ޕޯޓް ކޮމިއުނިކޭޝަން ސިސްޓަމް ގާއިމު ކުރުމަށް ނިންމައި، އެކަމާ ގުޅޭ ސާވޭއެއް ހަދަން ފަށައިފިއެވެ.
ޕޯޓް ކޮމިއުނިކޭޝަން ސިސްޓަމަކީ މޯލްޑިވްސް ޕޯޓްސް ލިމިޓެޑް، އެމްޕީއެލްގެ ވިޔަފާރި ބަނދަރުތަކާއި ސަރުކާރުގެ މުއައްސަސާތަކާއި ކަމާބެހޭ އެހެން އިދާރާތަކުގެ މައުލޫމާތުތައް އެއް ވިއުގަކުން ލިބޭ ގޮތަށް ޤާއިމްކުރާ ސިސްޓަމެކެވެ.
ޕޯޓް ކޮމިއުނިކޭޝަން ސިސްޓަމް ގާއިމު ކުރުމަށް ބޭނުންވާ ސާވޭ މިއަދު ފަށާފައިވާއިރު، ބުދަ ދުވަހުގެ ނިޔަލަށް މި ސާވޭ ކުރިއަށްދާނެއެވެ.
މިއީ އޭޝިއަން ޑިވެލޮޕްމަންޓް ބޭންކް، އޭޑީބީ ގެ ދަށުން ހިންގާ ޖަމިއްޔާއެއްކަމަށްވާ ސައުތު އޭޝިއާ ސަބްރީޖަނަލް އިކޮނޮމިކް ކޯޕަރޭޝަން، ސަސެކްއިން ދެކުނު އޭޝިއާގެ ވިޔަފާރި ބަނދަރުތަކުގައި ޕޯޓް ކޮމިއުނިކޭޝަން ސިސްޓަމް ގާއިމު ކުރުމަށްޓަކައި ކުރިއަށްގެންދާ ޕްރޮގްރާމްގެ ދަށުން ހިންގާ ސާވޭއެއްކަމަށް އެމްޕީއެލްއިން މައުލޫމާތުދެއެވެ.
އޭޑީބީން ކުރިއަށްގެންދާ މި ސާވޭގައި އޭޑީބީގެ ސަސެކްގެ ފަރާތުން ތިން ކޮންސަލްޓެންޓުން ބައިވެރިވަމުންދެއެވެ.
މި ސާވޭ ހުޅުވުމުގެ ގޮތުން އެމްޕީއެލްގައި ބޭއްވި ރަސްމިއްޔާތުގައި އެމްޕީއެލްގެ މެނޭޖިން ޑިރެކްޓަރު ޝާހިދު އަލީ ވިދާޅުވީ ޕޯޓް ކޮމިއުނިކޭޝަން ސިސްޓަމްގެ މައިގަނޑު ބޭނުމަކީ ޕޯޓް ބޭނުން ކުރާ ހުރިހާ ވިޔަފާރިތަކާއި ސްޓޭކް ހޯލްޑަރުންގެ މައުލޫމާތުތައް އެއް ޕްލެޓްފޯމަކަށް ޖާމަ ކުރެވޭނެ ގޮތެއް ހަމަޖެއްސުމަށް ކަމަށެވެ.
ޝާހިދު ފަހަގަކުރެއްވި ގޮތުގައި މި ޕޯޓް ވިއުގަ ސިސްޓަމަކީ ދުނިޔޭގެ ގިނަ އެޑްވާންސް ޕޯޓްތަކުގައި ވެސް ބޭނުން ކުރަމުންދާ ސިސްޓަމެއް ކަމަށާއި ސިސްޓަމް ގާއިމު ކުރުމުން އެމްޕީއެލްއަށާއި މިބަނދަރު ބޭނުން ކުރާ ހުރިހާ ފަރާތަކަށް އޭގެ ފައިދާ ލިބިގެން ދާނެއެވެ. އަދި ސިސްޓަމުން އެމްޕީއެލް އާއި އެހެން ވިޔަފާރި ބަނދަރުތަކާއި ސަރުކާރުގެ މުއައްސަސާތައް ގުޅުވައިދެވޭނެ ކަމަށާއި އެއީ ސަރުކާރުގެ ސިންގަލް ވިންޑޯ ޕްރޮގްރާމްގެވެސް ބަޔަކަށް ވެގެންދާނެ ކަމަށް ޝާހިދު ވިދާޅުވިއެވެ.
މި ސިސްޓަމްގެ ސަބަބުން އެމްޕީއެލްއަށް އަދި ސަރުކާރު މުއައްސަސާތަކަށް މުދާ ކްލިއަރކުރުމާއި، އެހެން ހިދުމަތްތައް ހޯދުމަށް ލުއިފަސޭހަތަކެއްލިބިގެން ދާނެކަމަށް އެމްޕީއެލްއިން ބުނެއެވެ. މިގޮތުން އޮންލައިންކޮށް ފޯމް ހުށަހެޅުމާއި އެކި ހިދުމަތްތައް ހޯދުމަށް މިސިސްޓަމްގެ ދަށުން މަގުފަހިވެގެން ދާނެއެވެ.