2016ވަނަ އަހަރު ނެގި ޢާންމު ފެންނަ ނުފެންނަ ވޯޓަކަށްފަހު، ގިނަ ބަހުސްތަކަކާއި ސިޔާސީ ހަލަބޮލިކަމަށްފަހު، އަދި ބޮޑުވަޒީރުގެ މަޤާމުން ތެރީސާ މޭއިގެ އިސްތިޢުފާއަށްފަހު، އެންމެ ފަހުން ވިލާތުގެ އިއްތިޙާދުން އިނގިރޭސިވިލާތް ވަކިވެއްޖެއެވެ. އެއީ ފާއިތުވި އެތައް އަހަރެއްގެ ތެރޭގައި ސިޔާސީގޮތުން އިނގިރޭސިވިލާތުން އެޅި އެންމެ ބޮޑު ފިޔަވަޅެވެ. ވިލާތުގެ އިއްތިޙާދުން ވަކިވުމުން އިނގިރޭސިވިލާތަށް ދެންވާނީ ކިހިނެތްބާއެވެ؟
ބާރުވެރިކަން
މީގެ ފަހުން އިނގިރޭސިވިލާތް ވިލާތުގެ ޤައުމެއްގެ ގޮތުގައި އޮންނާނީ ހަމައެކަނި ނަމެއްގައެވެ. އެއީ އެބަރަށް ނިސްބަތްވާ ޤައުމަކަށްވާތީއެވެ. ވިލާތުގެ ސިޔާސަތުތައް ކަނޑައެޅުމުގައި ވިލާތުގެ އިއްތިޙާދުން ނިންމާ އެއްވެސް ނިންމުމެއްގައި ނުވަތަ ނަގާ އެއްވެސް ވޯޓެއްގައި އިނގިރޭސިވިލާތުގެ ބަހެއް ނުވަތަ ދައުރެއް ނޯންނާނެއެވެ، މީގެ ތެރޭގައި މާލީގޮތުން ވިލާތުން ނިންމާ ނިންމުންތަކާއި ވިލާތުގެ އުފެއްދުންތަކާ ގުޅޭގޮތުން ނިންމާ ނިންމުންތައް ހިމެނެއެވެ. ވިލާތުގެ އިއްތިޙާދުން އިނގިރޭސިވިލާތް ވަކިވުމަށް އެޤައުމުގެ ރައްޔިތުންނަށް ވިއްކި އެންމެ ބޮޑު ސިޔާސަތަކީ ވިލާތުގެ އިއްތިޙާދުގެ ހިޔަނިން ނުކުމެ، އަމިއްލަ ބާރުވެރިކަމެއް ހޯދުމެވެ.
ވިލާތުގެ އިއްތިޙާދުން އިނގިރޭސިވިލާތް ވަކިވީ އެޤައުމުގެ ކުރިއެރުމަށާއި އިޤްތިޞާދަށާއި ސަލާމަތަށް ކުރަންޖެހޭ ވަރަށް ގިނަ ކަންކަން ނުކޮށެވެ. އެހެންކަމުން 2020ވަނަ އަހަރު ނިމެންދެން އިނގިރޭސިވިލާތަށްވަނީ އިންތިޤާލީ މުއްދަތެއް ދީފައެވެ. އިންތިޤާލީ މުއްދަތުގެ ތެރޭގައި އިނގިރޭސިވިލާތަކަށް ވިލާތުގެ އިއްތިޙާދުން ނިންމާ ނިންމުންތަކަށް ބަސްބުނުގެ ބާރެއް ނޯންނާނެއެވެ. އެމުއްދަތުގެ ތެރޭގައި އިނގިރޭސިވިލާތުން ކުރާނެ އެންމެ މުޙިންމު އެއްކަމަކީ ވިލާތުގެ އިއްތިޙާދާއެކު ވިޔަފާރީގެ އެއްބަސްވުމެއް ޤާއިމުކުރުމެވެ. އަދި އިންތިޤާލީ މުއްދަތު 2020ވަނަ އަހަރު ފަހަނައަޅާ ނުދާނެކަމަށް އިނގިރޭސިވިލާތުގެ ސަރުކާރުން ބުނެއެވެ.
