ރާއްޖެއިން ބޭރަށް ދަތުރުކުރާނަމަ ފޮރިން މިނިސްޓްރީގައި ރަޖިސްޓްރީ ކުރުމަށްފަހު ދަތުރުކުރުމަށް އެމިނިސްޓްރީން އަނެއްކާވެސް އިލްތިމާސް ކުރައްވައިފިއެވެ. ފޮރިންގ މިނިސްޓްރީން މިކަމަށް އިލްތިމާސް ކުރައްވާފައި މިވަނީ މިހާރު ފެތުރެމުންދާ ކޮރޯނާ ވައިރަސް ދިވެހިން ޢާއްމުކޮށް ދަތުރުކުރާ ބައެއް ޤައުމުތަކުން ފެނުމާ ގުޅިގެންނެވެ.
ރާއްޖެއިން ބޭރަށް މިދުވަސްކޮޅު ދަތުރުކުރާ ފަރާތްތަކުން މިނިސްޓްރީގައި ރަޖިސްޓްރީ ވުމަށްފަހު ދަތުރުކުރުމަށް މިނިސްޓްރީ އޮފް ފޮރިން އެފެއާޒުން އިލްތިމާސްކުރައްވާފައިމިވަނީ ކޮރޯނާ ވައިރަސް ޤައުމުތަކުގައި ހަލުވިކަމާއެކު ފެތުރެމުން ދިއުމާ ގުޅިގެން، ބޭރު ޤައުމުތަކުގައި އުޅޭ ދިވެހިންނަށް އެހީތެރިކަން ފޯރުކޮށް ދިނުމަށެވެ.
އެމިނިސްޓްރީން ވިދާޅުވީ މިވައިރަސް ފެންނަމުންދާ ޤައުމުތައް އިތުރުވަމުން އަންނައިރު އެޤައުމުތަކުގައި ތިބި ދިވެހިން ދެނެގަތުމުގައި ގިނަ ދަތިތަކެއް ކުރިމަތިވަމުންދާކަމަށެވެ. ޢާއްމު ގޮތެއްގައިވެސް ރާއްޖެއިން ބޭރަށް ފުރާއިރު ފޮރިން މިނިސްޓްރީގައި ރަޖިސްޓްރީ ކުރުމަށް ނުވަތަ އެދަތުރުކުރާ ޤައުމެއްގައި ހުންނަ ރާއްޖޭގެ މިޝަނަށް އެންގުމަށް އެދެނީ މިފަދަކަމެއް ދިމާވާ ޙާލަތްތަކުގައި ދިވެހިންގެ ޙާލުބެލުމަށާއި އެހީ ފޯރުކޮށް ދިނުމަށް އެންމެ އަވަސްގޮތެއްގައި މަސައްކަތްކުރުމަށް ކަމަށް ފޮރިން މިނިސްޓްރީން ވިދާޅުވއެވެ. ރާއްޖެއިން ބޭރަށް ދަތުރުކުރާ މީހުން ފޮރިން މިނިސްޓްރީގެ ވެބްސައިޓު މެދުވެރިކޮށް ރަޖިސްޓަރވުމުގެ ފުރުސަތު އޮވެއެވެ.
ފޮރިން މިނިސްޓްރީން ވިދާޅުވީ ކޮރޯނާ ވައިރަސް ފެތުރުނުއިރު އެންމެ ފުރަތަމަ ވުހާންގައި ތިބީ 5 ދިވެއްސެއްކަމަށާ، އެހެންނަމަވެސް އިތުރު މީހުން ތިބިކަމުގެ މަޢުލޫމާތު ފަހުން ލިބުނުކަމަށެވެ.
ޗައިނާގެ ވޫހާން ސިޓީން ފެނުނު ކޮރޯނާ ވައިރަސް މިހާރު ދުނިޔޭގެ އެހެން ޤައުމުތަކަށް ފެތުރެމުން އަންނައިރު މިއީ ފަރުވާ ހޯދިފައިނުވާ ވައިރަސްއެކެވެ. މިވައިރަސްއާ ގުޅިގެން މިހާތަނަށް 57 މީހުން މަރުވެފައިވާއިރު 2000 އަށްވުރެ ގިނަމީހުންވަނީ މިވައިރަސްއަށް ޕޮޒިޓިވްވެފައެވެ. ބަލިން ރައްކާތެރިވުމަށް މާސްކު އެޅުމަށާއި ގިނަގިނައިން އަތްދޮވުމަށް އިސްކަން ދިނުމަށް އެޗްޕީއޭއިންވަނީ އިލްތިމާސްކޮށްފައެވެ. އަދި ކެއްސާ ކިނބިހި އަޅާއިރު އަނގަމަތި ނިވާކުރުމަށްވެސް އެއިދާރާއިން ވަނީ އިލްތިމާސްކޮށްފައެވެ.