ދިރާގާއި އުރީދޫ ގުޅިގެން ރާއްޖެއަށް ސަބްމެރިން ކޭބަލެއް އަޅަނީ

ދިރާގާއި އުރީދޫ މޯލްޑިވްސް ގުޅިގެން ރާއްޖެއާއި ސްރީލަންކާއާ ދެމެދު ފައިބަރ އޮޕްޓިކް ސަބްމެރިން ކޭބަލް އެޅުމަށް ނިންމައިފިއެވެ.

މި އޮޕްޓިކް ސަބްމެރިން ކޭބަލް އެޅުމަށް މިދިޔަ މަހުގެ 30 ވަނަ ދުވަހު ދިރާގާއި އުރީދޫ މޯލްޑިވްސް އަދި ސްރީލަންކާގައި ޓެލިކޮމިއުނިކޭޝަން ޙިދުމަތްދޭ "ޑައަލޮގް އެޒިއޭޓާ" އާއިއެކު ވަނީ އެއްބަސްވުމެއްގައި ސޮއިކޮށްފައެވެ.

މި ޕްރޮޖެކްޓްގެ 45 އިންސައްތަ ދިރާގުން ހިއްސާކުރާއިރު 45 އިންސައްތަ އުރީދޫ އަދި 10 އިންސައްތަ ހިއްސާކުރާނީ ޑައަލޮގް އެޒިއޭޓާއިންނެވެ. މި ޕްރޮޖެކްޓަށް ދިރާގުން 8.4 މިލިއަން ޑޮލަރު ޚަރަދުކުރާއިރު، އުރީދޫއިން 9 މިލިއަން ޑޮލަރު ހަރަދުކުރާނެއެވެ.

ރާއްޖެއާއި ސްރީލަންކާއާ ދެމެދު ފައިބަރ އޮޕްޓިކް ސަބްމެރިން ކޭބަލް އެޅުމުން އެކި ޤައުމުތަކަށް ޙިދުމަތް ފުޅާވެގެންގޮސް، ބްރޭންޑެއްގެ ގޮތުގައި އުރީދޫ އަދި ދިރާގަށް އިތުރު ފުރުސަތުތައް ލިބި، ޙިދުމަތުގެ ފެންވަރު ރަނގަޅުކުރުމަށް އެހީއަކަށް ވެގެންދާނެކަމަށް ދިރާގާއި އުރީދޫއިން ބުނެއެވެ.

ފައިބަރއޮޕްޓިކް ކޭބަލް އަކީ، ސިގްނަލްގެ ފެންވަރަށް ބަދަލެއް ނައިސް، އަލި ދަތުރުކުރާ ބާރުމިނުގައި، ހައި ބޭންޑްވިތް ސިގްނަލް ފޯރުކޮށްދެވޭ ވަސީލަތެކެވެ. މިހެންކަމުން ފައިބަރ އިންޓަނެޓް މެދުވެރިކޮށް ސްޕީޑްއާއި ކޮލިޓީގެ ތަފާތެއްނެތި އެކި ހިސާބުތަކަށް ހައިސްޕީޑް އިންޓަނެޓް ފޯރުކޮށްދިނުމުގެ ފުރުސަތު ހުޅުވިގެންދާނެއެވެ.