ސޫރިޔާގެ ހުޅަނގު އުތުރުގައި ހިނގަމުންދާ ކުރިމަތިލުންތަކުނގެ ސަބަބުން ރެފިއުޖީން ތުރުކީވިލާތަށް މިސްރާބުޖަހައިފި
ސޫރިޔާގެ ހުޅަނގު އުތުރުގެ ސަރަޙައްދުތައް މިނިވަންކުރުމަށް އެޤައުމުގެ އަސްކަރިއްޔާއިން ދެމުންދާ ޙަމަލާތަކުން ސަލާމަތްވުމަށް އެތައް ހާސް ބަޔަކު ސޫރިޔާއާއި ތުރުކީވިލާތް ގުޅޭ ސަރަޙައްދީ ރޮނގާ ދިމާލަށް މިސްރާބު ޖަހައިފިއެވެ.
ސޫރިޔާގެ ދާޚީލީ ހަނގުރާމަ ދިރާސާކުރާ ބައިނަލްއަޤުވާމީ އަމިއްލަ ޖަމްޢިއްޔާއެއްކަމަށްވާ ސީރިއަން އޮބްޒަވޭޓަރީ ފޮރ ހިއުމަން ރައިޓްސުން ބުނެފައިވަނީ މިދިޔަ ހުކުރު ދުވަހުން ފެށިގެން ސޫރިޔާގެ އަސްކަރީ ފައުޖުތަކުން އެސަރަޙައްދުގައި ހިންގަމުންދާ އަސްކަރީ ޙަރަކާތްތަކުގައި އިދިކޮޅު ހަނގުރާމަވެރިންގެ ބާރުގެ ދަށުގައި އޮތް ބާވީސް އަވަށް މިނިވަންކޮށްފައިވާކަމަށެވެ. އަދި ސޫރިޔާގެ އަސްކަރިއްޔާ މިހާރު އޮތީ އިދްލިބުގެ ދެކުނުގައި އޮންނަ މަރާތު ޢަލްނުމާން ނަމަކަށް ކިޔާ ރަށެއް ވަށާލައިގެންކަމަށްވެސް އެޖަމްޢިއްޔާއިންވަނީ ބުނެފައެވެ.
ސޫރިޔާގެ އެކްޓިވިސްޓް ޖަމާޢަތްތަކުން ބުނެފައިވަނީ ޙަމަލާތަކުގެ ސަބަބުން އެސަރަޙައްދުގައި އުޅެމުންދާ ޢާންމުން ތިބީ ބިރުވެރިކަމެއްގެ ތެރޭގައިކަމަށެވެ. ސީރިއަން އޮބްޒަވޭޓަރީން ބުނެފައިވަނީ ވޭތުވެދިޔަ 12 ދުވަހުގެ ތެރޭގައި އިދްލިބުގެ ސަރަޙައްދުން 120 ހާސް މީހުން އެހެން ސަރަޙައްދުތަކަށް ހިޖުރަކޮށްފައިވާކަމަށެވެ.