އިނގިރޭސިވިލާތަކީ ވިލާތުގެ އިއްތިޙާދަށް މުޙިންމު ޤައުމެކެވެ. އިނގިރޭސިވިލާތުގެ ވެރިރަށް ލަންޑަނަކީ ދުނިޔޭގެ މާލީ ވެރިރަށެވެ. ވިލާތުގެ އިއްތިޙާދުގެ އިޤްތިޞާދުގެ 15 އިންސައްތަ ޙިއްސާކުރަނީ އިނގިރޭސިވިލާތުންނެވެ. އެޤައުމުގެ އިޤްތިޞާދަކީ 2.7 ޓްރިލިއަން އެމެރިކާ ޑޮލަރުގެ އަގުހުރި އިޤްތިޞާދެކެވެ. އެނިސްބަތުން ބަލާނަމަ 27 ޤައުމު ހިމެނޭ ވިލާތުގެ އިއްތިޙާދުގެ އިޤްތިޞާދުގެ އަގުހުރީ 18.3 ޓްރިލިއަން އެމެރިކާ ޑޮލަރުގައެވެ. މީގެ އިތުރުން، އިނގިރޭސިވިލާތަކީ އަސްކަރީ ކަންކަމަށް އެންމެ ބޮޑު ޚަރަދެއްކުރާ ވިލާތުގެ ޤައުމެވެ.
މީގެ ފަހުން އިނގިރޭސިވިލާތުން އަމަލުކުރާނީ ކިހިނެތްކަމެއް އަދި ސާފެއް ނޫނެވެ. އިނގިރޭސިވިލާތްވާނީ ވިލާތުގެ އިއްތިޙާދުގެ އެންމެ ބޮޑު ވާދަވެރިޔާއަށްބާއެވެ؟ ނޫނީ އިނގިރޭސިވިލާތުން ގެންގުޅޭނީ ވިލާތުގެ އިއްތިޙާދާ ގާތްގުޅުމެއްބާއެވެ؟
ރައްޔިތުން
2020ވަނަ އަހަރުގެ ނިމެންދެން އަމަލުކުރަމުންދާ އިންތިޤާލީ މުއްދަތުގެ ތެރޭގައި ވިލާތުގެ އިއްތިޙާދުގެ ރައްޔިތުންނާއި އިނގިރޭސިވިލާތުގެ ރައްޔިތުންނަށް އެއްވެސް ހުރަހެއްނެތި ވިލާތުގެ ހުރިހާ ޤައުމެއްގައި ވަޒީފާ އަދާކޮށް، އެއްޤައުމު އަނެއްޤައުމަށް ދަތުރުކުރެވޭނެއެވެ.
އިނގިރޭސިވިލާތުގެ ސަރުކާރުން ބުނާގޮތުގައި ވިލާތުގެ ޤައުމުތަކަށް ނިސްބަތްވާ 3.5 މިލިއަން މީހުން އިނގިރޭސިވިލާތުގައި އެކިކަންކަމުގައި އުޅެއެވެ. 2020ވަނަ އަހަރުގެ ފަހުން އެމީހުންނަށް އިނގިރޭސިވިލާތުގައި އުޅެވޭނީ ރަޖިސްޓްރީވެގެން ހުއްދަލިބިގެންނެވެ. އެހިސާބުން 2020ވަނަ އަހަރުގެ ފަހުންވެސް މިހާރު އެމީހުންނަށް ލިބެމުންދާ ހުރިހާ ޙައްޤެއް، އެއްވެސް އުނިކަމެއްނެތި، ލިބެމުންދާނެއެވެ.
އިނގިރޭސިވިލާތުގެ ސަރުކާރުން ނިންމާފައިވަނީ މީގެ ފަހުން ކިޔަވައިގެން ތިބި ފަންނީ ހުނަރުވެރިންނަށް އިސްކަން ދިނުމަށެވެ. އެމީހުންނަށް އެޤައުމަށް ހިޖުރަކުރުމާއި ރަށްވެހިކަން ހޯދަން ފަސޭހަވެ، ވަޒީފާގެ ފުރުޞަތުތައް ލިބޭނެއެވެ. އެނޫން މީހުންނަށް އެޤައުމަށް އެތެރެވުންވެސްވަނީ ދަތިއުނދަގޫކަމަކަށެވެ.
ވިޔަފާރި
ވިލާތުގެ އިއްތިޙާދުން ވަކިވުމުން އިނގިރޭސިވިލާތުން ވަކިވަކި ޤައުމުތަކާއެކު ވިޔަފާރީގެ އެއްބަސްވުން ޤާއިމުކުރެވޭނެއެވެ. އެއީ ވިލާތުގެ އިއްތިޙާދުގައި އޮތްއިރު އެޤައުމަށް ހުރަސްއެޅިފައިވާ ކަމެކެވެ. އިނގިރޭސިވިލާތުގެ ސަރުކާރުން އެންމެ ބޮޑު އިސްކަމެއް ދެނީ އެމެރިކާއާއި ވިލާތުގެ އިއްތިޙާދާއެކު ވިޔަފާރީގެ އެއްބަސްވުންތަކެއް ޤާއިމުކުރުމަށެވެ.
