ޗައިނާގައި ހަލުވިކަމާއެކު ފެތުރެމުންދާ ވުހާން ވައިރަސްއާ ދެކޮޅަށް ޗައިނާގެ ސަރުކާރުން އިތުރު ފިޔަވަޅުތަކެއް އަޅައިފިއެވެ.
ޗައިނާގެ ޤައުމީ ސިއްޙަތާބެހޭ ކޮމިޝަނުން ބުނެފައިވަނީ ނޮވެލް ކޮރޮނާވައިރަސް އެންމެ ފުރަތަމަ ފެނުނު ވުހާނަށް 1،000އަށްވުރެ ގިނަ ސިއްޙީ އެހީތެރިން ފޮނުވާނެކަމަށެވެ. ޤައުމީ ސިއްޙަތާބެހޭ ކޮމިޝަނުގެ ފަރާތުން ނޫސްވެރިންނާ ވާހަކަދައްކަވަމުން ޖިއާއޯ ޔާހޫއި ވިދާޅުވީ ވުހާން ވައިރަސް ޖެހޭ މީހުންގެ އަލާމަތްތައް ދެނެގަނެ އެމީހުންނަށް ފަރުވާ ދިނުމަށް ތަމްރީނުތައް ދީފައިވާ ކަމަށެވެ. މީގެ އިތުރުން ބަލި ފެތުރޭނެ ގޮތްތަކާ އަމިއްލަ ރައްކަލަށް ކުރެވިދާނެކަންކަމާމެދުވެސް އެފަދަ ފަރާތްތަކަށް ތަމްރީނު ދިފައިވާކަމަށް އޭނާ ވިދާޅުވިއެވެ.
ޗައިނާގެ ސަރުކާރުންދަނީ ވުހާންގައި 1،000 އެނދުގެ ހޮސްޕިޓަލެއް އެޅުމުގެ މަސައްކަތް ކުރަމުންނެވެ. އެހޮސްޕިޓަލަކީ ވުހާން ވައިރަސް ޖެހޭ މީހުންނަށް ފަރުވާ ދިނުމަށް ޚާއްޞަކޮށްގެން އަޅާ ހޮސްޕިޓަލެއްކަމަށާއި އަންނަ ފެބްރުއަރީ މަހުގެ 3ވަނަ ދުވަހުގެ ކުރިން އެހޮސްޕިޓަލް ހުޅުވޭނެކަމަށް ޗައިނާގެ ސަރުކާރުން ވަނީ ބުނެފައެވެ. މީގެ އިތުރުން ވުހާންގެ ސިއްހީ ނިޒާމު އިތުރަށް ވަރުގަދަކުރުމަށް އިތުރު 2 ވަގުތީ ހޮސްޕިޓަލް އެޅުމުގެ މަސައްކަތްވެސް ކުރަމުންދާކަމަށް ޗައިނާގެ ސަރުކާރުންވަނީ ބުނެފައެވެ.
ޗައިނާގެ މާލީ ވުޒާރާއާއި ޤައުމީ ސިއްޙީ ފަރުވާގެ ސަލާމަތާބެހޭ އިދާރާއާއި ޤައުމީ ސިއްޙީ ކޮމިޝަނުން ބުނެފައިވަނީ ވުހާން ވައިރަސް ޖެހޭ މީހުންގެ ސިއްޙީ ފަރުވާއަށްދާ ޚަރަދަށް ސަރުކާރުން ސަބްސިޑީއެއް ކަނޑައަޅާ މަލީ އެހީތެރިކަން ދޭން ނިންމާފައިވާކަމަށެވެ. އަދި ބަލި ޖެހޭ މީހުންނަށާއި ބަލިޖެހޭކަމަށް ޝައްކުކުރެވޭ މީހުންނަށްވެސް މާލީ އެހީތެރިކަން ދޭނެކަމަށްވެސް އެފަރާތްތަކުންވަނީ ބުނެފައެވެ. ޗައިނާގެ މާލީ ވުޒާރާއިން މިހަފްތާގެ ހޯމަދުވަހު ވަނީ ޢާއްމު ސިއްހީ ޚިދުމަތްތަކާ ބަލިފެތުރުން ހުއްޓުވުމަށް ކުރަމުންދާ މަސައްކަތްތަކަށް އިތުރު 134 މިލިއަން ޑޮލަރު ކަނޑައަޅާފައެވެ. ވުހާން ނިސްބަތްވާ ހުބައި ޕްރޮވިންސަށް އެކަނިވެސް 72 މިލިއަން ޑޮލަރުވަނީ ކަނޑައަޅާފައެވެ.
