އިންޑިއާގެ ޤައުމީ އެއަރލައިން ހިންގާ، އެއަރ އިންޑިއާ ލިމިޓެޑް ކުންފުނި ވިއްކާލުމަށް އިންޑިއާ ސަރުކާރުން ނިންމައިފިއެވެ.
އިންޑިއާގެ ޤައުމީ އެއަރލައިންގައި އޮންނަ އިންޑިއާ ސަރުކާރުގެ ހިއްސާތައް ވިއްކާލުމަށް އިންޑިއާ ސަރުކާރުން ނިންމާފައިމިވަނީ، މީގެކުރިން އެއަރ އިންޑިއާގެ މެޖޯރިޓީ ހިއްސާ ވިއްކާލުމަށް އިންޑިއާ ސަރުކާރުން ކުރި މަސައްކަތް ނާކާމިޔާބުވުމުންނެވެ.
އިންޑިއާގެ ޤައުމީ އެއަރލައިން ވިއްކާލުމަށް އިންޑިއާ ސަރުކާރުން ނިންމާފައި މިވަނީ އެއަރ އިންޑިއާގެ ވިޔަފާރި ދަށްވެ، މާލީގޮތުން ބޮޑެތި ގެއްލުންތަކާ ކުރިމަތިވެ، ދަރަނިވެރިވެފައިވާ ދަނޑިވަޅެއްގައެވެ. އެކަމުގެ ސަބަބުން އިންޑިއާ ސަރުކާރުން ވަނީ ގެއްލުމުގައި ހިންގާ އެއަރލައިނަށް އިތުރަށް ފައިސާ ޚަރަދުނުކުރަން ނިންމާ، އެއަރލައިންގެ ހިއްސާތައް ވިއްކާލަން ނިންމާފައެވެ.
އެއަރ އިންޑިއާ ލިމިޓެޑްގެ 76 އިންސައްތަ ހިއްސާ ވިއްކާލުމަށް އިންޑިއާ ސަރުކާރުން 2018 ވަނަ އަހަރު ހުޅުވާލި ނަމަވެސް، އެއްވެސް ފަރާތަކުން ޝަޢުޤުވެރިކަން ފާޅުކޮށްފައެއް ނުވެއެވެ. އެހެންކަމުން އިންޑިއާ ސަރުކާރުން މިފަހަރު ހުޅުވާލާފައިވަނީ އެއަރ އިންޑިއާ ލިމިޓެޑްގެ 100 އިންސައްތަ ހިއްސާ ވިއްކާލުމަށެވެ.
އެއަރ އިންޑިއާ ގަންނަން ބޭނުންވާ ފަރާތްތަކަށް ޝަޢުޤުވެރިކަން ފާޅުކުރުމަށް މާޗުމަހުގެ 17 ވަނަ ދުވަހާ ހަމައަށް ހުޅުވާލާފައިވާއިރު، އެއަރލައިން ވިއްކާލާނީ އިންޑިއާގެ ކުންފުންޏަކަށް ނުވަތަ އިންޑިއާގެ ކުންފުންޏަކުން ކޮންޓްރޯލްކުރާ ކުންފުންޏަކަށްކަމަށް އިންޑިއާ ސަރުކާރުން ބުނެއެވެ.
އިންޑިއާ ސަރުކާރުން ނިންމާފައިވާ ގޮތުން އެއަރ އިންޑިއާ ގަންނަ ފަރާތަކަށް، އެއަރ އިންޑިއާގެ ދަށުން ހިންގާ ބަޖެޓް އެއަރލައިނެއްކަމަށްވާ "އެއަރ އިންޑިއާ އެކްސްޕްރެސް"ގެ ކޮންޓްރޯލް ލިބޭނެއެވެ. އަދި އިންޑިއާގެ އެކި ބަނދަރުތަކުގައި ކާގޯގެ ޚިދުމަތްދޭ "އައިސެޓްސް"ގެ 50 އިންސައްތަ ހިއްސާވެސް ލިބޭނެއެވެ.
1973 ވަނަ އަހަރު ވުޖޫދަށް އައި އެއަރ އިންޑިއާގައި 9400 ދާއިމީ މުވައްޒަފުންނާއި 3600 ކޮންޓްރެކްޓް ސްޓާފުން މަސައްކަތްކުރެއެވެ. އޭގެ ތެރޭގައި 1850 ޕައިލެޓުންނާއި 4600 ކެބިން ކުރޫން ހިމެނެއެވެ.