އިނގިރޭސިވިލާތުން ކުރާ ވިޔަފާރީގެ ދެބައިކުޅަ އެއްބައި ޙިއްސާކުރަނީ ވިލާތުގެ އިއްތިޙާދާއެވެ. އެމެރިކާއާއެކު ވިޔަފާރީގެ އެއްބަސްވުމެއް ޤާއިމުކުރަން ބޮޑެތި ގޮންޖެހުންތަކެއް އެބަހުއްޓެވެ. އެގޮތުން އެމެރިކާގެ ކުންފުނިތަކުން ޑިޖިޓަލް ސަރވިސަސް ޓެކްސް ނެގުމަށް އިނގިރޭސިވިލާތުން ބޭނުންވެއެވެ. ބަދަލުގައި އެމެރިކާއިން ބޭނުންވަނީ އިނގިރޭސިވިލާތުގައި އުފައްދާ ކާރުފަދަ އިނޖީނުލީ އުޅަނދުތަކުން ޓެކްސް ނެގުމަށެވެ.
2020ވަނަ އަހަރު ނިމެން ބާކީ އޮތް 11 މަސްދުވަހުގެ ތެރޭގައި ވިލާތުގެ އިއްތިޙާދާއެކު ފައިސާގެ މުއާމަލާތް ކުރުމަށް އިނގިރޭސިވިލާތަށް އެއްވެސް ހުރަހެއްނެތެވެ. އަހަރު ނިމެންދެން އަމަލުކުރާ އިންތިޤާލީ މަރުހަލާގައި ވިލާތުގެ އިއްތިޙާދުގެ މާލީ ޤާނޫނުތަކާއި ޤަވައިދުތައް އިނގިރޭސިވިލާތުގެ މައްޗަށް ހިނގާނެއެވެ. އިނގިރޭސިވިލާތުގެ ބެންކުތަކާއި އިންޝުއަރެންސް ކުންފުނިތަކަށް އެއްވެސް ދައްޗެއް ނެތި ވިލާތުގެ އިއްތިޙާދާއެކު ފައިސާގެ މުއާމަލާތްކުރެވޭނެއެވެ.
ނަމަވެސް އިންތިޤާލީ މަރުހަލާއަށްފަހު، އެކަންކަމަށްވާނެ ގޮތެއް އަދި ނޭނގެއެވެ. އެކަންކަމަށް ގޮތެއް ނިންމާނީ ވިލާތުގެ އިއްތިޙާދާއި އިނގިރޭސވިލާތާ ދެމެދު ވިޔަފާރީގެ އެއްބަސްވުމެއް އެކުލަވާލުމަށް ކުރާ މަޝްވަރާތަކުގައެވެ. އިނގިރޭސިވިލާތުން ބޭނުންވަނީ ޖޫން މަހުގެ ކުރިން ވިޔަފާރީގެ އެއްބަސްވުން އެކުލަވާލުމަށެވެ. ބެލެވޭ ގޮތުގައި އިނގިރޭސިވިލާތުން ހުށަހަޅާނީ އެޤައުމުގެ ބެންކުތަކަށާއި ކުންފުނިތަކަށް އެއްވެސް ހުރަހެއްނެތި މިހާރުވެސް ކުރާގޮތަށް ވިޔަފާރިކުރުމުގެ ފުރުޞަތު ދިނުމަށެވެ.
47 އަހަރަށްފަހު ވިލާތުގެ އިއްތިޙާދުން އިނގިރޭސިވިލާތް ވަކިވީ ދިގު އިންތިޒާރަކަށް ފަހުއެވެ. މީގެ ކުރިން 1970ގެ އަހަރުތަކުގެ ތެރޭގައިވެސް އިނގިރޭސިވިލާތުން އެކަހަލަ ވިސްނުންތަކެއް ގެންގުޅުނެވެ.
އެނގޭ އެއްކަމަކީ އިނގިރޭސިވިލާތުގެ ވަކިވުމަށްފަހު، ވިލާތުގެ އިއްތިޙާދު ބަލިކަށިވެއްޖެކަމެވެ. ދެވަނަ ބޮޑު ހަނގުރާމައަށްފަހު، އެކަތިގަނޑެއްގެ ގޮތުގައި ވިލާތުގައި ހަމަ ޔަޤީނުންވެސް ރެނދުލައިފިކަމެވެ.