ޗައިނާގެ ޢާންމު ސަލާމަތާބެހޭ ވުޒާރާއިންވަނީ ބަލީގެ ޙާލަތު ބަލައި ވައިރަސް ޖެހޭ މީހުން އެކަހެރިކުރުމަށް ކަމާ ބެހޭ އިދާރާތަކަށް އަންގާފައެވެ. މީގެ އިތުރުން މިކަމާ ގުޅިގެން އެކި ފަރާތްތަކުން ހިންގާ ޤަވައިދާ ޚިލާފު ކަންކަން ހުއްޓުވުމަށްވެސް އެވުޒާރާއިންވަނީ މަސައްކަތް ފަށާފައެވެ. މީގެ ތެރޭގައި ބޭހާއި ސިއްޙީ ފަރުވާދޭ ސާމާނުގެ އަގުތައް ބޮޑުކުރުމާ ތަކެތި އެއްކޮށްގެން ނުދޫކުރުންފަދަ ކަންކަން ހިމެނޭކަމަށްވެސް އެވުޒާރާއިންވަނީ ބުނެފައެވެ.
ޗައިނާގެ ސައިންސްއާއި ޓެކްނޮލޮޖީއާބެހޭ ވުޒާރާއިންދަނީ ނޮވެލް ކޮރޮނާވައިރަސް ދިރާސާކޮށް ވައިރެހުން ޖެހޭ ބައްޔަށް ފަރުވާއެއް ހޯދުމަށް މަސައްކަތް ކުރަމުންނެވެ. އެގޮތުން އެވުޒާރާއިންދަނީ އަށް ޕްރޮގްރާމެއް މިހާރުވެސް ހިންގަމުންނެވެ. އަދި އެވުޒާރާއަށް ނިސްބަތްވާ ސައިންސްވެރިންވަނީ ވުހާނަށް ގޮސް ޙާއްސަ ދިރާސާތައްވެސް ކުރަމުންނެވެ.
ބަހާރު މޫސުމާ ދިމާކޮށް އެޤައުމުގެ ޔުނިވަރސިޓީތަކާއި ސްކޫލުތަކުގެ ކިޔެވުން އަލުން ފެށުމަށް ތައްޔާރުވަމުންދާތީ ޗައިނާގެ އެޑިއުކޭޝަން މިނިސްޓްރީންވަނީ އެކަން މަޑުޖެއްސުމަށް އަންގާފައެވެ. އަދި ވަކި މުއްދަތެއް ކަނޑައަޅަންދެން ތަޢުލީމީ ޚިދުމަތްތައް ދޭ ތަންތަން ނުހުޅުވުމަށްވެސްވަނީ އަންގާފައެވެ. ޗައިނާގެ ސިވިލް އެފެއާރޒް މިނިސްޓްރީންވަނީ ކުޑަކުދިންނަށް ވެލްފެއަރ ޚިދުމަތްތައް ދޭ ތަންތަނާއި ޒުވާނުންގެ މަރުކަޒުތައް ބަންދުކުރުމަށްވެސް އަންގާފައެވެ. އަދި ދުވަސްވީ މީހުން ތިބޭ ތަންތަނަށް މީހުން ޒިޔާރަތްކުރުން މަދުކޮށް ވަގުތީގޮތުން ބަންދުކުރުމަށްވެސްވަނީ އަންގާފައެވެ.
މިދިޔަ އަހަރުގެ ފަހުކޮޅު ޗައިނާގެ ވުހާނުން ފެނުނު ވައިރަހުގެ އަސަރުވަނީ 6،000 ވަރަކަށް މީހުންނަށް ޖެހިފައެވެ. އޭގެ ތެރެއިން 132 މީހުންވަނީ މަރުވެފައެވެ.