ކޮރޯނާ ވައިރަސްއާ ދެކޮޅަށް ކުރަމުންދާ މަސައްކަތްތަކާގުޅޭގޮތުން ހެލްތް އެމަޖެންސީ ކޯޑިނޭޝަން ކޮމިޓީގެ މަޝްވަރާ ބައްދަލުވުމެއް އަނެއްކާވެސް ބާއްވައިފިއެވެ.
މި ބައްދަލުވުމަކީ ކޮރޯނާ ވައިރަހުން ރައްކާތެރިވުމަށް އެކި މުޢައްސަސާތަކުން ފަށާފައިވާ މަސައްކަތްތަކާއި ގުޅޭގޮތުން މަޝްވަރާކުރުމަށް ކުރިއަށްގެންދިތަ ބައްދަލުވުމެކެވެ.
އަދި މުއައްސާތަކުގެ ދައުރާއި، އެއް މުއައްސަސާ އަނެއް މުއައްސާއާއި ގުޅިގެން ކުރިއަށްގެންދިއުމަށް ފަށާފައިވާ މަސައްކަތްތަކާއި ގުޅޭގޮތުންވަނީ މަޢުލޫމާތުދީ މަޝްވަރާކޮށްފައެވެ. އަދި ކުރިއަށް އޮތްތާންގައި މި ބައްޔާއިއެމެދު ސަރުކާރުން ޢަމަލުކުރަން ނިންމާފައިވާ ގޮތްތަކާއި ގުޅޭ މަޝްވަރާތައްވަނީ ކުރިއަށްގެންގޮސްފައެވެ.
ހެލްތް އެމަޖެންސީ ކޯޑިނޭޝަން ކޮމިޓީއަކީ ސިއްޙީ ދާއިރާގައި ދިމާވާ އެމްޖެންސީތަކުގައި ކުރަންޖެހޭ މަސައްކަތްތައް ވިލަރެސްކޮށް ކުރިއަށްގެންދިއުމަށް ނޭޝަނަލް ހެލްތް އެމަރޖެންސީ އޮޕަރޭޝަންސް ޕްލޭންގެ ދަށުން ކަނޑައަޅާފައިވާ ކޮމިޓީއެކެވެ.
މި ކޮމިޓީގައި ފޮރިން އެފެއަރސް، ޓޫރިޒަމް މިނިސްޓްރީ، ވައިގެ ދަތުރުފަތުރާއި ގުޅޭ މުއައްސަސާތައް، ކަސްޓަމްސް، އިމިގްރޭޝަން އަދި އައިޖީއެމްއެޗްއާއި ހުޅުމާލެ ހޮސްޕިޓަލް ހިމެނެއެވެ.
އަލަށް ފެތުރެމުން އަންނަ ވައިރަހެއްކަމަށްވާ ކޮރޯނާ ވައިރަހުގެ އެއްވެސް އަސަރެއް މިހާތަނަށް ރާއްޖެއިން ފެނިފައި ނުވާކަމަށް ހެލްތް މިނިސްޓްރީއިންވަނީ ބުނެފައެވެ. ނަމަވެސް މިފަދަ ޙާލަތަކަށް ބަލައި ސަރުކާރުންއޮތީ ރައްކާތެރިކަމުގެ ފިޔަވަޅު އަޅާފައެވެ.