ކޮމަންވެލްތުގެ މެންބަރު ޤައުމަކަށް ރާއްޖެ އަލުން ހަމަޖެއްސުމުން އެ ޖަމާއަތުގެ މައި އިދާރާގައި ދިވެހި ދިދަ އަލުން ނަގައިފިއެވެ.
ކޮމަންވެލްތުގެ ހުރިހާ ޤައުމެއްގެ ފުރިހަމަ ތާޢީދާއެކު ރަސްމީކޮށް އެ ޖަމާއަތުގެ މެންބަރެއްގެ ގޮތުގައި ރާއްޖެ އަލުން ކަނޑައެޅީ މިމަހުގެ އެއްވަނަދުވަހުއެވެ. ރާއްޖެ އެ ޖަމާއަތާއި އަލުން ގުޅުމުން ރާއްޖެއަކީ އެ ޖަމާއަތުގެ 54 މެންބަރު ޤައުމެވެ.
ކޮމަންވެލްތުގައި މައި އިދާރާގައި ބޭއްވި ދިދަ ނެގުމުގެ ރަސްމިއްޔާތުގައި ދިވެހި ދިދަ ނަންގަވާދެއްވީ ފޮރިން މިނިސްޓަރ އަބްދުﷲ ޝާހިދެވެ. މި ރަސްމިއްޔާތުގައި ކޮންމަންވެލްތްގެ ސެކެރެޓަރީ ޖެނެރަލް ޕެޓްރީޝިއާ އާއި ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ ފަރުހަނާޒް ފައިސަލްވެސް ބައިވެރިވެވަޑައިގަތެވެ. އަދި ރާއްޖޭގެ އިތުރުން ކޮމަންވެލްތުގައި ދެން ހިމެނޭ 53 ޤައުމުން މަންދޫބުންވެސް މި ރަސްމިއްޔާތުގައި ބައިވެރިވިއެވެ.
ރާއްޖެއަށް ކޮމަންވެލްތުގެ މެންބަރުކަން ލިބުމާއެކު މެންބަރު ޤައުމުތަކުގައި ރާއްޖެއިން ޤާއިމްކޮށްފައިވާ އެމްބަސީތައް ހައިކޮމިޝަނަށް ބަދަލުވެގެންދާނެއެވެ. ސަރުކާރުން ދަނީ އެކަމަށްޓަކާއި ވާންޖެހޭ ތައްޔާރީތައްވެސް ވަމުންނެވެ.
ރާއްޖެއަށް އަލުން ކޮމަންވެލްތުގެ މެމްބަރުކަން ލިބުން ފާހަގަ ކުރުމަށް ގޮތުން މި ހަފްތާގައި ގިނަ ހަރަކާތްތަކެއް ވަނީ ކުރިޔަށް ގެންގޮސްފައެވެ. އެގޮތުން ސްކޫލުތަކުގައިވެސް ހަރަކާތްތައް ވަނީ ހިންގާފައެވެ.
ދިވެހިރާއްޖެ ކޮމަންވެލްތުން ވަކިވީ 2016 ވަނަ އަހަރުގެ އޮކްޓޯބަރ 13 ގައި ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމްގެ ވެރިކަމުގައެވެ. އަދި އެނިންމުން ބަދަލުކޮށް ދިވެހިރާއްޖެއިން ކޮމަންވެލްތުގެ މެމްބަރަކަށް އަލުން ވުމަށް ސަރުކާރުން ހުށަހެޅީ 2018 ވަނަ އަހަރުގެ ޑިސެމްބަރު މަހުގެ 6 ވަނަ ދުވަހުގައެވެ. ކޮމަންވެލްތުގައި އަލުން ބައިވެރިވުމަކީ ރައީސް އިބްރާޙިމް މުޙައްމަދު ޞާލިޙްގެ ރިޔާސީ ވައުދުފުޅެކެވެ.