގައި ލީ ވެންލިއަންގްވެސް މިހާރު ހިމެނުނީއެވެ. އޭނާ މަރުވީ ޖޫން މަހު ލިބެން އުޅޭ އައު ދަރިފުޅުގެ އިންތިޒާރުގައި ހުއްޓައެވެ.